သွက်ဂွံရပ်စပ်အာ က္ဍိုပ်သ္ကိုပ်ညးဍုၚ်ကွာန် ဒဝ်အံၚ်သာန်သုကျဳဂှ် ကံၚ်ဇြဳပၞာန် ဂ္စါန်ကၠုၚ်

နေဗျဳဒဝ်၊ ဂျူလာၚ် (၁၈)

ဒဝ်အံၚ်သာန်သုကျဳ ညးကဵုကသပ်ကၟိန်ဍုၚ် မဒးဒုၚ်ရပ်လဝ် နူကဵုအခိၚ်စသီအဝဵု စဵုကဵုအခိၚ်ဏံ လလအ်ပွိုၚ် (၂) သၞာံဂှ် ကံၚ်ဇြဳပၞာန် ပ္တိတ်ကၠုၚ်ဇြဟတ် သွက်ဂွံရပ်စပ်သုၚ်စောဲအာညးဂှ် ညးခါတ်အကာဲပရေၚ်ဍုၚ်ကွာန်တံ ဟီုရ။

တုဲကၠုၚ် ပ္ဍဲဂိတုဂျူလာၚ် (၉) တေံ ဂွံလဝ်အခေါၚ်ဆဵုဂဗ ကုဒဝ်အံၚ်သာန်သုကျဳ မဒးဒုၚ်ဖျေံလဝ်ဒုဟ်ဒဏ် ဒဏ်ထံၚ် (၃၀) သၞာံ ပ္ဍဲကဵုနေဗျဳဒဝ်ရောၚ် ဒေါန်ပရာမတ်ဝိနာၚ် ဝန်ဇၞော်ကာဍုၚ်သ္အာၚ်သေံ သီုကဵုဒှ်ဒုသ္ကိုပ်ဝန်ဇၞော်ဍုၚ်သေံ ဟီုပ္တိတ်ကၠုၚ်လဝ်ရ။

ညးမၞုံအခေါၚ်ဟီုဂးကံၚ်ဇြဳပၞာန် သ္ကိုပ်ပၞာန်ဇြဝ်မေန်ထောန်ဂှ်လေဝ် ဒဒှ်ရညးတံၜါတၠ ဆဵုဂဗလဝ် ညးသ္ကအ်ဍာံပြဂှ်ကဵု မုသဳကၠဳလဝ်ညးသ္ကအ်ရောဟီုဂှ် ဟွံဂွံတီကေတ် ချိုတ်တ်ပၠိုတ်တ်ဏီပုဟ်ဂှ် ပ္ဍဲဂိတုဂျူလာၚ် (၁၃) တေံ သ္ပလဝ်ဒတန်ရ။

ဝန်ဇၞော်ကာဍုၚ်သ္အာၚ်သေံဂှ် ဒဝ်အံၚ်သာန်သုကျဳ ပရေၚ်ထတ်ယုက် ခိုဟ်ဒၟံၚ်တုဲ ဒဒှ်ရကဵုညးကဵုတဴ ဇြဟတ် ကုပရေၚ်ဆဵုဂဗသဳကၠဳဂှ် ပ္ဍဲဂိတုဂျူလာၚ် (၁၂) တေံ ကြဴနူကောံဓရီုအာဇြဳယာန်တုဲဂှ် သှ်လဝ်ကဵု အ္စာပရိုၚ်တံတုဲ ဟီုလဝ်ဗွဲလစှ်ေ ဂှ် ဟွံမွဲရ။

သၟာပရေၚ်ဍုၚ်ကွာန်ဝှ်ကြံၚ် ဥူဖေတာန်ဂှ် ကဵုလဝ်ဒဝ်အံၚ်သာန်သုကျဳ အခေါၚ်ဆဵုဂဗ ကုဝန်ဇၞော်ကာဍုၚ်သ္အာၚ်ဂှ်ဝွံ ဒှ်သွက်ဂွံရပ်စပ်စကာအာညး သက်က်ဓဝ်ရဂှ် ပါ်ပါဲလဝ်ရ။

