မတ်မလီု၊ ဂျူလာၚ်(၂၀)
ဒပ်ပၞာန်သီအဝဵုဂှ် သ္ပပဓါန်ကုလွဟ်လက်နက်တုဲ ပၠံၚ်ကေတ်လဝ်အဝဵုကၟိန်ဍုၚ် နကဵုစိုတ်လောဘအဝဵု ညံၚ်ရဴဂလုံဥူသဝ်တုဲ သ္ပဗိုလ်အုပ်လဒံမံၚ်ရဂှ် ကံၚ်ဇြဳဖက်ဒရာဍုၚ်မန် ထ္မံက်ထ္ၜးလဝ် ပ္ဍဲလိက်သဝဏ်ပ္လံၚ်ဗ္စိုပ်လဝ် ဇရေၚ်အခန်ကၞာစၟတ်သမ္တီ တ္ၚဲအာဇာနဲ မရနုက်ကဵု(၇၆)ဝါဂှ်ရ။
ပွဂစိုတ်ဂယိုၚ်ပကီုပရာပ်ပျဲပျာံဒပ်ကံၚ်ဇြဳပၞာန် လ္တူညးဍုၚ်ကွာန်တံဂှ် အခိၚ်လၟုဟ်ဏံဂှ်တှ်ေ စိုပ်မံၚ်အကာဲအရာ ပရေံအိုတ်ယျဂှ် ကံၚ်ဇြဳဖက်ဒရာဍုၚ်မန် သ္ဂးရ။
ပ္ဍဲသၞာံ ၁၉၄၇၊ ဂိတုဂျူလာၚ် စၟတ်တ္ၚဲ(၁၉)ဂှ် ဟိုတ်နူပွပကီုပရာပ် ညးမိက်သ္ဂောံဂွံအဝဵု နဂၠံၚ်ကရတ် ဂလုံဥူသဝ်ကေုာံမၞိဟ်မွဲဂကောံတံတုဲ သ္ကိုပ်ဗိုလ်အံၚ်သာန်ကေုာံ က္ဍိုပ်သ္ကိုပ်အာဇာနဲ (၉)တၠတံ ဒးပြဟ်လလုဲလဝ်ဂှ် ပေၚ်ကၠုၚ်(၇၆)သၞာံဣရ။
အဃောဂစာန်မံၚ် သွက်သ္ဂောံအခေါၚ်ဗၠးၜးဂှ် သ္ဒးပြဟ်လလုဲအာလဝ်တုဲ ဝၚ်လၟေၚ်ဒဒှ်ပွမကၠတ်ဂစိုတ်ဏံဂှ် သှ်ေၜက်ကၠုၚ် နဒဒှ် ဝၚ်စၟတ်သမ္တီ ထေက်ကဵုသ္ဒးက္ဍုဟ်မၠေံတဴမွဲရောၚ်ဂှ် သ္ဂးလဝ်ရ။
ဟိုတ်နူပွကမၠောန်ပကီုပရာပ် ဒပ်ကံၚ်ဇြဳပၞာန် လ္တူညးဍုၚ်ကွာန်တံ ညံၚ်ရဴသၞတံကဵု ပွကမၠောန် က္ဍုဟ်မၠေံဂစိုတ်ဂယိုၚ်မံၚ် ဟွံတၞဟ်ခြာကဵုဝှေတ်သေတ်တံဂှ်တုဲ ညးဍုၚ်ကွာန်တံဂှ် ညံၚ်ဂွံဗၠးနူသၟဝ်သၞောတ်တၠအဝဵုဂှ်ကဵု ညံၚ်သ္ဂောံဒက်ပ္တန်အာ ကၟိန်ဍုၚ်အနာဂတ် ဖက်ဒရာဒဳမိုကရေဇြဳမာန်တုဲ ပၠန်ဂတးမံၚ်ရောၚ်ဂှ် ထ္မံက်ထ္ၜးပါလုပ်မံၚ် ပ္ဍဲလိက်သဝဏ်ဂှ်ရ။
ညံၚ်ကၟိန်ဍုၚ်ဖက်ဒရာဒဳမိုကရေဇြဳ ဗၠးၜးတုဲ ကဵုတဴအခေါၚ်အရာကောန်ဍုၚ်ဍာံစၟတ် ဍိုက်က်ပေၚ်ၚ်မာန်တံ ဂွံမံက်ဂတဝ်ဂှ်ကီု၊ သွက်ပရေၚ်ဗၠးၜးကောန်ဂကူတံဂှ် လုပ်အာပေါဲဗ္တိုက် မွဲကရောံ ကုညးဍုၚ်ကွာန် ပၠန်ဂတးမံၚ်တံ စဵုကဵုတၠအဝဵုပၞာန်သရိုဟ်စှ်ေရောၚ်ဂှ်လေဝ် ကံၚ်ဇြဳဖက်ဒရာဍုၚ်မန်ဂှ် ကဵုလဝ်သမ္တီရ။
ပရိုၚ်-သြၚ်လောန်တိုၚ်မ်
ဗီု-MSFC
sanlontai