ပ္ဍဲပေါဲဗတိုက်ခရိုၚ်ညံၚ်လေဝ်ပေန် ကောန်ဒပ်ကံၚ်ဇြဳပၞာန် ဒးချိုတ်လဝ် ၁၃ တၠ KNU ဟီု

ညံၚ်လေဝ်ပေန်၊ ဂျူလာၚ်(၂၂)

ပ္ဍဲပေါဲဗတိုက်ၜါလ္ပာ် က္တဵုဒှ်လဝ် ပ္ဍဲပွိုၚ်ဍုၚ်ယှိုဲကျေန် ခရိုၚ်ညံၚ်လေဝ်ပေန် ဗော်သွးကောန်ဂကူကရေၚ် KNU ဂှ် ကောန်ဒပ်ကံၚ်ဇြဳပၞာန် (၁၃)တၠ ဒးချိုတ်လဝ်ရဂှ် ဗဟဵု KNU လလောၚ်တြးလဝ် ပ္ဍဲဂိတုဂျူလာၚ် စၟတ်တ္ၚဲ (၂၁)ရ။

နူဂိတုဂျူလာၚ် စၟတ်တ္ၚဲ (၁၄)တုဲကၠုၚ်တေံ စဵုကဵုစိုပ် စၟတ်တ္ၚဲ (၁၉)ဂှ် ပ္ဍဲပွိုၚ်ဍုၚ်ယှိုဲကျေန် အကြာဒပ်ပံၚ်ကောံကံၚ်ဇြဳပၞာန် ပျူသဝ်ထဳကဵု ဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA တံဒပ်လၟိဟ် (၇)တအ် ပေါဲဗတိုက်ဆေၚ်မုက် ဒှ်လဝ်ဗၞတ် (၉) ဝါရ။

ပ္ဍဲပေါဲဗတိုက်ၜါလ္ပာ်ဂှ် လ္ပာ်ဒပ်ပံၚ်ကောံ KNLA ၜိုန်ရပရေၚ်ဇီုကပိုက်ဒးလဝ် ဟၟဲကီုလေဝ် လ္ပာ်ဒပ်ပံၚ်ကောံကံၚ်ဇြဳပၞာန် ဒးချိုတ်လဝ် (၃) တၠတုဲ ဒးလဝ်ဘဲဝပ် (၁၁) တၠရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးရ။

ပ္ဍဲကဵုပေါဲဗတိုက်ဂှ် တံဒပ်ကံၚ်ဇြဳပၞာန် ခမရ (၂၀)ကဵု ခလရ (၂၆၄)တအ် ပန်ဖျေံနၚ်လွဟ်ဇၞော် ပ္ဍဲကွာန်ကောက်မေအ်ဒူ၊ ချုံအေန်၊ ကွေန်တလာလေဝ် (၃၈) မဂှ်ရ သ္ၚိဒၟံၚ် ပ္ဍဲကွာန်ကောက်မေအ်ဒူကဵု ကွေန်တလာလေဝ် (၃)မ ဒးတူပၟတ် လီုလာ်အာလဝ်ရဂှ် ထ္ၜးလဝ် ပ္ဍဲတၚ်လလောၚ်တြးရ။

သ္အာၚ်နူဂှ်ပၠန် တံဒပ်ကံၚ်ဇြဳပၞာန် ခမရ (၂၀)ဂှ် လုပ်စိုပ် ပ္ဍဲကွာန်ပဇြောန်မျောၚ်တုဲ စံၚ်ပလီုဏာ သ္ၚိဒၟံၚ်မွဲမတုဲ ပ္ဍဲကွာန်ကောက်မေအ်ဒူဂှ်လေဝ် လုပ်ဒကဵုဂၟာဲ ဂၠာဲလဝ် သ္ၚိဒၟံၚ်ညးဒေသဂှ်တုဲ ပလီုပလာ်ဏာလဝ်ရဂှ် KNU ဟီုသ္ဂးလဝ်ရ။

ပ္ဍဲပွိုၚ်ဍုၚ်ယှိုဲကျေန်ဂှ် ဟိုတ်နူပဋိပက္ခပရေၚ်ပၞာန်၊ ပရေၚ်ဍုၚ်ကွာန်တုဲ ကွာန်ပါဲဓလေတ်ဒၟံၚ်ဘဲပၞာန် အပံၚ်လၟိဟ် ၁၆ ကွာန် လၟိဟ်မၞိဟ် ၁၄,၀၀၀ ပြၚ် နွံဒၟံၚ်တုဲ နွံဒၟံၚ်ပၟိက်ကဵု အရီုဗၚ်ဗ္စာရဏာပရေၚ်မၞိဟ် နဒဒှ်ကာတၟေၚ်ရဂှ် ဂွံတီကေတ်အတိုၚ်တၚ်လလောၚ်တြး KNU ရ။

ပရိုၚ်-သြၚ်လောန်တိုၚ်(မ်)

ဗီုရုပ်-Social Media