ဗဝ်လခေဝ်-ဂျူလာၚ်(၁၈)
ကြဴနူဒပ်ပၞာန်လုပ်စိုပ်ဖျေံလဝ်ဗဒိုပ် ပ္ဍဲဍုၚ်ယွာတေတ်၊ ခရိုၚ်ဗဝ်လခေဝ်၊ တွဵုရးကရေၚ်ဍာဲတုဲဂှ် ဟိုတ်နူဟွံကဵုညးဒေသတအ် တိတ်မ္ၚးဍုၚ်ဂှ်ရ ညးဍုၚ်ကွာန် (၅၀၀) ပြၚ် ဒးဒုၚ်ကၟာတ်ဂွံလဝ်တုဲ ညးဂစာန်တိတ်မ္ၚးတအ်ဂှ် ဒးဒုၚ်ပန်ဂစိုတ်လဝ် (၆)တၠ နွံဒၟံၚ်ရဂှ် ဂကောံအလဵုအသဳကရေၚ်ဍာဲ ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ပ္ဍဲဂိတုဂျောန်အိုတ်တုဲကၠုၚ်တေံ ဒပ်ကံၚ်ဇြဳပၞာန် ဟွံလုပ်ကၠုၚ်လ္ပာ်ဗၟံက်ဍုၚ်ယွာတေတ်တုဲ ဗိုၚ်ဂေတ်ဍုၚ်တုဲ ဟိုတ်နူလုပ်စိုပ်ကၠုၚ်ဂှ်ရ ညးဍုၚ်ကွာန်တအ် ဒးဒုၚ်ကၟာတ်ဂွံလဝ်ရ။
အခိၚ်လၟုဟ်ဏံ ကောန်အရာပ်ဒးဒုၚ်ကၟာတ်ဒၞာဂွံလဝ်တအ်ဂှ် သွက်ဂွံကလိဂွံအခေါၚ်လုပ်တိတ်ဍုၚ် ဒးအာတ်ဒၟံၚ်အခေါၚ်ဒပ်ပၞာန်တုဲ ညးကၠတ်တိတ်မ္ၚးတအ်ဂှ်မ္ဂး ကောန်ဒပ်ကံၚ်ဇြဳပၞာန်တအ် ပန်ဂစိုတ်ဒၟံၚ်နွံရဂှ် ညးအုပ်ကာ ဂကောံအလဵုအသဳကာလအကြာ တွဵုရးကရေၚ်ဍာဲ ဥူဗညာဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
“သွက်ဂွံတိတ်မ္ၚးဂှ် ဂွံအခေါၚ်မှ ဂွံတိတ်ဏောၚ်။ ဟွံဂွံအခေါၚ်မွဲသာ် တိတ်အာနကဵုပၟိက်ဇကုတှ်ေ ဒးဒုၚ်ပန်ဂစိုတ်ဒၟံၚ် နွံရ။ ဒးချိုတ်လဝ်(၆)တၠဂှ် ပိုဲဂွံမိၚ်လဝ်ရ။ မၞိဟ်ဂွံတိတ်ကၠုၚ်နူဂှ်ဟၟဲတုဲ မၞိတ်တိတ်ကၠုၚ်မာန်တအ်လေဝ် ဟိုတ်နူအခက်ခုဲအေန်တာနေတ်ကဵု လာၚ်ဖုၚ်တုဲ ဝါတ်ဂါတ်ဒၟံၚ်ရ” ဂှ် ညးဟီုသ္ဂးလဝ်ရ။
ပ္ဍဲဂိတုဂျောန်တုဲကၠုၚ်တေံလေဝ် ကံၚ်ဇြဳပၞာန် ပန်ဂစိုတ်လဝ်ကောန်အရာပ်ဂစာန်ပလေဝ်ပလေတ်ဒၟံၚ် သွက်ဂွံတိတ်မ္ၚးဍုၚ် (၂)တၠတုဲ ပန်ပှော်ဒၟံၚ် ညးအာကၠုၚ်အကြာဂၠံၚ်ဍာန်ရဂှ် ဂွံတီကေတ်ရ။
အခိၚ်လၟုဟ်ပြဟ်ဟ်ဏံ ညးဒးဒုၚ်ကၟာတ်ဂွံလဝ်ပ္ဍဲဍုၚ်ဗွဲမဂၠိုၚ်တအ်ဂှ် ပံၚ်ကောံမံၚ်ဒၟံၚ် ပ္ဍဲဘာလကျာ်ရဂှ် ဂွံတီကေတ်တုဲ ဒးဆေၚ်ဒၟံၚ်မုက်ကဵု အခက်ခုဲဇွောံမရဂှ် ဂွံတီကေတ်ရ။
ပ္ဍဲတွဵုရးကရေၚ်ဍာဲ နွံကြပ်ဒၟံၚ်ကဵုနေပျဳဒဝ် ဒပ်ပၞာန်သီအဝဵုဖျေံလဝ်သ္ဇိုၚ်ဂှ် ဂကောံဇြဟတ်ပၠန်ဂတးတအ် ဇြဟတ်ခိုဟ်ကၠုၚ်ဒၟံၚ်တုဲ ဟိုတ်နူပရေၚ်ဒးဒုၚ်ဆောံလေၚ်တိဍာ် ဂၠိုၚ်တိုန်ကၠုၚ်ဒၟံၚ်ဂှ်ရ ကောန်ဒပ်ကံၚ်ဇြဳပၞာန်တအ် မ္ၚးနူဖံက်ပ္ကဝ်အခေါၚ်အရာမၞိဟ်တုဲ ပရေၚ်ပြိုက်ဂစိုတ်ဒၟံၚ်ဗွဝ်ကဵုဗွဝ် က္လိလောန်ဒၟံၚ်ရ။
ကြဴနူဒပ်ပၞာန်သီအဝဵုကၟိန်ဍုၚ်ဗၟာတုဲ ပ္ဍဲတွဵုရးကရေၚ်ဍာဲဂှ် ဟိုတ်နူဒပ်ကံၚ်ဇြဳပၞာန်တုဲ ကောန်ညးဍုၚ်ကွာန် (၁၀၀)ပြၚ် ဒးချိုတ်လဝ်ရဂှ် ဓမံက်ထ္ၜးလဝ် ပ္ဍဲဂကောံမၚ်မွဲရံၚ်စံၚ်ကောန်ထံၚ်ပရေၚ်ဍုၚ်ကွာန် AAPP တုဲ ဂကောံဇြဟ်ပၠန်ဂတးတအ်ဂှ်မ္ဂး ပရေၚ်ညးဍုၚ်ကွာန်ဒးချိုတ်လဝ်ဂှ် လ္တူနူဏံနွံဂၠိုၚ်မာန်ရဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ပရိုၚ်-သြၚ်လောန်တိုၚ်(မ်)
ဗီုရုပ် – CJ
sanlontai