ဂလာန်သ္ကိုပ်ဝန်ဇၞော်ကာဍုၚ်သ္အာၚ်သေံ ဟီုလဝ်ဂှ်ဝွံ တၞဟ်ခြာဒၟံၚ်ကဵု လညာတ်ဒဝ်အံၚ်သာန်ကျဳရောၚ်ဂှ် NLD ကဵုသတိ

လ္ဂုၚ်၊ ဂျူလာၚ် (၁၇)

ပ္ဍဲကဵုတၚ်နၚ် ဆဵုဂဗလဝ်ကဵု ဒဝ်အံၚ်သာန်ကျဳ မဒးဒုၚ်ရပ်လဝ် ကဵုကံၚ်ဇြဳပၞာန်ဂှ် အရာဟွံတုပ်သၟဟ်တံ နွံဒၟံၚ်ရောၚ် ဗော်ဂအုပ်ဒဳမဝ်ကရေဇြဳကောန်ဂကူ NLD လလောၚ်ပ္တိတ်လဝ်ပရိုၚ်ရ။

ဒဝ်အံၚ်သာန်သုကျဳဝွံ စနူအခိၚ်ဒပ်ပၞာန်သီအဝဵုတုဲ အခိၚ်ဒးဒုၚ်ရပ်လဝ် ဟွံဗဗွဲကဵုသၞောဝ်ဂှ် ဂကောံကေၚ်ကာအပ္ဍဲဗော်တံ ကၠောန်ဗဒှ်ကောံဓရီု ဗွဲမဗၠးၜး ဟွံမာန်မွဲသာ် ဖျေံစၟတ်လစွံစိုတ်၊ တၚ်သ္ဂုတ်သွာတ် မာန်ဟွံသေၚ်တုဲ ဒုၚ်သ္ဇိုၚ်ကဵု ညးဍုၚ်ကွာန်တံတုဲ ဒစဵုဒစးအာ လညာတ်ဆန္ဒ ညးဍုၚ်ကွာန်တံ ဟွံသေၚ်ပုဟ် တၚ်နၚ်တံဏံဒှ်တမ် ဂလာန်ဝန်ဇၞော်ကာဍုၚ်သ္အာၚ်သေံဂှ်ဝွံ ဗၠေၚ်ဒၟံၚ်နွံဒၟံၚ်ဂှ် သ္ဂးလဝ်ရ။

သ္အာၚ်နူဂှ်ပၠန် ဂလာန်ဝန်ဇၞော်ကာဍုၚ်သ္အာၚ်သေံဂှ်ဝွံ ဟိုတ်နူဒှ်အကာဲအရာ တောဲဟီုပ္တိတ် ကုအလဵုညးတၠခန္ဓ ဗွဲမဗၠးၜးဟွံမွဲဂှ်ရ ဇၟာပ်ဂလာန် မဟီုပ္တိတ်လဝ်ဂှ်ဝွံ ဍာံစၟတ်ဒၟံၚ်ဏောၚ်ဟီုဂှ် ဗော် NLD ဒှ်ဒၟံၚ်သံသယရ။

လစွံစိုတ်ဒဝ်အံၚ်သာန်သုကျဳ ပၟိက်ဇၞော်တဴ သွက်ပြသၞာပရေၚ်ဍုၚ်ကွာန်ဍုၚ်ဗၟာ ဂွံပြေပြံၚ်ဂှ် သွက်ဂွံပ္တိုန်ထ္ၜး ဇရေၚ်ညးဍုၚ်ကွာန်တံ ဗွဲမဗၠးၜးမာန် နကဵုက္ဍိုပ်သ္ကိုပ်အာဇြဳယာန်ဂမၠိုၚ် ဗွဲမဗဗွဲကဵု တၚ်တုပ်စိုတ်အာဇြဳယာန် (၅) သာ် မပ္တံကဵုကောန်ထံၚ်ပရေၚ်ဍုၚ်ကွာန် မဒးဒုၚ်ရပ်လဝ်ဂမၠိုၚ် ပါလုပ်သီုကဵုဒဝ်အံၚ်သာန်သုကျဳ ဗလးကၠုၚ်ဗွဲမပြဟ်တုဲ ညံၚ်ဂွံထ္မံက်ပ္တိတ်လညာတ် ဗွဲမဗၠးၜးမာန်ဂှ် ဒးစွံအာရီုထေက်ရောၚ်ဂှ် လလောၚ်ပ္တိတ်လဝ် ပ္ဍဲကဵုတၚ်လလောၚ်တြးဂှ်ရ။

တုဲကၠုၚ်ပ္ဍဲဂိတုဂျူလာၚ် (၉) တေံ ဝန်ဇၞော်ကာဍုၚ်သ္အာၚ်သေံ မေဿတာ ဒေါန်ပရာမွတ်ဝဳနာၚ်ဝွံ ကၠာကောံဓရီုဝန်ဇၞော်ကာဍုၚ်သ္အာၚ်အာဇြဳယာန်ဂှ် ဆဵုဂဗလဝ်ကဵု ဒဝ်အံၚ်သာန်သုကျဳရောၚ် ဟီုပ္တိတ်ကၠုၚ်လဝ် ပ္ဍဲတ္ၚဲစကောံဓရီုအာဇြဳယာန် မကၠောန်ဗဒှ်လဝ် ပ္ဍဲဂျာကာတာတေံဂှ်ရ။

စပ်ကဵုဂလာန်ဝန်ဇၞော်ကာဍုၚ်သ္အာၚ်သေံ ဟီုပ္တိတ်လဝ် ဆဵုဂဗလဝ် ကုဒဝ်အံၚ်သာန်သုကျဳသာ်ဏံဂှ်တုဲ ပ္ဍဲကဵုဌာန်ပရိုၚ်ဍုၚ်သ္အာၚ်တံကဵု ဌာန်ပရိုၚ်အပ္ဍဲဍုၚ်တံ သ္ၚဳဂၠိပ်ဒၟံၚ်ညးသ္ကအ် ဗီုညးကဵုညးအိုတ်ရ။

ညးမၞုံအခေါၚ်ဟီုဂး ကံၚ်ဇြဳပၞာန် သ္ကိုပ်ပၞာန်ဇြဝ်မေန်ထောန်ဂှ်လေဝ် ပ္ဍဲကဵုမဳဒဳယျာတြးဝါဒတံဂှ် ၜိုန်ရဒဝ်အံၚ်သာန်ကျဳ ကေုာံ ဝန်ဇၞော်ကာဍုၚ်သ္အာၚ်တံ ဆဵုဂဗလဝ်ညးသ္ကအ်ရောၚ် သ္ပဒတန်လဝ်ကီုလေဝ် တၚ်နၚ်သာ်လဵု သဳကၠဳဟီုဂးလဝ်ရောဟီုဂှ် ဟီုပ္တိတ်လဝ် ချိုတ်တ်ပၠိုတ်တ်ဂှ် ဟွံဂွံဆဵုကေတ်ရ။

ပရိုၚ်−သြၚ်လောန်တိုၚ်(မ်)

ဗီု−NLD