“နကဵုစကစ သွက်ဂွံသုၚ်စောဲ ဒဝ်အံၚ်သာန်သုကျဳသက်က်တုဲ ပ္တိတ်ထ္ၜးလဝ်ဏောၚ်ဂှ် ညာတ်ရ။ နကဵုစိုတ်စေတနာဍာံဍာံ ဗလးကဵုဒဝ်အံၚ်သာန်သုကျဳဏောၚ် အကာဲအရာသာ်ဏံဂှ် ဟွံမွဲပုဟ်။ မုဟိုတ်ရောဟီုတှ်ေ ဍေံတံဂှ် ဆန္ဒမိက်ဂွံပးတိတ်ထောံ ဒဝ်အံၚ်သာန်သုကျဳ နူကဵုပရေၚ်ဍုၚ်ကွာန်ဂှ် နွံဒၟံၚ်တွဵုဏောၚ်။ ပ္ဍဲကဵုဍေံတံ သ္ဂောံကဵုအခေါၚ် ကုဒဝ်အံၚ်သာန်သုကျဳ အာကၠုၚ်ဗၠးဗၠးၜးၜးတုဲ ကဵုအခေါၚ်ချဳဒရာၚ်ပရေၚ်ဍုၚ်ကွာန် ဗၠးဗၠးၜးၜးဂှ် သတ္တိဟွံမွဲဏီပုဟ်” သာ်ဝွံ ညးသ္ဂးရ။

အပ္ဍဲအခိၚ်ဒးဒၟံၚ်ထံၚ်စာတ် နဲကဲကံၚ်ဇြဳပၞာန် ကဵုထောံဒဝ်အံၚ်သာန်သုကျဳ အခေါၚ်ဆဵုဂဗ ကုကလုတ် တမာန်ဍုၚ်သ္အာၚ်တံ၊ ညးစၞနူကဵုဂကောံဍုၚ်သ္အာၚ်တံဂှ်ဝွံ ဒှ်နဲကဲအလဵုအသဳပၞာန်အဆက်က်ကၠာတေံ ဒ္ဂေတ်ဗက်သုၚ်စောဲကၠုၚ်လဝ်ဏောၚ် မဒှ်ရ။

ဂကောံသုတေသန ISP-Myanmar ဂှ်လေဝ် စနူသၞာံ ၁၉၈၉ စဵုကဵုအပ္ဍဲသၞာံ ၂၀၂၃ အခိၚ်ဖျေံလဝ်ထံၚ် ဒဝ်အံၚ်သာန်သုကျဳ ဟွံသေၚ်မ္ဂး အခိၚ်စုတ်လဝ်ထံၚ်စာတ်ပ္ဍဲသ္ၚိတံဂှ် ကဵုလဝ်အခေါၚ်ဆဵုဂဗ ကုကလုတ်တမာန်ဍုၚ်သ္အာၚ်တံ ဟွံအောန်နူကဵု ၁၂ ဝါ နွံကီုလေဝ် ဟိုတ်နူပရေၚ်ဆဵုဂဗဏံတုဲ ပရေၚ်ဍုၚ်ကွာန်ဍုၚ်ဗၟာဝွံ နူကဵုအကြေပ်အဂြတ်ဂှ် ဟွံဂတးအာက္ဍိုပ် လ္ပာ်အပြံၚ်အလှာဲပၞော်တိတ်ပုဟ်ဂှ် သ္ဂးလဝ်ရ။

