မတ်မလီု၊ ဂျူလာၚ် (၁၉)
ဟိုတ်နူပရေၚ်ကၟာတ်လဒဵု ကံၚ်ဇြဳပၞာန်သီအဝဵုတံဂှ်တုဲ ပရေၚ်ကူသာန်သွံရာန်ပယျဵု သေံ−ဗၟာၜါဍုၚ် ကြပ်ဒးဒေါအ်ဒေၚ်ကၠုၚ်ဒၟံၚ်တုဲ ဗၞိက်ပၠောပ်ကီု ဗၞိက်ပလံၚ်ပ္တိတ်ကီုဂှ် စဵုကဵုဟွံမွဲ အောန်ကၠုၚ်ဒၟံၚ်ယျဂှ် သၟာဗၞိက်ပယျဵုတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကံၚ်ဇြဳပၞာန်ဝွံ စနူသၞာံမံက်တုဲကၠုၚ်တေံတုဲ ရုပ်သီလာၚ်ဇြေန် ဗၞိက်ပၠောပ်၊ ဗၞိက်ပလံၚ်ပ္တိတ်တံဂှ်ကီု၊ သွက်ဗၞိက် မကဵုလဝ်အခေါၚ်ပၠောပ်ပ္တိုန် ဟွံဒေါအ်ဟွံဂွံတံဂှ် ကဵုအာတ်ပ္တိုန်လာၚ်ဇြေန်တၟိတံသၟးဟွံက လလောၚ်တြးလဝ် စေဝ်ပၞောန်တေၚ်ၚ်ဂြတ်တ် လ္တူကဏ္ဍဗၞိက်ပၠောပ်တံဂှ်ရ။
သ္အာၚ်နူဂှ်ပၠန် ကောန်ဂကောံဒပ်ကံၚ်ဇြဳပၞာန်တံကဵု ဂကောံပံၚ်ကောံ နူကဵုဌာနမဆေၚ်စပ်တံဂှ် ကပေါတ်ဗၞိက် မပၠောပ်ပ္တိုန်နၚ်တံဂှ် ကၟာတ်လဒဵုဂၠိုက်ဂၠါဲရပ်ဒက်တုဲ သီဂိုၚ်တံဂှ်ကီု၊ ကပေါတ်ဗၞိက် သ္ဂောံပလံၚ်ပ္တိုန် ဍုၚ်မွဲလ္ပာ်တေံဂှ် သၞောတ်ဗ္ၜတ်ကၟာတ်လဒဵုထောံဂှ်ကီု၊ ကပေါတ်ဗၞိက် မရပ်စပ်ဒၟံၚ် အပ္ဍဲဍုၚ်တံဂှ်လေဝ် ကၟာတ်လဝ်အခေါၚ်ပၠောပ်ပ္တိုန်တံရ။
သၟာဗၞိက်ပယျဵုမွဲတၠဂှ် ကံၚ်ဇြဳပၞာန်ဝွံ ပ္ဍဲကဵုဒၞါဲပၠောပ်ပ္တိုန်ကပေါတ်ဗၞိက်တြေံတြေံတံဂှ် စနူကဵုလာၚ်ဇြေန်ဗၞိက်ပၠောပ် ဗၞိက်ပ္တိုန် မၞုံဒၟံၚ်တုဲတုဲတံဂှ် ကၟာတ်လဒဵုလဝ်ဂှ်ရ က္တဵုဒှ်ကၠုၚ် စဵုကဵုပရေၚ်သွံရာန်ဗၞိက် သေံ−ဗၟာ ဒေါအ်ဒေၚ်ကၠုၚ်ရဂှ် ဟီုရ။
“ကပေါတ်ဗၞိက်သေံတံဂှ်တှ်ေ ဗွဝ်ဖျာတံဂှ်လီုတုဲ ပ္ဍဲကဵုပိုယ်တံဂှ် မုမှဟွံမွဲရပုဟ်။ လာၚ်ဇြေန်ဗၞိက်ပၠောပ်ဗၞိက်ပလံၚ်ပ္တိတ်ကၠာတေံတံ၊ ပါမေတ်တံ သီုဖအိုတ်ဂှ် ကၟာတ်ထောံအိုတ်ယျ။ ကပေါတ်ဒးပလံၚ်ဍုၚ်သ္အာၚ် ဗွဲမဂၠိုၚ်ဂှ် ဒေါအ်ဟွံဂွံမှ ဍေံတံကဵုတိတ်ရ။ လၟုဟ်ပြဟ်ဟ်ဏံဂှ် မုမှစှ်ေဟွံမာန်ဏီပုဟ် ဒှ်ဒၟံၚ်ရ။ ဒးမၚ်ရံၚ်ဒၟံၚ် အကာဲအရာဍေံတုဲ ဒက်ဂကောံတုဲ ဗက်စၟဳတ်ဒၟံၚ်ဂှ်ရ မုဗၞိက်သာ်လဵုမှ ဟွံလုပ်ရပုဟ်။ ဗၞိက်တိတ်လေဝ် ဟွံမွဲ၊ ဗၞိက်ပလံၚ်လေဝ် ဟွံမွဲပုဟ် ဒှ်ဒၟံၚ်ရ၊ ဗၞိက်ပလံၚ် ကဵု ဗၞိက်ပၠောပ်လေဝ် မုမှဟွံမွဲရပုဟ် ဒှ်ဒၟံၚ်ရ” သာ်ဝွံ သ္ဂးရ။
ဟိုတ်နူပရေၚ်ကၟာတ်လဒဵု ကံၚ်ဇြဳပၞာန်တံဂှ်တုဲ ပ္ဍဲကဵုပရေၚ်ကူသာန်သွံရာန်ပယျဵုတံဂှ် ဗွဝ်ဖျာဒမၠုက်တံ ဇၞော်ပၟဝ်ကၠုၚ်ဒၟံၚ်ဂှ်ရ အပ္ဍဲကာလခြာဟွံလအ်ဏံ ကပေါတ်ဗၞိက်သေံတံ ၚုဟ်တိုန်ကၠုၚ်ဒၟံၚ် ဂၠိုၚ်ကဵုဆတုဲ အပ္ဍဲကၟိန်ဍုၚ် ဒးဂဗကၠုၚ် ဗၞိက်စၞစသုၚ်သ္ဇိုၚ်အောန်စှ်ေတံမာန်ဂှ် သၟာဗၞိက်ပယျဵုတံ သ္ၚဳဂၠိပ်လဝ်ရ။
သၟာဗၞိက်ပယျဵုမွဲတၠဂှ်လေဝ် မူဝါဒ ကံၚ်ဇြဳပၞာန် မရပ်စပ်ဒၟံၚ် ပ္ဍဲကဵုပရေၚ်ကူသာန်သွံရာန် သေံ−ဗၟာဂှ်ဝွံ ကလေၚ်အာဒၟံၚ် သၞောတ်ပရေၚ်ပိုန်ဒြပ်ကၟာတ်တြၚ်ကၠာတေံရောၚ်ဂှ် ထံက်ထ္ၜးလဝ်ရ။
“ဍုၚ်ဗၟာဏံ ဗွဲကြဴမ္ဂး ဒးစကဝ်ကဵု သဂြာရဏောၚ်။ ဂွံစအာ ကပေါတ်တိတ်နူအပ္ဍဲဍုၚ်တံရဏောၚ်။ တိတ်နူဍုၚ်သ္အာၚ်တံဂှ် မုမှဟွံမွဲရပုဟ်။ ဗီုကဵုသၞောတ်ပရေၚ်ပိုန်ဒြပ်ကၟာတ်တြၚ် ကၠာတေံရ။ အပ္ဍဲဍုၚ် ၜိုတ်ပ္တိတ်မာန်ဂှ် ကဵုပ္တိတ်အပ္ဍဲဍုၚ်သၟးရဏောၚ်။ ဟိုတ်နူသၠုဲဍုၚ်သ္အာၚ်ဟွံမွဲတုဲ အခေါၚ်ပၠောပ်ပ္တိုန် သဂြာတံ မုတံ နူကဵုဍုၚ်သ္အာၚ်တံဂှ်လေဝ် ကၟာတ်ထောံယျဏောၚ်။ သုၚ်စောဲသဂြာ နူကဵုရုၚ်စက်ဍုၚ်ဇကုရဂးတုဲလေဝ်။ တိဗဳလာတ် နူကဵုဍုၚ်သ္အာၚ်တံ မုတံဂှ်လေဝ် ကၟာတ်လဝ်ရ။ ပ္ဍဲကဵုဍုၚ်ပိုယ်ဏံ ဟိုတ်နူရုၚ်စက်တိဗဳလာတ် နွံဒၟံၚ်ဂှ်ရ ဟီုထောံ ကဵုရပ်စပ်တိဗဳလာတ် နူကဵုဍုၚ်ဇကုရ။ ကပေါတ်ဗၞိက်မွဲမွဲ ပ္တိတ်နူကဵုဍုၚ်ဇကုဂွံမ္ဂး သုၚ်စောဲ ပ္ဍဲဍုၚ်ဇကု ကၠောန်လဝ်သာ်ဏံရ။ ယဝ်ရဍုၚ်ဇကုဂှ် ဍိုက်ဒကေဝ်ပေၚ်ၚ် ပ္တိတ်မာန်မ္ဂး ဟွံပရေံပုဟ်။ ဍာ်ဒကေဝ်ကပေါတ် ပ္ဍဲကဵုဍုၚ်ဇကုဂှ် ဟွံခိုဟ်တုဲ ပၟတ်နူကဵုရုၚ်ကလောန်ရုၚ်စက်တံလေဝ် ဟွံဂွံဒၟံၚ် လၟေၚ်ၚ်တုဲ ဗီုလဵုဂွံဂေတ်ဂြိပ်မာန်ဂှ်ရော” သာ်ဝွံ သ္ဂးရ။
ဆ္ဂး ပ္ဍဲကဵုလိက်ပရိုၚ် ကံၚ်ဇြဳပၞာန်ပ္တိတ် ပ္ဍဲကဵုဂိတုဂျူလာၚ် (၁၈) ဂှ် နူကဵုဂိတုဨပရဴ (၁) စဵုကဵုဂိတုဂျူလာၚ် (၁၄) ဂှ် ၚုဟ်မးကူသာန်သွံရာန် သေံ−ဗၟာ ဂှ် အမေရိကာန်ဒဝ်ဠာ ၅၃၉ ပြကောဋိကိုဋ်ပြၚ် နွံလဝ်တုဲ နူကဵုလ္ပာ်ဍုၚ်သေံဏံဂှ် ကပေါတ်ဗၞိက်စၞစသုၚ် ဗၞိက်အပြောံတံ ရာန်ကေတ်ဂၠိုၚ်ဒၟံၚ်ဂှ် ထ္မံက်ထ္ၜးလဝ်ရ။
သၟာဗၞိက်ပယျဵုတံဂှ် လၟိဟ်ဂၞန်ပယျဵုကံၚ်ဇြဳပၞာန် မထ္မံက်ထ္ၜးဒၟံၚ်ဂှ်ဝွံ ဒှ်ဆၜိုတ်လၟိဟ်ဍေံသၟးရတုဲ ပရေၚ်ကူသာန်သွံရာန် သေံ−ဗၟာဂှ်ဝွံ နူစဂိတုမေ သတ္တာဟလက္ကရဴအိုတ်တေံရ ကြပ်ဒေါအ်ဒေၚ်ဒၟံၚ်ယျရောၚ် ဟီုရ။
ပ္ဍဲကဵုပရေၚ်ကူသာန်သွံရာန်ဗၞိက်ပယျဵု ကံၚ်ဇြဳပၞာန် မလလောၚ်ပ္တိတ်လဝ်ဂှ်လေဝ် ပ္ဍဲကဵုကဏ္ဍဗၞိက်ပၠောပ်တံဂှ် ဒဝ်ဠာအမေရိကာန် ၃၆၅ ပြကောဋိကိုဋ် နွံဒၟံၚ်တုဲ ပ္ဍဲကဵုကဏ္ဍဗၞိက်ပလံၚ်ဂှ် ဒဝ်ဠာအမေရိကာန် (၁၆၅) ပြကောဋိကိုဋ်ပြၚ်ဓဝ် ကလိဂွံလဝ်ဂှ်ရ သြန်ကူသာန်သွံရာန်ဂှ် နွံပၟိက်ဒၟံၚ် (၂၀၀) ပြကောဋိကိုဋ် ဒဝ်ဠာအမေရိကာန်ရ။
ဍုၚ်ဗၟာဝွံ နူကဵုပယျဵု သေံ−ဗၟာဂှ် ဒးပၠောပ်ပ္တိုန်ဒၟံၚ် ဗၞိက်စၞစသုၚ်သ္ဇိုၚ်၊ ဗၞိက်ပယျေဝ်၊ ဂဥုဲဇဗ ကေုာံ ကပေါတ်ဗၞိက်အပြောံ အရပ်စပ်ပရေၚ်သိုၚ်ခၞံတံဂှ်တုဲ နူကဵုဏံဂှ် ပလံၚ်ပ္တိုန်ဒၟံၚ် ဍုၚ်သေံ မပ္တံကဵုဗၞိက်တိတ်နူပရေၚ်တဵုလွဳ၊ ထၜိုတ် ကေုာံ ကပေါတ်ဗၞိက်တိတ်နူဍာ်တံ မဒှ်ရ။
ပရိုၚ်−သြၚ်လောန်တိုၚ်(မ်)
ဗီု−CJ
sanlontai