ဂျေရုသလေန်၊ ဂျူလာၚ် (၂၀)
ပေါဲထ္ၜးဆန္ဒ အပ္ဍဲဍုၚ်တံ ယဝ်ရဇၞော်ကၠုၚ်မ္ဂး အလဵုအသဳအေဿရေဝွံ သွက်ဂွံကလေၚ်လဟဵုပ္တိုန် သွာၚ်စဳရေၚ်သၞောဝ်ဓဝ်ဂှ် သ္ဇက်ဂွံကလေၚ်ချပ်ဗ္စာ ပရေၚ်လညာတ်ဟွံတုပ်သၟဟ်တံနွံဂှ် ဝန်ဇၞော်မွဲတၠ နူကဵုဂကောံအလဵုအသဳဂှ် ဟီုဂးလဝ် ပ္ဍဲဂိတုဂျူလာၚ် (၁၉) တေံရ။
ကၠုၚ်စိုပ် ပ္ဍဲဂိတုဂျူလာၚ် (၂၃) ကဵု (၂၄) ဏံ ဟိုတ်နူတၚ်ပလေတ်ပလေတ် သ္ဂောံသၞောတ်ဗ္ၜတ် အဝဵုအာဏာ ဂအုပ်ရုၚ်သၞောဝ်ဓဝ်ဂှ်တုဲ ပေါဲထ္ၜးဆန္ဒတံ သ္ကာတ်မြဟ်ကၠုၚ်ဒၟံၚ်ရ။ အခါလၟုဟ် အခိၚ်ပါလက်သတိုၚ် ကေုာံ လက်ဘနန်တံ ဟွံညိၚ်ဝတ်က္တဴက္တာန်ကၠုၚ်ဒၟံၚ်ဂှ် ကောန်ဒပ်အရန်ဒပ်ကျာ သ္ကဵုဇီုကပိုက်တဴ ပရေၚ်ဂီုကၠီုအေဿရေမာန်တံဂှ်လေဝ် ပါလုပ်ကၠုၚ်ကီုရ။
သ္ကိုပ်ဝန်ဇၞော် ဗေန်ဂျမေန် နေတာန်ယျာဟုဂှ် သၞောဝ်ဂမျိုၚ်ဏံဂှ်ဝွံ အတိုၚ်စဳဇန်လဝ်ဂှ် အံၚ်ဇၞးအာရောၚ် ပ္ဍဲဂိတုဂျူလာၚ် (၁၇) တေံ တက်လဝ်ကျာ ကုသမ္မတအမေရိကာန် ဂျဵုဗိုၚ်ဒေန် နကဵုဖုၚ်ရ။
ၜိုန်ဂှ်ကီုလေဝ် သွက်ပရေၚ်ပြုပြေၚ်ပြံၚ်လှာဲဂတဏံဂှ် ကေတ်အာတၚ်တုပ်စိုတ် သၠဲသၠဲလးလးရောၚ်ဂှ် ညးကဵုကသပ် ပရေၚ်ဂီုကၠီုကောန်ဂကူအေဿရေ ဟီုဂးလဝ်ရ။
ကြဴနူပ္တိတ်ထောံ ဝန်ဇၞော်ကာစဵုဒၞါအေဿရေ နူကဵုကဆံၚ်ဌာနန္တရညးတုဲဂှ် သ္ကိုပ်ဝန်ဇၞော် နေတာယျာဟုဂှ် နဒဒှ်ပွမသ္ပစၟတ်သမ္တီတၟေၚ်ၚ် လ္တူအသိၚ်အလိုန် ပေါဲထ္ၜးဆန္ဒ ပွိုၚ်တြဴဂိတု စနူဂိတုမာတ်ချ်တေံဂှ် ပအပ်ဒုၚ်ကဵုလဝ် ဝန်ဇၞော်ယေန်သၞာၚ် မေတ်ကဳဇြိုဝ်ဟာရ။