ညးမၞုံအခေါၚ်ဟီုဂး ရုၚ်သမ္မတအလဵုအသဳညဳသၟဟ်ဂကူ ဥူကျဝ်ဇြဝ်ဂှ် နကဵုကံၚ်ဇြဳပၞာန် ဗလးဒဝ်အံၚ်သာန်သုကျဳတုဲ ကၠောန်ပေါဲသဳကၠဳပတောံတံတုဲ သွက်ဂွံပ္တိတ်ပရဲပရေၚ်ဍုၚ်ကွာန်ဂှ် ဂ္စါန်ဒၟံၚ်ကီုလေဝ် နကဵုညး ပြဝမသ္ၚောဲခြာကဵု လ္တူညးဍုၚ်ကွာန်တံဂှ် ကၠောန်အာဟွံသေၚ်ပုဟ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“သွက်ပၠန်ဂတးက္ညၚ်ဂှ် မုမှသ္ဇက်ဒးဂွိၚ်ဟွံမွဲပုဟ်။ ကံၚ်ဇြဳပၞာန်ဂှ် ပြဝၚံက်စၞာဲနာနာသာ်ဂှ် ကၠောန်တွဵုရဏောၚ်။ ဒဝ်အံၚ်သာန်သုကျဳတံ ဥူဝေန်မျေတ်တံဂှ် ဗလးလေဝ်ဗလးမာန်ဏောၚ်။ ပလံၚ်ဏာ ဒၞါဲထံၚ်သ္ၚိတံလေဝ် ဒှ်မာန်ဏောၚ်။ လၟုဟ် ကၠောန်သ္ပပေါဲသဳကၠဳပ္တောံ ကုဂကောံထ္ပက်လဝ် စၟတ်တဲ NCA တံဂှ်တုဲ သွက်ဂွံပ္တိတ်ပရဲပရေၚ်ဍုၚ်ကွာန်ဂှ် ဂ္စါန်အာတွဵုဏောၚ်။ ဆ္ဂး ဒဝ်အံၚ်သာန်သုကျဳ ဂှ် လ္တူညးဍုၚ်ကွာန်တံဂှ် သစ္စနွံကွေံကွေံဏောၚ်၊ လ္တူဍုၚ်လေဝ် သစ္စနွံရ။ နကဵုညး ကမၠောန်မသ္ၚောဲ ခြာကဵု ညးဍုၚ်ကွာန်တံဂှ် ကၠောန်အာဟွံသေၚ်ပုဟ်ဟီုဂှ် ပိုယ်တံ ပတှ်ေစှ်ေစိုတ်ရ” သာ်ဝွံ ညးသ္ဂးရ။

အလဵုအသဳညဳသၟဟ်ဂကူ NUG ဂှ် ကေမ်ၛာပ်ကေတ် သၞောဝ်အစာံ တၚ်ရန်တၟံဖေဝ်ဒရာအနာဂတ်၊ တိုၚ်ပ္ကဴပၠန်ဂတး မဖျေံစၟတ်လဝ် ဗွဲမကိတ်ညဳကဵု တၚ်အာတ်မိက် ညးဍုၚ်ကွာန်တံဂှ်တုဲ ဒတူလိုၚ်အာ စဵုကဵုကလိဂွံပေါဲအံၚ်ဇၞး တဝ်ဝ်ရောၚ်ဂှ် သ္ပလဝ်ကတိရ။

မွဲလ္ပာ်ပၠန်ဂှ်လေဝ် သွက်ဂွံထ္မံက်ရုပ်ရဴ တၚ်တုပ်စိုတ်အာဇြဳယာန် (၅) သာ် မဖျေံစၟတ်လဝ် လလအ်ပွိုၚ် (၂) သၞာံဂှ် ဖ္တိုက်ဖ္အောဝ်ကၠုၚ်ဒၟံၚ်တုဲ သွက်ဂွံဂၠါဲသွဟ်ပရေၚ်ဍုၚ်ဗၟာ သွက်ဂွံအာပရေၚ်ဆဵုဂဗသဳကၠဳ ညးမဆက်စပ်သီုဖအိုတ်ပါလုပ်ဂှ် စိုပ်အခိၚ်ယျဂှ် ဝန်ဇၞော်ကာဍုၚ်သ္အာၚ် အေန်ဒိုဝ်နဳယှာ ဟီုပ္တိတ်လဝ်ရ။

သၞာဲဒဴပရေၚ်ဒပ်မွဲတၠ နူကဵုတမ်ဒပ်လၟိဟ် (၂၇) ခရိုၚ်ယေန်မာပေန် ရးသက်ကိုၚ်ဂှ် နကဵုကံၚ်ဇြဳပၞာန် ကြေပ်ဂြတ်ဒၟံၚ်တုဲ နဒဒှ်ပၞော်တိတ် ဗလးကဵုဒဝ်အံၚ်သာန်သုကျဳမာန်ကီုလေဝ် ဟိုတ်နူဒှ်သွဟ်ပၠန်ဂတးက္ညၚ်ဏံ ဟွံသေၚ်ဂှ်ရ ဒးလုပ်ဒၟံၚ်ပေါဲဗ္တိုက်ရပ်လွဟ်ဏီဏောၚ်ဂှ် ဟီုရ။

