ပ္ဍဲလှာဒကှ် ကောန်အရာပ် (၂) တၠ ဒးဒုၚ်ပန်ဂစိုတ်လဝ်တုဲ ဗ္ဒာဲ (၂၀) တၠ ဒးဒုၚ်ရပ်လဝ် နဒဒှ်ဒေၚ်ဒုၚ်ဒၞာမၞိဟ်

လှာဒကှ်၊ ဂျူလာၚ်(၁၈)

တွဵုရးကရေၚ်၊ ပွိုၚ်ဍုၚ်လှာဒကှ်၊ ပ္ဍဲပေါဲဗတိုက်ဒှ်လဝ် ပ္ဍဲဂကောံကွာန်ခလေဝ်တခေါန်ဒေၚ်ဂှ် ကောန်အရာပ် (၂) တၠ ဒးချိုတ်လဝ်တုဲ ကောန်အရာပ် ဗ္ဒာဲ(၂၀) တၠ ဒပ်ကံၚ်ဇြဳပၞာန် ရပ်ကေတ်ဏာ နဒဒှ်ဒေၚ်ဒုၚ်ဒၞာမၞိဟ်ရဂှ် ဂွံတီကေတ် နူဂကောံဇြဟတ်ပၠန်ဂတးတအ်ရ။

ပွိုၚ်ဍုၚ်လှာဒကှ် တိဍာ် KNU ဒပ်မဟာ (၆)၊ ပ္ဍဲဂကောံကွာန်ခလေဝ်တခေါန်ဒေၚ်ဂှ် ဒပ်ကံၚ်ဇြဳပၞာန် ထ္ပက်လုပ်ကၠုၚ်ကရောၚ်ပၞာန် ဇြဟတ်ၜိုတ် (၉၀) ပ္ဍဲဂိတုဂျူလာၚ် စၟတ်တ္ၚဲ (၁၄)ဂှ် နူဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA မၚ်ကြတ်ဗတိုက်ဒၟံၚ်ဂှ် ပေါဲဗတိုက်က္တဵုဒှ်လဝ် ဗ္ဒာဲပွိုၚ်မွဲတ္ၚဲရ။

ပ္ဍဲအခိၚ်ပေါဲဗတိုက်က္တဵုဒှ်ဒၟံၚ်ဂှ် ဃောကွဳစက်ပ္ဍိုက်ညးအာတရဴမွဲဖ္ဍိုက်တတ်အာဂှ် ဒပ်ကံၚ်ဇြဳပၞာန် သီုရန်တၟံနွံနွံ ပန်ပှော်လဝ်တုဲ ကောန်အရာပ်ပါကၠုၚ်ပ္ဍဲကွဳစက်ဂှ် (၂) တၠ ဒးချိုတ်လဝ် ဒးလဝ်ဘဲဝပ် (၁၇)တၠတုဲ ညးဂွံလဝ်ဘဲဝပ်တအ်ဂှ် ဒပ်ကံၚ်ဇြဳပၞာန် ရပ်ကော်ကေတ်ဏာ နဒဒှ်ဒေၚ်ဒုၚ်ဒၞာမၞိဟ်ရဂှ် ကရောၚ်ပၞာန်နဂါနဳ လလောၚ်တြးလဝ် ပရိုၚ်ရ။

တ္ၚဲဂှ် အခိၚ်ဗ္တံ (၉)နာဍဳဂှ်မ္ဂး ဃောဗြဲဂူဒၟံၚ် ကောန်အရာပ် (၂) တၠ ကေတ်အခေါၚ်အရာခိုဟ်တုဲ ဂြိပ်တိတ် နူကဵုဒပ်ကံၚ်ဇြဳပၞာန် ဗၠးတိတ်ကၠုၚ်တုဲ မၞိဟ်ဗၠးတိတ်ကၠုၚ် (၂)တၠဂှ် ကရောၚ်ပၞာန်နဂါနဳ ရီုဗၚ်မၚ်မွဲကဵုလဝ်ရဂှ် ဓမံက်လဝ် ပ္ဍဲတၚ်လလောၚ်တြးရ။

ပ္ဍဲပေါဲဗတိုက်ၜါလ္ပာ်ဂှ် လ္ပာ်ဒပ်ကံၚ်ဇြဳပၞာန် ဒးချိုတ်လဝ် (၅)တၠတုဲ ဂွံလဝ်ဘဲဝပ် (၆) တၠရကီု လ္ပာ်ဒပ်ပၠန်ဂတးပံၚ်တောဲတအ်လေဝ် ဒးလဝ်ဘဲဝပ် (၅)တၠရဂှ် ဂွံတီကေတ် အတိုၚ်ကရောၚ်ပၞာန်ဗျူဟာ Lion Battalion Commando လလောၚ်တြးလဝ်ရ။

စဵုကဵုလၟုဟ်ဏံ လၟိဟ်ကောန်အရာပ်ကံၚ်ဇြဳပၞာန်ရပ်ကေတ်ဏာလဝ်ဂှ် ကောန်အရာပ် ပါဗက်ကၠုၚ်ကွဳစက်ဖ္ဍိုက်ညးအာတရဴ ၁၅ တၠ ကေုာံ ကောန်ကွာန်ပုလိၚ် ကၠောန်ဒၟံၚ်ကၠအ် ပ္ဍဲဂိတုဂျူလာၚ် စၟတ်တ္ၚဲ(၁၅)ဂှ် (၄) တၠ အပံၚ်လၟိဟ် (၁၉)တၠ ရပ်လဝ်ဖိုဟ်ရဂှ် ဓမံက်ထ္ၜးလဝ် ပ္ဍဲတၚ်လလောၚ်တြး ကရောၚ်ပၞာန်နဂါနဳရ။

ပွိုၚ်ဍုၚ်လှာဒကှ်၊ ပ္ဍဲဂကောံကွာန်ခလေဝ်တခေါန်ဒေၚ်ဂှ် ပ္ဍဲဂိတုဂျောန်သ္ကုတ်လကြဴတုဲကၠုၚ်ဏံ ဒပ်ကံၚ်ဇြဳပၞာန် ထ္ပက်လုပ်ကၠုၚ်ကရောၚ်ပၞာန်တုဲ ဟိုတ်နူပန်ဖျေံလွဟ်ဇၞော် သီုပန်ကဵုက္ၜၚ်ကျာတုဲ ညးဒေသကောန်ညးဍုၚ်ကွာန် နူကွာန်ဂမၠိုၚ်မပ္တံကဵု ခလေဝ်၊ ပုလိၚ်၊ တခေါန်ဒေၚ်၊ ညုၚ်ချာန်မျာၚ်၊ နောၚ်ဒေတအ် ၁၅၀၀ ပြၚ် ဒးဂြိပ်ဒဴပါဲဓလေတ်ဒၟံၚ် ပ္ဍဲဒၞာဲဌာန်ဗၠးဘဲရ။

ပရိုၚ်-သြၚ်လောန်တိုၚ်(မ်)

ဗီုရုပ်-KNU