ပ္ဍဲကအ်ကြိက် လွဟ်ဇၞော်ဒတုံစှ်ေတုဲ ကောန်အရာပ် ၇ တၠ ဒးတုဲကလိဂွံဝပ်

ကအ်ကြိက်၊ ဂျူလာၚ် (၂၀)

ဟိုတ်နူလွဟ်ဇၞော် ဒတုံဗ္တိုဟ်ထ္ကးအာလဝ် လ္တူဍုၚ်ကအ်ကြိက် တွဵုရးကရေၚ် မလလောၚ်တြးလဝ် ပရေၚ်အုပ်ဓုပ်ပၞာန်ဂှ်တုဲ ညးဍုၚ်ကွာန်ကောန်အရာပ် ၇ တၠ ဒးတုဲကလိဂွံလဝ်ဝပ်ဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ပ္ဍဲဂိတုဂျူလာၚ် ၁၉ အခိၚ်နူဂယး ၇ နာဍဳဂှ် ဂကောံဒပ်ပံၚ်ကောံ KNLA တံ လုပ်စိုပ်ဗ္တိုက်လဝ် ကောန်ဒပ်ကံၚ်ဇြဳပၞာန် မဖျေံလဝ်ဒပ် ပ္ဍဲကဵုသၞေဟ်ကၚ် (ခနိမ့်မူး) စၟတ် (၃) ကဵု ပ္ဍဲကဵုဒၞါဲရုၚ်ဂကောံဒပ်ဗၠာဲသၟိၚ်ခရိုၚ်၊ ခလရ (၉၇) ကံၚ်ဇြဳပၞာန် ဖျေံသ္ဇိုၚ်ကအ်ကြိက်တံဂှ်ရ။

ဟိုတ်နူပရေၚ်ဗ္တိုက်ဏံတုဲ ပရေၚ်ပန်ပှော်ၜါလ္ပာ် က္တဵုဒှ်လဝ် ပွိုၚ်မွဲနာဍဳပြၚ်တုဲဂှ် လွဟ်ဇၞော် ဒတုံဗ္တိုဟ်ထ္ကးအာလဝ် အပ္ဍဲဍုၚ်ကအ်ကြိက်ရ။

ဟိုတ်နူလွဟ်ဇၞော် ဒတုံဗ္တိုဟ်ထ္ကးအာလဝ်ဂှ်ရ ညးဍုၚ်ကအ်ကြိက် ဒၟံၚ်အရာပ် စၟတ် (၇) ဥူရူပါ၊ ဥူတုၚ်ဝေန်၊ ဒဝ်ယှိုဲတံဂှ်ကီု၊ ဒၟံၚ်အရာပ် စၟတ် (၂) ဒဝ်တာန်န်၊ ဒဝ်လှမျေတ်တံကီုဂှ် မၞိဟ်တြုံ (၃) တၠ၊ မၞိဟ်ဗြဴ (၄) တၠ ဇီုကပိုက်ကလိဂွံလဝ်ဝပ်ရ။

ညးဍုၚ်ကွာန်ကောန်အရာပ် ဇီုကပိုက်ကလိဂွံလဝ်ဝပ်တံဂှ် ပလံၚ်ဗစိုပ်လဝ် ရုၚ်ဂဥုဲညးဍုၚ်ကွာန်ကအ်ကြိက် နကဵုအရီုဗၚ် ဂကောံရီုဗၚ်ဟံၚ်ပြာ်မှာဇန်တံရောၚ်ဂှ် ဂွံတီကေတ်ရ။

အပ္ဍဲပေါဲဗ္တိုက်ၜါလ္ပာ်ဂှ် မ္ၚးနူဒပ်ကံၚ်ဇြဳပၞာန်ဂှ် လ္ပာ်ဂကောံဒပ်ပံၚ်ကောံ KNLA, PDF တံလေဝ် ကလိဂွံလဝ်ဝပ်တံ နွံဒၟံၚ်ရောၚ် ဂွံတီကေတ်ကီုလေဝ် အကာဲအရာဗလးတိ ဗွဲလစှ်ေ ဂှ် နကဵုသြၚ်လောန်တိုၚ်(မ်) ဆက်ဂၠိုက်ဂၠါဲဒၟံၚ်ဖိုဟ်ရ။

တုဲကၠုၚ် ပ္ဍဲဂိတုမေတေံဂှ်လေဝ် ဟိုတ်နူလွဟ်ဇၞော် ဒတုံဗ္တိုဟ်ထ္ကးအာလဝ် အပ္ဍဲဍုၚ်ကအ်ကြိက်ဂှ်ရ သမ္ဘာတၠသ္ၚိၜါတၠ စဴကၠုၚ်နူကဵုပါဲဒဴဘဲပၞာန်ဂှ် ဒးလွဟ်ဇၞော်တုဲ ချိုတ်ဒၟံၚ်ဂှ် ဂွံတီကေတ် ဇရေၚ်ညးဒေသတံရ။

ပရိုၚ်−သြၚ်လောန်တိုၚ်(မ်)

ဗီု−ချာန်နေဝ်တြးဝါဒကံၚ်ဇြဳပၞာန်