“ကံၚ်ဇြဳပၞာန်ပကီုပရာပ်ဂှ် ကလေၚ်ဗလးကဵု က္ဍိုပ်သ္ကိုပ်ညးဍုၚ်ကွာန်တုဲ ယဝ်ရကၠောန် ပေါဲသဳကၠဳပရေၚ်ဍုၚ်ကွာန်မ္ဂး လ္ပာ်ကံၚ်ဇြဳပၞာန် ကြေပ်ဂြတ်ဒၟံၚ်တုဲ ထ္မံက်လဝ် နဒဒှ်ပၞော်တိတ်မွဲရောၚ်ဂှ် ညာတ်ရ။ ဒှ်ဓနက် ကၠောန်သ္ပညံၚ်ပရေၚ်ပၠန်ဂတး ဆီဂွံပါ်ထ္ကးညးသ္ကအ်ဏောၚ်ဂှ် ညာတ်ရ။ ပ္ဍဲပၠန်ဂတးက္ညၚ်ဏံ ရမျာၚ်က္ညာၚ်ကမြဴ ညးဍုၚ်ကွာန်တံဂှ် ကံၚ်ဇြဳပၞာန်ပကီုပရာပ် မေန်အံၚ်လှာၚ်ဂှ် မိၚ်ဒၟံၚ်ရဏောၚ်။ ဗလးကဵု ဒဝ်အံၚ်သာန်သုကျဳမွဲဓဝ်ဂှ် ဒှ်သွဟ်ပၠန်ဂတးက္ညၚ်ဏံ ဟွံသေၚ်တုဲ သွက်ဂွံစိုပ် ဇရေၚ်ဖေဝ်ဒရာဒဳမဝ်ကရေဇြဳဂှ် ဒးလုပ်ဒၟံၚ်ပေါဲဗ္တိက်ရပ်လွဟ်တံဏီဏောၚ်” ဂှ် သ္ဂးရ။

အာယုက်ကာလကာတၟေၚ် ကံၚ်ဇြဳပၞာန်ဂှ်လေဝ် ပ္ဍဲဂိတုဂျူလာၚ် (၃၁) ဏံ အိုတ်ရဏောၚ်မဒှ်တုဲ ရုဲစှ်ကေတ် ဂၠံၚ်ဍာန်ဍိုန်ဍောတ်ဇိပ်ဂၠိပ်အိုတ်ဂှ်တုဲ ထပ်ပပဵုပ္တိုန်အာယုက်ကာလကာတၟေၚ်မာန်ဂှ် ညးခါတ်အကာဲပရေၚ်ဍုၚ်ကွာန်တံ သ္ၚဳဂၠိပ်ဒၟံၚ်အိုတ်ရ။

က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ်ဂှ်လေဝ် တုဲကၠုၚ်မွဲၜါတ္ၚဲဏံ ပ္ဍဲကဵုကောံဓရီအလဵုအသဳ ကၟိန်ဍုၚ်ဂှ် တၚ်နၚ်ကဵုက္ဍိုပ်တုဲ မ္ဒးကၠောန် သွက်ပရေၚ်ၜိုဟ်လလမ် ကေုာံ ပရေၚ်ညိၚ်ဝတ် အလုံမွဲကၟိန်ဍုၚ်ဂှ် နွံပၟိက်ဒၟံၚ်ဏီဂးတုဲ သွက်ဂွံထပ်ပပဵုပ္တိုန်အာယုက်ကာလကာတၟေၚ်ဂှ် ကဵုဒၟံၚ်ဒမြိပ်အရေဝ်ရ။

အတိုၚ်တၚ်နၚ် ဂကောံသုတေသန ISP-Myanmar တံဂှ်မ္ဂး အပ္ဍဲပၞာန်သီအဝဵုပွိုၚ် ၂ သၞာံဏံ အလုံမွဲကၟိန်ဍုၚ် ပေါဲဗ္တိုက်အပံၚ် ၉၅၀၀ ပြၚ် က္တဵုဒှ်လဝ်ရောၚ် ပ္ဍဲဂိတုဂျောန် (၃၀) တေံ လလောၚ်ပ္တိတ်လဝ်ရ။

ပရိုၚ်−သြၚ်လောန်တိုၚ်(မ်)

ဗီု−Social Media