ပ္ဍဲကဵုပေါဲဗ္တိုက်ကျာ်ထဝ်ဂှ် ညးဍုၚ်ကွာန်ကောန်အရာပ်တံ ဇီုကပိုက်ချိုတ်ဂျိုၚ်တံ နွံဒၟံၚ်

ကျာ်ထဝ်၊ ဂျူလာၚ် (၁၈)

ဗ္ဒါဲကွာန်ဇြဳကုန် ပွိုၚ်ဍုၚ်ကျာ်ထဝ်၊ တွဵုရးဍုၚ်မန်ဂှ် အပ္ဍဲပေါဲဗ္တိုက်ၜါလ္ပာ် မက္တဵုဒှ်လဝ် အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ KNLA တံဂှ် ညးဍုၚ်ကွာန်ကောန်အရာပ်တံ ဇီုကပိုက်ချိုတ်ဂျိုၚ်လဝ်တံ နွံဒၟံၚ်ရောၚ် ဂွံတီကေတ် ဇရေၚ်ညးဒေသတံရ။

တုဲကၠုၚ် ဂိတုဂျူလာၚ် ၁၆ အခိၚ်နူဂယးတေံတုဲ ကရောၚ်ပၞာန် ကံၚ်ဇြဳပၞာန် ဇြဟတ်ဒပ် ၜိုတ် ၁၀၀ ပြၚ်ပါဂှ်ဝွံ ဟိုတ်နူလုပ်စိုပ်ထ္ပက်ကၠုၚ်ကရောၚ်ပၞာန် အပ္ဍဲကွာန်ဇြဳကုန်ဂှ်ရ က္တဵုဒှ်လဝ် ပေါဲဗ္တိုက် ကုဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA တံရ။

အပ္ဍဲပေါဲဗ္တိုက်ဏံဂှ် ကိုဝ်ပိုၚ်ချေတ်ဥူ ဒၟံၚ်ကွာန်(ပိတောက်ကုန်း) ဒးသေနာတ် ချိုတ်အာလဝ်တုဲ ညးဒေသ နူကဵုကွာန်ဇြဳကုန် (၂) တၠလေဝ် ဒးသေနာတ် ကလိဂွံဝပ် ဗီုညးကဵုညးဂှ် ညးဒေသမွဲတၠ ဟီုရ။

ညးဒုၚ်တာလျိုၚ် PDF ခရိုၚ်သဓီု ကိုဝ်အေမေန်ထောန်ဂှ် အပ္ဍဲပေါဲဗ္တိုက်ၜါလ္ပာ်ဏံ ဒပ်ကံၚ်ဇြဳပၞာန် ပန်ဂစိုတ်ဏာလဝ် ညးဍုၚ်ကွာန်ကောန်အရာပ် (၃) တၠဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ဆ္ဂး ညးဒးဒုၚ်ပန်ပှော်ဂမၠိုၚ်ဝွံ ဒှ်ညးလဵုရောဟီုဂှ် ဆက်ဂၠိုက်ဂၠါဲဒၟံၚ်ဖိုဟ်တုဲ အပ္ဍဲပေါဲဗ္တိုက်ၜါလ္ပာ်ဏံ လ္ပာ်ကံၚ်ဇြဳပၞာန်ဂှ် (၃) တၠ ဟွံအောန် ဇီုကပိုက်ကလိဂွံလဝ်ဝပ်ရောၚ် သ္ဂးရ။

ပ္ဍဲကဵုအကံက်ထလဳဂရာမ် ရဲထံက်ဂလာန်ဒပ်ပၞာန်တံဂှ် အပ္ဍဲပေါဲဗ္တိုက်ဂှ် ကောန်သ္ဂံၚ်ဗော်သွးကောန်ဂကူကရေၚ်မွဲတၠ ချိုတ်တုဲ သီဂိုၚ်ဂွံလဝ် လွဟ်လက်နက်မကမ်လ္ၚဵုတံရောၚ် တြးဒၟံၚ်ဝါဒတံ နွံဒၟံၚ်ရ။

ဒပ်ကံၚ်ဇြဳပၞာန် မထ္ပက်လဝ်ကရောၚ်ပၞာန်ဂှ်ဝွံ ဟိုတ်နူဖျေံလဝ်ဒပ် ပ္ဍဲပွဳပွူကွာန်ဇြဳကုန်ဂှ် စဵုကဵုဂိတုဂျူလာၚ် (၁၇) အခိၚ်ဇိုၚ်သဝ်တ္ၚဲဂှ်ရ ပရေၚ်ပၞာန်ၜါလ္ပာ် သာကြံၚ်မ္ၚိုဟ်ကၠုၚ်ရောၚ်ဂှ် ဂွံတီကေတ် ဇရေၚ်ဂကောံဇြဟတ်ပၠန်ဂတးတံရ။

ဟိုတ်နူပေါဲဗ္တိုက်တုဲ ညးဍုၚ်ကွာန် ဒၟံၚ်ကွာန်ကရဝေ ကေုာံ ကွာန်ဇြဳကုန်တံဝွံ ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲတံကဵု ပ္ဍဲဒဵုဂြိုပ်မကြပ်တံရောၚ်ဂှ် ညးဒေသတံ ဟီုရ။

စနူကၞောတ်သၞာံတုဲကၠုၚ်တေံတုဲ ဒပ်ကံၚ်ဇြဳပၞာန် ထ္ပက်ကရောၚ်ပၞာန် ပ္ဍဲပွိုၚ်ဍုၚ်ကျာ်ထဝ် ဟွံမွဲတုဲ အခါလၟုဟ် ဟိုတ်နူကလေၚ်ထ္ပက်ကၠုၚ်ကရောၚ်ပၞာန် မွဲဝါပၠန်ဂှ်ရ ပေါဲဗ္တိုက်တံ ကလေၚ်က္တဵုဒှ်ကၠုၚ်ရ။

ပရိုၚ်−သြၚ်လောန်တိုၚ်(မ်)

ဗီု−CJ