ပ္ဍဲပရေၚ်ပံၚ်တောဲချဳဒရာၚ်ပၞာန်လှာဒကှ်ဂှ် လ္ပာ်ကံၚ်ဇြဳပၞာန် ဒးချိုတ်လဝ် (၅) တၠ ဒးလဝ်ဘဲဝပ် (၁၀) တၠ

လှာဒကှ်၊ ဂျူလာၚ်(၁၉)

ဗဒိုပ်ဗၠာဲသၟိၚ် သၟဝ်တဲကံၚ်ဇြဳပၞာန် သီုဌာနမဆေၚ်စပ်လ္ၚဵု မၞုံပ္ဍဲပွိုၚ်ဍုၚ်လှာဒကှ် တွဵုရးကရေၚ် ကေုာံ ကရောၚ်ပၞာန်ကံၚ်ဇြဳပၞာန်၊ ဗဒိုပၞာန်တအ်ဂှ် ပ္ဍဲပရေၚ်ချဳဒရာၚ်ပၞာန်ပံၚ်တောဲ ပွိုၚ်မွဲသတ္တာဟတုဲကၠုၚ်ဏံ လ္ပာ်ကံၚ်ဇြဳပၞာန် ဒးချိုတ်လဝ် (၅) တၠရဂှ် ဒပ်ချဳဒရာၚ်ပၞာန်တၟေၚ် S.O.F လလောၚ်တြးလဝ်ရ။

ဒပ်ပၞာန်ဗၠးၜးကောန်ဂကူကရေၚ် KNLA၊ ဒပ်ချဳဒရာၚ်ပၞာန်တၟေၚ် S.O.F၊ ဒပ်ဒရုမ် Cloud Wings ကေုာံ Federal Wings တအ် ပံၚ်တောဲတုဲ ဗတိုက်လဝ် ဗဒိုပ်ဗၠာသၟိၚ်သၟဝ် တဲကံၚ်ဇြဳပၞာန်၊ ရုၚ်ပရေၚ်အုပ်ဓုပ် နာနာ၊ မ္ၚးနူရုၚ်စရၚ်တိ မၞုံပ္ဍဲဍုၚ်လှာဒကှ်တုဲ ဗဒိုပ်ဆုဲပြံၚ်ကံၚ်ဇြဳပၞာန် ကေုာံ ကရောၚ်ပၞာန် ခမရ (၅၅၈)၊ ခမရ (၄၃၂) ကၠုၚ်ကဵုဒၟံၚ်ပၞာန်ရီု ဗဒိုပ်ဆုဲပြံၚ်တအ်ဂှ်ရ။

နူဂိတုဂျူလာၚ် စၟတ်တ္ၚဲ (၁၁) စဵုကဵုဂျူလာၚ် စၟတ်တ္ၚဲ (၁၆) ဒပ်ပံၚ်ကောံ KNLA တအ် သုၚ်စောဲဒရုမ်၊ လွဟ်ဇၞော်၊ လွဟ်ဍောတ်ဂကူစုၚ်တုဲ ဗတိုက်ပန်ပှော်လဝ်ဂှ် ကောန်ဒပ်ကံၚ်ဇြဳပၞာန် (၅) တၠ ဒးချိုတ်လဝ်တုဲ ဟွံအောန်နူ(၁၀)တၠ ဂွံလဝ်ဘဲဝပ်သ္ကာတ်မြဟ်ရ။

ပ္ဍဲပရေၚ်ချဳဒရာၚ်ပၞာန်ဂှ် ဗဒိုပ်ဗၠာဲသၟိၚ်လှာဒကှ်၊ ရုၚ်အုပ်ပရေၚ်ဓုပ်နာနာ ကေုာံ ရုၚ်စရၚ်တိတအ်လေဝ် သၠေက်သၠံၚ် လီုလာ်အာလဝ်ရဂှ် ဓမံက်လဝ် ပ္ဍဲတၚ်လလောၚ်တြးရ။

ပ္ဍဲပရေၚ်ဒပ်ပံၚ်ကောံတအ် ဗတိုက်ပန်လဝ် ဗဒိုပ်ဗၠာဲသၟိၚ်၊ ရုၚ်ပရေၚ်အုပ်ဓုပ်နာနာ ကေုာံ ရုၚ်စရၚ်တိ မၞုံပ္ဍဲဍုၚ်လှာဒကှ်ဂှ် ဒုအကြာပ်ဒပ်ဗၠာဲသၟိၚ်ၝောံဍုၚ်မွဲတၠ ဒးချိုတ်လဝ်တုဲ ကောန်ဒပ်ဗၠာဲသၟိၚ်မွဲတၠ ဂွံလဝ်ဘဲဝပ်သ္ကာတ်မြဟ်ရဂှ် ဂကောံအုပ်ဓုပ်ညးဍုၚ်ကွာန် ပွိုၚ်ဍုၚ်လှာဒကှ်လေဝ် လလောၚ်တြးလဝ်ရ။

ပ္ဍဲပရေၚ်ပန်ဗတိုက်ပန်ပှော်ဂှ် လ္ပာ်ဒပ်ကံၚ်ဇြဳပၞာန် ကၠုၚ်ဂြာတ်ထောံဖျေံဗုမ် ကဵုက္ၜၚ်ကျာကီု၊ ပန်ဖျေံလွဟ်ဇၞော် (၁၂၀ မမ)၊ (၈၁ မမ)(၆၀ မမ) ကြာန်ကြာန်တုဲ ကောန်သ္ဂံၚ်လ္ပာ်ဂကောံဇြဟတ် ပၠန်ဂတးတအ် ဒးလဝ်ဘဲဝပ်မွဲတၠတုဲ ပရေၚ်မကမ်လွဟ်လက်နက်ဆောံလေၚ် ဒးလီုလာ်လဝ် မမိက်ကဵုမွဲမွဲ ဟၟဲရဂှ် S.O.F လလောၚ်တြးလဝ်ရ။

ပ္ဍဲလ္ပာ်ကွာပုလိၚ် ဂကောံကွာန်ခလေဝ်တခေါန်ဒေၚ် ပွိုၚ်ဍုၚ်လှာဒကှ်ဂှ်လေဝ် ကရောၚ်ပၞာန်ကံၚ်ဇြဳပၞာန် ဇြဟတ်နွံ ဗ္ဒာဲ (၉၀)ဂှ် ဟိုတ်နူချဳဒရာၚ်ကၠုၚ်ပရေၚ်ပၞာန်ဂှ်ရ ပေါဲဗတိုက်ၜါလ္ပာ် သ္ကာတ်မြဟ်က္တဵု ဒှ်ကၠုၚ်လဝ်တုဲ ပ္ဍဲပေါဲဗတိုက်ဂှ်ကောန်အရာပ်ညးဍုၚ်ကွာန်လ္ၚဵုတအ် ဒးဒုၚ်ပြိုက်ဂစိုတ်လဝ် ကဵုကံၚ်ဇြဳပၞာန်တုဲ ကောန်အရာပ်ညးဍုၚ်ကွာန် ၜိုတ် (၂၀) တၠတအ်လေဝ် ရပ်ကေတ်ဏာလဝ် နဒဒှ်ဒေၚ်ဒုၚ်ဒၞာမၞိဟ်ရဂှ် ဂွံတီကေတ် နူဂကောံဇြဟတ်ပၠန်ဂတးတအ်ရ။

ပရိုၚ်-သြၚ်လောန်တိုၚ်(မ်)

ဗီုရုပ်- S.O.F