ဒပ်ကံၚ်ဇြဳပၞာန် ပန်ဖျေံဗုမ်ပၟတ် ပ္ဍဲကွာန်ယျေန်ကေဝ် ပွိုၚ်ဍုၚ်သဝ်တုဲ စံၚ်ပလီုဒၟံၚ်သီုအလုံမွဲကွာန်

သဝ် – ဂျူလာၚ်(၁၈)

ရးဒေသမဂွေ၊ ပွိုၚ်ဍုၚ်သဝ် ဒေသလောၚ်ယှေ ပ္ဍဲကွာန်ယျေန်ကေဝ်ဂှ် ဒပ်ကံၚ်ဇြဳပၞာန် ပန်ဖျေံလွဟ်ဇၞော်ဗုမ်ပၟတ်တုဲ စံၚ်ပလီုဒၟံၚ် သီုအလုံမွဲကွာန်ဂှ်ရ ညးဒေသတအ် ဒးဂြိပ်ဒဴဒၟံၚ်ရဂှ် ညးဒေသတအ် ဟီုကဵုဌာန်ပရိုၚ်သြၚ်လောန်တိုၚ်(မ်)ရ။

ပ္ဍဲဂိတုဂျူလာၚ် စၟတ်တ္ၚဲ (၁၄)တုဲကၠုၚ်တတေံ ကြဴနူဒှ်လဝ်ပေါဲဗတိုက်ဆေၚ်မုက်ကဵု ဒပ်စဵုဒၞာညးဍုၚ်ကွာန်တုဲဂှ် ဒပ်ကံၚ်ဇြဳပၞာန် ပန်ဖျေံလွဟ်ဇၞော် ပ္ဍဲကွာန်ယျေန်ကေဝ်တုဲ ဟိုတ်နူစံၚ်လဝ်ကွာန်ဂှ်ရ ကောန်ၚာ်အာယုက် (၁၂)သၞာံ မွဲတၠ ဒးချိုတ်လဝ်တုဲ သ္ၚိဒၟံၚ် (၃၀၀)မ ပြၚ် ဒးတူပၟတ်လီုလာ်လဝ်ရဂှ် ဂွံတီကေတ်ရ။

လွဟ်ဇၞော်လ္ပာ်ဒပ်ကံၚ်ဇြဳပၞာန်ပန်ဖျေံလဝ် ပ္ဍဲကွာန်ယျေန်ကေဝ်ဂှ် ဒှ်လွဟ်ဇၞော် ဒးထေၚ်ခယျကေတ်ဗုမ်ပၟတ်ရဂှ် ဂွံတီကေတ်ရ။

“ယက်ဂၠုဒၟံၚ်ဂှ်တှ်ေ ဆဵုဒၟံၚ်။ ပရေၚ်ကောန်အရာပ်ဇီုကပိုက်ဒးလေဝ် နွံ။ ဒှ်လဝ်ပ္ဍဲဂၠံၚ်အာ လောၚ်ယှေကဵု ကျေန်ဒွေရ။ ပိုဲလေဝ် ဒးမံၚ်ဒၟံၚ်ကဵုသတိရ”ဂှ် ညးဒေသမွဲတၠ ဟီုသ္ဂးလဝ်ရ။

ကရောၚ်ပၞာန်စံၚ်ပလီုဒၟံၚ်သ္ၚိဌာန်ညးဍုၚ်ကွာန်ဂှ် ဒှ်ကရောၚ်ပၞာန် ဇြဟတ် (၃၀၀)ပြၚ် ကၠုၚ်နူလ္ပာ်ပခုက္ကူတုဲ ဒှ်ကရောၚ်ပၞာန်ပလံၚ်ဇွောံမ လ္ပာ်ကျေန်ဒွေ ပွိုၚ်ဍုၚ်ကာန်ပါတ်လေတ်၊ တွဵုရးချေၚ်ရဂှ် ပရေၚ်ချိၚ်ခယျ နွံဒၟံၚ်ရ။

ပ္ဍဲကရောၚ်ပၞာန်ဂှ် ကွဳစက်ခြပ် (၃)ဖ္ဍိုက်ကီု ကွဳစက်ၜိုတ် (၃၀)ဖ္ဍိုက်သီုကဵုဇွောံမ ပါကၠုၚ်တုဲ နူကဵုပခုက္ကူ-တညောၚ်-ဇြုက်ဖျူ-ဇြေန်ဖျူကျောန်-သလေန်-ဇြေတုတ္တရာ စိုပ်ကၠုၚ်ဒၟံၚ် လောၚ်ယှေရ။

အခိၚ်လၟုဟ်ဏံ ဟိုတ်နူဒပ်စဵုဒၞာညးဍုၚ်ကွာန်တအ်ဗတိုက်ဒၟံၚ်တုဲ ကရောၚ်ပၞာန်ဂှ် ဂွံဆက်တိုန်အာဂတတေံ ခက်ဒၟံၚ်တုဲ ဆုဲအာဒၟံၚ်သိုက်က်ရဂှ် ဒပ်စဵုဒၞာညးဍုၚ်ကွာန်တအ် ဟီုသ္ဂးလဝ်ရ။

သ္အာၚ်နူဂှ်ပၠန် ပ္ဍဲဍုၚ်ကါန်ပါတ်လေတ် ကရောၚ်ပၞာန်ပ္တဝ်ဒၟံၚ်က္ဍိုပ်ဂှ်လေဝ် အကာဲအရာပရေၚ်ပၞာန် ကြံၚ်မ္ၚိုဟ်ဒၟံၚ်တုဲ ဟိုတ်နူပေါဲဗတိုက် ဒှ်ကၠုၚ်မာန်ဒၟံၚ်ဂှ်ရ ညံၚ်ညးဍုၚ်ကွာန်တအ် ဂွံအာကၠုၚ်ကဵုသတိဂှ် ဗတိုက်ဖ္အောဝ်လဝ်ရ။

ပရိုၚ်-သြၚ်လောန်တိုၚ်(မ်)

ဗီုရုပ် – ယျဝ်အလေန်တာန်