ဟိုတ်နူဍာ်ဇၞော် တွဵုရးဍုၚ်မန်တုဲ ကောန်ၚာ်သၟတ် (၃) တၠ ချိုတ်တုဲ (၃) တၠ ကၠေံဒၟံၚ်၊ မၞိဟ်ဂၠိုၚ်ကဵုလ္ၚီ ဒးဒၟံၚ်ဘဲဍာ်

မတ်မလီု၊ ဂျူလာၚ် (၂၀)

ဟိုတ်နူဍာ်ဇၞော်ဍာ်ကလိုပ် အလုံမွဲတွဵုရးဍုၚ်မန်ဂှ်တုဲ ကောန်ၚာ်သၟတ် (၃) တၠ ချိုတ်တုဲ (၃) တၠ ကၠေံဒၟံၚ်တုဲ မၞိဟ်ဒးဘဲဍာ် နွံဒၟံၚ် ဂၠိုၚ်ကဵုလ္ၚီရောၚ်ဂှ် ညးဒေသတံကု ဂကောံရီုဗၚ်ဟံၚ်ပြာ်မှာဇန်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

တုဲကၠုၚ် ပ္ဍဲဂိတုဂျူလာၚ် (၁၈) အခိၚ်နူဂယးဂှ်တုဲ ပ္ဍဲကဵုပွိုၚ်ဍုၚ်ရေဝ်၊ ဇြပ်ဗု၊ ၜါသွာၚ်၊ မတ်မလီု ကေုာံ ပွိုၚ်ဍုၚ်ပံၚ် မၞုံတွဵုရးဍုၚ်မန်ဂှ် ဟိုတ်နူဗြဲဂူလဝ် ဗွဲမသ္ကာတ်မြဟ်ဂှ်ရ ဍာ်ဇၞော်ဍာ်ကလိုပ် က္တဵုဒှ်လဝ်တုဲ ဂၠံၚ်ကွဳစက်ဍာ်ဗၠိုက် ကေုာံ ဒဵုလာ်တံ က္တဵုဒှ်လဝ်ရ။

ဟိုတ်နူဍာ်ဇၞော်ဍာ်ကလိုပ်တုဲ ကောန်ၚာ်သၟတ် မွဲသၞာံဘာ်မွဲတၠ နူကဵုအရာပ်သဳရိမၚ်္ဂလာ ဍုၚ်မတ်မလီုဂှ်ကဵု ကောန်ၚာ်သၟတ် နူကဵုအရာပ်သဳရိမျာၚ် ၂ တၠ ချိုတ်တုဲ ၂ တၠ ကၠေံဒၟံၚ်ရ။

ညးဍုၚ်ကွာန်ဒးဘဲဍာ် လ္တူဍုၚ်မတ်မလီု ၜိုတ် (၆၀၀) ပြၚ်ဂှ် ဒးပဆုဲပြံၚ်လဝ် ပ္ဍဲဘာလကျာ်တံကဵု ဇြပ်သ္ဘၚ်ဓဝ်အရာပ် ဒၞါဲဗၠးဘဲဍာ်တံ ကာတၟေၚ်ရ။

ညးတာလျိုၚ်မွဲတၠ နူကဵုဂကောံရီုဗၚ်ဟံၚ်ပြာ်မှာဇန် ဍုၚ်မတ်မလီုဂှ် ဟီုလဴထ္ၜးလဝ် အကာဲအရာဍာ်ဇၞော် သာ်ဏံရ။

“လၟုဟ်ဂှ်တှ်ေ လ္ပာ်သဳရိမျာၚ်၊ (တောၚ်ဝိုၚ်း) ၊ လ္ပာ်ဇြေဂျဵု၊ ဇြေယျာမျာၚ်၊ အဓိကဂှ်တှ်ေ လ္ပာ်(ငန်းတေး) တံဂှ် ဍာ်ဇၞော်က္တဵုဒှ်ဒၟံၚ်ရ။ ပ္ဍဲကဵုဇြပ်သ္ဘၚ်ဓဝ် ဇြေဂျဵုဂှ်မွဲ၊ ပ္ဍဲကဵုအမက လၟိဟ် (၁) ဇြေယျာမျာၚ်ဂှ် မွဲ၊ လၟုဟ် (၂) ဒၞါဲဏံဂှ် အဲထေၚ်ဂှ်တှ်ေ ၜိုတ် (၂၀၀) နွံဏောၚ်။ ပ္ဍဲကဵုညံၚ်ပေန်သုက်ဂှ် ဟိုတ်နူကၟာၚ်ဍိုတ်သရိုဟ် စှ်ေတုဲ မွဲတၠ ကလိဂွံအာဝပ်။ ပ္ဍဲကဵုသဳရိမၚ်္ဂလာဂှ် ကောန်ၚာ်မွဲတၠ ဗၠိုက်ဍာ်တုဲ ချိုတ်အာဂှ် ဟီုဒၟံၚ်ရ။ လၟုဟ် ဍာ်ဂှ် သှ်ေဒၟံၚ်ဏီဏောၚ်။ ပ္ဍဲသဳရိမျာၚ်၊ ယှိုဲမျာၚ်သဳရိ၊ လ္တူဂၠံၚ်သဳရိမျာၚ်တံဂှ်တှ်ေ ဍာ်ဂှ် နွံဒၟံၚ်ၜိုတ်ကၟံၚ်ဖိုဟ်ဏီဏောၚ်” သာ်ဝွံ သ္ဂးရ။

