ပ္ဍဲပေါဲဗ္တိုက်ဘာပန် KNU ဂှ် လ္ပာ်ကံၚ်ဇြဳပၞာန် ဇီုကပိုက်ပြဟ်လလုဲဂၠိုၚ်ဒၟံၚ်

ဘာပန်၊ ဂျူလာၚ် (၂၀)

ပ္ဍဲကဵုခရိုၚ်ဘာပန် ဗော်သွးကောန်ဂကူကရေၚ် KNU ဂှ် အကြာဒပ်ကံၚ်ဇြဳပၞာန်ကဵု ဒပ် KNLA တံဂှ် အပ္ဍဲဘာ်ဂိတု ပေါဲဗ္တိုက်အပံၚ် (၁၆၀) ပြၚ် က္တဵုဒှ်လဝ်တုဲ လ္ပာ်ဒပ်ကံၚ်ဇြဳပၞာန် ဗ္ဒါဲ (၅၀) ချိုတ်အာလဝ် ရောၚ် ဌာန်ဂအုပ်ဒပ်မဟာ (၅) KNU တံ လလောၚ်ပ္တိတ်လဝ် ပ္ဍဲဂိတုဂျူလာၚ် (၁၉) တေံရ။

ပ္ဍဲကဵုခရိုၚ်ဘာပန် KNU ဂှ် နူစဂိတုဂျူလာၚ် (၁) စဵုကဵု (၁၅) အကြာဒပ်ကံၚ်ဇြဳပၞာန်ကဵု ဒပ်ပၞာန်ဗၠးၜး ကောန်ဂကူကရေၚ် KNLA တံဂှ် ပေါဲဗ္တိုက်အပံၚ် (၁၆၅) ဝါ က္တဵုဒှ်လဝ်တုဲ အပ္ဍဲပေါဲဗ္တိုက်ဂှ် လ္ပာ်ဒပ်ကံၚ်ဇြဳပၞာန် (၄၉) တၠ ချိုတ်တုဲ (၃၂) တၠ ဇီုကပိုက်ကလိဂွံလဝ်ဝပ်ရောၚ် ပါလုပ် ပ္ဍဲတၚ်လလောၚ်တြးဂှ်ရ။

သ္အာၚ်နူဂှ်ပၠန် သီုကဵုပန်ပှော်လဝ် ချေံ (၁၆) မသုၚ်စောဲဒၟံၚ် ပ္ဍဲအရာပလံၚ်ဗစိုပ်ဇွောံမ ဒပ်ကံၚ်ဇြဳပၞာန်တံဂှ် တုဲ အပ္ဍဲပေါဲဗ္တိုက်မက္တဵုဒှ်လဝ် အပ္ဍဲဂိတုဂျူလာၚ် ဘာ်ဂိတုဂှ် လ္ပာ်ဂကောံဒပ် KNLA မွဲတၠ ကလိဂွံလဝ်ဝပ်ရောၚ် ဒပ်မဟာ (၅) လလောၚ်ပ္တိတ်လဝ်ရ။

အပ္ဍဲခရိုၚ်ဘာပန်ဂှ် ပေါဲဗ္တိုက်ၜါလ္ပာ်တံ က္တဵုဒှ်ဒၟံၚ်ဟွံပိုတ်သ္ကုတ်တုဲ ပ္ဍဲဂိတုဂျူလာၚ် (၂) ဂှ် ဒပ်ကံၚ်ဇြဳပၞာန် ဟိုတ်နူပန်ပှော်စုတ်လဝ် ပ္ဍဲကွာန်မေဝ်ခူ၊ ဂကောံကွာန်မေဝ်ခူ၊ ပွိုၚ်ဍုၚ်ဘူတိုဝ်တံ နကဵုလွဟ်ဇၞော် (၁၂၀ မမ) (၃) မဂှ်တုဲ ဟိုတ်နူပရေၚ်ပန်ပှော်လွဟ်ဇၞော် BGF တံတုဲ သ္ၚိဒၟံၚ်ညးဒေသမွဲတၠ နူကဵုကွာန် (သေခိုကလား) မွဲမလေဝ် ဇီုကပိုက်လီုလာ်အာလဝ်ရ။

တုဲကၠုၚ် ပ္ဍဲဂိတုဂျူလာၚ် (၅) တေံဂှ်လေဝ် ဒပ်ကံၚ်ဇြဳပၞာန် ကၠုၚ်စိုပ်ဂြာတ်လဝ်မခတိုဟ် (၁၂) မ ပ္ဍဲကွာန်လေဝ်နာဒါ၊ ဂကောံကွာန်ပေကေဒါ၊ ပွိုၚ်ဍုၚ်လူတဝ်၊ ခရိုၚ်ဘာပန်တံ နကဵုက္ၜၚ်ကျာတံဂှ်တုဲ သ္ၚိဒၟံၚ် စဵုကဵု (၂) မ ဇီုကပိုက်လီုလာ်အာလဝ်ရောၚ် ဂွံတီကေတ် အတိုၚ်တၚ်လလောၚ်တြး ဂအုပ်ဌာန်ပရိုၚ် ဒပ်မဟာ (၅) တံရ။

ပရိုၚ်−သြၚ်လောန်တိုၚ်(မ်)

ဗီု−KNU