ရေဝ်၊ ဂျူလာၚ်(၁၅)
တွဵုရးဍုၚ်မန်၊ ပွိုၚ်ဍုၚ်ရေဝ် ပ္ဍဲကွာန်နှေဟ်ခရေၚ်ဂှ် ဟိုတ်နူဒပ်ကံၚ်ဇြဳပၞာန်တံ ဆက်ဖျေံလဝ်ဒပ်ဖိုဟ်ဂှ်ရ ညးဍုၚ်ကွာန်ဒေသဒးဂြိပ်ဒဴပါဲဓလေတ်မံၚ်တံဂှ် ဒဵုကဵုအခိၚ်လၟုဟ် ဟွံဂံၚ်စဴဌာန်ဒၟံၚ်ဏီပုဟ်ဂှ် ညးဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
တုဲကၠုၚ်ဂိတုဂျောန် စၟတ်တ္ၚဲ ၂၅ တေံ ကြဴနူဂကောံဒပ်ကံၚ်ဇြဳပၞာန် မမံၚ်တန်တဴမံၚ် ပ္ဍဲဗ္ဒိုပ်ဗၠာဲသၟိၚ်နှေဟ်ခရေၚ်တံ ဒးဒုၚ်ဗ္တိုက်တုဲဂှ် ဒပ်ကံၚ်ဇြဳပၞာန်တံ လုပ်စိုပ်ဖျေံဒပ်မံၚ်စံၚ်မံၚ် အပ္ဍဲကွာန်နှေဟ်ခရေၚ်ဂှ် မဒှ်ရ။
ဒပ်ကံၚ်ဇြဳပၞာန်တံ ဖျေံလဝ်ဒပ်ပ္ဍဲဘာလကျာ်ကွာန်နှေဟ်ခရေၚ်တံတုဲ ရပ်ဒက်မံၚ်ညးဒေသတံဂှ်ရ ညးဒေသ ၂၀၀၀ ပြၚ်တံ ဂြိပ်ဒဴပါဲဓလေတ်အာ လ္တူဍုၚ်ရေဝ်တံ၊ လ္ပာ်ကွာန်မသကလောကောဒေံနွံတံဂှ် မဒှ်ရ။
ဆ္ဂး ညးဒေသသၞေဟ်ခရေၚ်တံဂှ် ဟိုတ်နူဒပ်ကံၚ်ဇြဳပၞာန် ဆက်ဖျေံလဝ်ဒပ်အပ္ဍဲကွာန်တံဂှ်ရ ဟွံဂံၚ်စဴဌာန်ဒၟံၚ်မွဲသာ် မၚ်ကျောဝ်မံၚ်အကာဲအရာအိုတ်ရဂှ် ညးဒေသမွဲတၠ ဟီုရ။
ဒပ်ကံၚ်ဇြဳပၞာန် ဖျေံလဝ်ဗ္ဒိုပ်ပ္ဍဲဘာလကျာ်ကွာန်သၞေဟ်ခရေၚ်ဂှ် ခြာတ္ၚဲတုဲ ရပ်ဒက်ဒၟံၚ်ညးဒေသတံဂှ်ရ ညးဒေသ ဟွံအောန်နူကဵု ၁၅ တၠ ဒးဒုၚ်ရပ်ဒက်လဝ်ရ။
ညးဒေသ ဒးဒုၚ်ရပ်ဒက်လ္ၚဵုတံဂှ် ကြဴနူဒပ်ကံၚ်ဇြဳပၞာန် စၟဳတ်သၟာန်သၟုက်တုဲဂှ် မွဲတၠမ္ဂး အာတ်မိက်ဒၟံၚ်သြန် နူဇရေၚ်ဂကောံသ္ၚိကၟိန်တံ နူ ၁၀ ကိုဋ်ဒ္ကေဝ် စဵုကဵု ၁၇ကိုဋ်ဒ္ကေဝ်တုဲ ကလေၚ်ဗလးကဵုမံၚ်တုဲ ဗွဲမဂၠိုၚ်ဂှ်တှ်ေ ဟွံကလေၚ်ဗၠးကၠုၚ်ဏီပုဟ်ဂှ် ဂွံတီကေတ်ရ။
ဂကောံဒပ်ကံၚ်ဇြဳပၞာန် ဖျေံလဝ်ဗ္ဒိုပ်ပ္ဍဲဘာလကျာ်တံဂှ် အခိၚ်ဒးစိုတ် လုပ်စၟဳတ်မံၚ် ပ္ဍဲကွာန်တံတုဲ သီကေတ်ဒၟံၚ် ပိုန်ဒြပ်အရပ်ရာညးဒေသတံ နွံမံၚ်ဂှ် ညးဒေသတံ သ္ဂးရ။
ပ္ဍဲပရေၚ်ဗ္တိုက်ဗ္ဒိုပ်ဗၠာဲသၟိၚ်နှေဟ်ခရေၚ်ဂှ် ကံၚ်ဇြဳပၞာန်တံ သုၚ်စောဲတရဴကျာတုဲ ဗ္ဒိုက်လဝ်ဂှ်ရ ညးဒေသ ညးဗြဴမွဲတၠ ချိုတ်တုဲ ဟွံအောန်နူကဵု ၅ တၠ ဇီုကပိုက်ကလိဂွံလဝ်ဝပ်ရ။
ပရိုၚ်-သြၚ်လောန်တိုၚ်မ်
ဗီု-CJ
sanlontai