ဟိုတ်နူဗြဲဂူဒၟံၚ် ဟွံပိုတ်သ္ကုတ်ဂှ်ရ ပ္ဍဲကဵုအရာပ်ညံၚ်ပေန်သုက် မတ်မလီုဂှ် စမြိုၚ်၊ ကၟာၚ်ဍိုတ်တံ သရိုဟ်စှ်ေအာလဝ်ဂှ်ရ မၞိဟ်ဗြမွဲတၠကဵု မၞိဟ်တြုံမွဲတၠ ကလိဂွံလဝ်ဝပ်ရ။

ဒဵုလာ် ပ္ဍဲကွာန်ညံၚ်လာန် ပွိုၚ်ဍုၚ်ၜါသွာၚ်ဂှ် သ္ၚိမွဲမ လီုလာ်အာလဝ်တုဲ ဟိုတ်နူလၟေၚ်ဒဒှ်ဒဵုလာ်ဏံဂှ်တုဲ ညးဒေသနူကဵုသ္ၚိဒၟံၚ် အန္တရာယ်မၞုံမာန် (၇) မတံဂှ် ဆုဲပြံၚ်လဝ် ဇရေၚ်သ္ၚိမသကလောကောဒေံ ဒၞါဲဗၠးဘဲတံရောၚ်ဂှ် ဂွံတီကေတ်ရ။

ဟိုတ်နူဍာ်ဇၞော်ဍာ်ကလိုပ် ပွိုၚ်ဍုၚ်မုဟ်ဍုၚ်ဂှ်တုဲ ညးဍုၚ်ကွာန်ဒေသ နူကဵုအရာပ်သဝ်ဝ်လ္ၚဵုတံ ၜိုတ် (၂၀၀) ပြၚ်ဂှ် ဆုဲပြံၚ်ကဵုလဝ် ပ္ဍဲဘာလကျာ် ဒၞါဲမကြပ်တံဂှ်ရောၚ် ညးတာလျိုၚ် ဂကောံရီုဗၚ်ဟံၚ်ပြာ်ပွိုၚ်ဍုၚ်မုဟ်ဍုၚ်မွဲတၠ ဟီုရ။

“လၟုဟ် ဍာ်ဇၞော်ဒၟံၚ်ဟီုဂှ် လ္ပာ် (မြို့မ ၄) ဍုၚ်မုဟ်ဍုၚ်၊ လ္ပာ်(ပိတောက်ရွှေဝါ) ၊ တုဲတှ်ေ လ္ပာ် (အောက်ကျင်း) ကော်စသာ်ဏံဂှ် လ္ပာ်တံဏံ ဗၠိုက်တုဲ လ္ပာ်(ဝင်းကပို) ဂှ် ဍာ်ဂှ်တိုန်ဒၟံၚ်ရ။ ဆ္ဂး စဵုကဵုဒးပလံၚ်ပုၚ်ဂှ် အကာဲအရာဟွံပရေံဏီ။ နူဏေံ ၜိုတ်ဇိုၚ်သဝ်တ္ၚဲ (၃) နာဍဳကဝိုက် (၄) နာဍဳဂှ် ပ္ဍဲကဵုဒဒန် စှ်ေလ္ပာ်ကြုၚ်ဖာ်ဂှ် ဍာ်ကၠောံအာမွဲတဲ။ ဂၠံၚ်ကၟာတ် ယာန်ဆိုအ်ဗဂှ် ဒှ်အာ ၜိုတ်ဘာ်နာဍဳ၊ မွဲနာဍဳပြၚ်ရ။ ဗြဲကလေၚ်သာအာညိညတုဲ ဍာ်ကလေၚ်စှ်ေအာရ။ လၟုဟ်ဂှ် နူဏေံတေံမှ ဍာ်စဗၠိုက်တုဲ ဘာလကျာ်မွဲဘာမ္ဂး ညးဒးဘဲဍာ်တံ ၜိုတ် (၄၅) (၅၀) သ္ၚိဂှ် ဆုဲပြံၚ်လဝ်တုဲယျ။ အဂှ်ဂှ် ပြဟ်ဟ်ဏံ မၞိဟ် ၜိုတ် (၂၀၀) စိုပ်ဒၟံၚ်ဏောၚ်” သာ်ဝွံ သ္ဂးရ။

