ပ္ဍဲကဂဝ် ကံၚ်ဇြဳပၞာန်ကဵု PDF ပရေၚ်ပၞာန်ကြံၚ်မ္ၚိုဟ်ဒၟံၚ်

ကဂဝ်၊ ဂျူလာၚ် (၁၆)

ပ္ဍဲကဵုရးမဂွဵု၊ ခရိုၚ်ကဂဝ်ဂှ် ဟိုတ်နူဒပ်ကံၚ်ဇြဳပၞာန် ထ္ပက်လဝ်ကရောၚ်ပၞာန်ကီု၊ ထပ်သၠဲပ္တိုန်ဇြဟတ်တံကီု ကေုာံ သီုကဵုပလေဝ်ပလေတ်ဒၟံၚ်ပရေၚ်ပၞာန်တံဂှ်ရ ပရေၚ်ပၞာန် ကုဂကောံဒပ်စဵုဒၞါညးဍုၚ်ကွာန် PDF တံ ကြံၚ်မ္ၚိုဟ်တုဲ အခိၚ်ဟွံရုဲ အကာဲအရာက္တဵုဒှ်ပေါဲဗ္တိုက်မာန်ဒၟံၚ်ရောၚ်ဂှ် ဂကောံဒပ်စဵုဒၞါညးဍုၚ်ကွာန်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ဒပ်ကံၚ်ဇြဳပၞာန်ဝွံ ထ္ပက်ဒၟံၚ်ကရောၚ်ပၞာန် ပ္ဍဲကဵုဒေသထဳလေန်၊ သဝ်၊ လံၚ်ယှေ ကေုာံ ဒေသကျံက်ထုတံ နကဵုဇြဟတ်ဗွဲမဂၠိုၚ်ဂၠေၚ်တုဲ ပရေၚ်ချဳဒရာၚ်ပရေၚ်ပၞာန်တံလေဝ် ကၠောန်သ္ပဒၟံၚ် အဆက်က်ရ။

“ပြဟ်ဟ်ဏံ လ္ပာ်ဍေံတံလေဝ် နကဵုဇြဟတ်ၜိုတ် ပိကၠံဂှ် ကွဳစက်တံ၊ ဇွောံမတံလေဝ် ပါရ။ ပလေဝ်ပလေတ်ကၠုၚ်လဝ်ပရေၚ်ပၞာန်တံ နွံရ။ မုကၠောန်မုရောဂှ် ဟွံဂွံတီကေတ်ဏီပုဟ် ဒးမၚ်ကျောဝ်ရံၚ်ဒၟံၚ်ဏီ။ ဒှ်ဒၟံၚ်အကာဲအရာ အခိၚ်ဟွံရုဲ ဗ္တိုဟ်ထ္ကးအာမာန်ဏောၚ်” ဂှ် ကောန်ဒပ်စဵုဒၞါညးဍုၚ်ကွာန်မွဲတၠ ဟီုရ။

အခိၚ်လၟုဟ်ဂှ် ကရောၚ်ပၞာန်ကံၚ်ဇြဳပၞာန် နကဵုကွဳစက် (၃၀) ဖ္ဍိုက်ကဵု ဇြဟတ် ပွဳပွူ (၃၀၀) ပါဂှ်ဝွံ စိုပ်ဒၟံၚ်ဍုၚ်လံၚ်ယှေတုဲ ဆက်တုဲ ထ္ပက်ကရောၚ်ပၞာန်ဏောၚ်ဟီုဂှ် ဂကောံဒပ်စဵုဒၞါတံ မၚ်ရံၚ်ဒၟံၚ်ရောၚ် ညးဆက်ဟီုလဝ်ဏီရ။

ကံၚ်ဇြဳပၞာန်ဝွံ သွက်ဂွံပလံၚ်ဇွောံမ ပယျဵုတွဵုရးချေၚ်တုဲ သုၚ်စောဲလဝ် ရေၚ်ကွဳစက်ဏံဒှ်မာန်ရောၚ် သ္ၚဳဂၠိပ်ဒၟံၚ်တံ နွံဒၟံၚ်တုဲ တ္ၚဲဏံ အခိၚ်လဒေါဝ်တ္ၚဲဂှ်လေဝ် ပ္ဍဲကဵုပွဳပွူကွာန်အေန်ပူ ပွိုၚ်ဍုၚ်လံၚ်ယှေတံဂှ် က္တဵုဒှ်လဝ် ပေါဲဗ္တိုက်ဇီုမုက် ကုဂကောံဒပ်စဵုဒၞါတံဂှ် ဂွံတီကေတ်ရ။

အပ္ဍဲပေါဲဗ္တိုက်တံဏံဂှ် လွဟ်ဇၞော် နူကဵုလ္ပာ်ကံၚ်ဇြဳပၞာန်တံ မပန်ပှော်လဝ်ဂှ်ဝွံ ဒတုံဗ္တိုဟ်ထ္ကးအာလဝ် လ္တူကွာန်ယျေန်ကေဝ်တုဲ သ္ၚိမၞိဟ်ဒၟံၚ် ဗၞတ်ကြပ်ဖအိုတ် ပၟတ်တူလီုလာ်အာလဝ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ကြဴနူသီအဝဵု ဍုၚ်ဗၟာတုဲဂှ် ပ္ဍဲကဵုရးမဂွဵု ညးဍုၚ်ကွာန် (၃၀၀) ပြၚ်ဝွံ ဒးချိုတ်အာလဝ် ဒၟါနူကံၚ်ဇြဳပၞာန်တုဲ ဒးဒုၚ်စံၚ်ပလီုပလာ်လဝ် သ္ၚိဒၟံၚ်ဂှ် နွံဒၟံၚ်ဂၠိုၚ်ကဵုလ္ၚီရောၚ် ဂွံတီကေတ် အတိုၚ်တၚ်လလောၚ်တြး ဂကောံဗၠးၜးဂမၠိုၚ်ရ။

ပရိုၚ်−သြၚ်လောန်တိုၚ်(မ်)

ဗီု−CJ