နေတာယျာဟုဝွံ ပ္ဍဲကဵုပရေၚ်ပလှ်ဖျေံ ဝန်ဇၞော်ကာစဵုဒၞါဂှ် ထံက်လဝ်ဂလာန်တုဲ သၞောဝ်သ္ဂောံကၠောန်အာ ပေါဲသဳကၠဳ သွက်ဂွံကဵုကေတ် ကုညးဒစဵုစးတံဂှ် ဒေါအ်ဒေၚ်လဝ်ရ။ ဂိတုတုဲကၠုၚ်တေံ ညးဝွံ ဒဒှ်ရပရေၚ်တောတက်ဟွံမွဲ လလောၚ်တြးလဝ်တုဲ ကလေၚ်ပၠောပ်လဝ်လမျီု ကုသၞောဝ်ဒမျိုၚ် မသၞောတ်ဗ္ၜတ်လဝ် အခေါၚ်အဝဵု ဂအုပ်ရုၚ်သၞောဝ်ဓဝ် ညံၚ်တၚ်သ္ဂုတ်သွာတ်အလဵုအသဳလ္ၚဵု ဂွံလီုလာ်အာဂှ်ရ။
“ပေါဲထ္ၜးဆန္ဒ ဂွံဆဵုညာတ်လဝ် ပ္ဍဲကဵုဗ္တံဂဝ်ဠာတ်ဂှ် ယဝ်ရစိုပ်အာဗၞတ်ဗ္ၜတ်မွဲမွဲမ္ဂး အရာရာအိုဿီု သ္ၚောဲအာယျဟီုဂှ် ကၠိုဟ်ကၠုၚ်ဏောၚ်” သာ်ဝွံ ဝန်ဇၞော်ယေန်သၞာၚ် ဇြိုဝ်ဟာ ဟီုလဝ် ပ္ဍဲကာန်ရေဒဳယောရ။
ညးမထံက်ဂလာန် အပြံၚ်အလှာဲ နူကဵုဂကောံပံၚ်ကောံ ပရေၚ်ဘာသာ−ပရေၚ်ကောန်ဂကူ သ္ကိုပ်ဝန်ဇၞော် နေတာယျာဟုတံဂှ် နကဵုဂအုပ်ရုၚ်သၞောဝ်ဓဝ် လုပ်ပလာပ်ပထုဲအကြာ လောန်ၜက်အာယျဂှ် ဟီုဂးလဝ်ရ။
ကၠတ်ထဝ်ပါလဳမာန် နူကဵုအလဵုအသဳ ကေုာံ ကၟိန်ဍုၚ် ဟွံမွဲကဵုသၞောဝ်သ္ဇိုၚ်ဒက်ပ္တန်ဍုၚ်တံ မအုပ်ဓလီုလဝ်ဂှ်ဝွံ ပ္ဍဲအရာစဵုဒၞါ အခေါၚ်ဗၠးၜး ကေုာံ အခေါၚ်ကောန်ဍုၚ်တံဂှ် ဂအုပ်ရုၚ်သၞောဝ်ဓဝ် မပါလုပ်ဒၟံၚ် နူကဵုအခန်ကဏ္ဍ ပၟိက်ဇၞော်တံဂှ် သ္ကဵုဇြဟတ်ဍိုန်လျအာရောၚ် ညးဒစဵုဒစးဂမၠိုၚ် ဂွိၚ်ဂွါဲဒၟံၚ်အိုတ်ရ။
ညးစဳဇန်ပေါဲထ္ၜးဆန္ဒတံဂှ် အပ္ဍဲပေါဲထ္ၜးဆန္ဒတံဂှ် စန်ဒက်ဂွံလဝ် မၞိဟ်ဂၠိုၚ်ကဵုကၠံရောၚ် ဟီုတဴရ။ သၞေဟ်ကွဳပၟတ်၊ သၞေဟ်က္ၜၚ်ကျာ ဗေန်ဂူရဳယာန်၊ ဂၠံၚ်ဇၞော်တံ ပိုတ်အာလဝ်တုဲ ပေါဲထ္ၜးဆန္ဒ မဆေၚ်ဒၟံၚ်မုက် ကုဂကောံဒပ်ဗၠာဲသၟိၚ်တံ ကရောံဥတုက္ညၚ်က္တဴက္တဴဂှ်လေဝ် သာတုဲသၠဲလးကၠုၚ်ရ။
ယဝ်ရမၞိဟ်ပံၚ်တောဲပါလုပ်တံ ဂၠိုၚ်ကၠုၚ်မ္ဂး ဒှ်ကၠုၚ်အပြံၚ်အလှာဲမွဲမာန်ရောၚ်ဂှ် ညးစဳဇန်တံ ပတှ်ေစှ်ေစိုတ်အိုတ်ရ။
Ref: Reuters
sanlontai