ပ္ဍဲကဵုဍာ်ဇၞော် ပွိုၚ်ဍုၚ်ရေဝ်ကဵု ပွိုၚ်ဍုၚ်ဇြပ်ဗုတံဂှ် ညးဍုၚ်ကွာန်ဒးဘဲဍာ် ၅၀၀ ပြၚ်ဂှ် ဒးဆုဲပြံၚ်လဝ် ပ္ဍဲဘာလကျာ်တံကဵု ဒၞါဲလ္ပာ်ကုန်သၠုၚ်ၚ် ဗၠးဘဲဍာ်တံဂှ်ရ။

ဆ္ဂး ညးဍုၚ်ကွာန်ဒးဘဲဍာ်တံဝွံ ကလိဂွံအရီုဗၚ် နူကဵုကံၚ်ဇြဳပၞာန်တံဟွံမွဲတုဲ ဒးဆုဲပြံၚ်ဒၟံၚ် ဗီုညးကုညးရောၚ်ဂှ် ဂွံတီကေတ်ရ။

“ပရေၚ်ဟံၚ်ပြာ်တံဂှ်တှ်ေ နူကဵုဂကောံတေံဂကောံဏံရ ဒးဗက်ရီုဒၟံၚ် ပ္ဍဲကဵုအရာပ်တံရ။ ပ္ဍဲကဵုကွာန်ဍာ်ဗၠိုက်ဒၟံၚ် ဍုန်စပုၚ်ဟွံဂွံတံဂှ် ပရအ်ကဵုဒၟံၚ် ပုၚ်ဂွဳတံရ။ ပြဟ်ဟ်ဏံ မၞိဟ်ဒးဆုဲပြံၚ်ဂှ်လေဝ် နွံဒၟံၚ်ရ။ ပလေဝ်ပလေတ်လဝ်ဒၞါဲဟွံမွဲတုဲ ညးတံ ဆုဲပြံၚ်ဟွံဂွံပုဟ် ဒှ်ဒၟံၚ်ရ” သာ်ဝွံ ညးတာလျိုၚ် ဂကောံရီုဗၚ်ဟံၚ်ပြာ် ပွိုၚ်ဍုၚ်ဇြပ်ဗုမွဲတၠ ဟီုရ။

ပ္ဍဲကဵုပရေၚ်ဍာ်ဇၞော်ဍာ်ကလိုပ် ပွိုၚ်ဍုၚ်ပံၚ်ဂှ် ဂၠံၚ်ကာ ဍာ်ဗၠိုက်က္တဵုဒှ်လဝ်တုဲ ပ္ဍဲကဵုဂိတုဂျူလာၚ် (၁၈) အခိၚ်လဒေါဝ်တ္ၚဲဂှ် မၞိဟ်တြုံမွဲတၠ စှ်ေဟံၚ်အှော် ပ္ဍဲကဵုကြုၚ် ကွာန်(ဥတ္တံတား) ဂှ် ဟဳဗက်အာဍာ်တုဲ ကၠေံဒၟံၚ်ရောၚ် ညးဒေသတံ ဟီုရ။

တွဵုရးဍုၚ်မန်ဝွံ လၟေၚ်ၚ်သၞာံ ဒးဆေၚ်ဒၟံၚ်မုက် ကုပြသၞာဘဲသဘာဝ ဍာ်ဇၞော်ဍာ်ကလိုပ်တံဂှ်တုဲ ပ္ဍဲကဵုဍာ်ဇၞော်ဍာ်ကလိုပ် ကေုာံ ဒဵုလာ် မက္တဵုဒှ်လဝ် နူကဵုသၞာံ ၂၀၁၉ တုဲကၠုၚ်တေံဂှ် ညးဒေသ ဗ္ဒါဲ (၇၀) တၠ ချိုတ်အာလဝ်ရောၚ် ဂွံတီကေတ်ရ။

ပရိုၚ်−သြၚ်လောန်တိုၚ်(မ်)

ဗီု−Bo Bo Win