မတ်မလီု၊ ဂျူလာၚ် (၂၂)
အပ္ဍဲတွဵုရးဍုၚ်မန် ဟိုတ်နူဗြဲဂူလဝ် ဟွံပိုတ်သ္ကုတ်တုဲ လ္တူလၟေၚ်ဒဒှ်ဘဲသဘာဝ ဍာ်ဇၞော်ဍာ်ကလိုပ် မက္တဵုဒှ်လဝ်ဂှ် ကံၚ်ဇြဳပၞာန် ရီုဗၚ်ရေၚ်တၠုၚ်ကဵုလဝ် စဵုကဵုဟွံမွဲ အောန်ဒၟံၚ်ရောၚ် ညးဒေသတံကဵု ဂကောံဟံၚ်ပြာ်ပရေၚ်မှာဇန်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တုဲကၠုၚ် ပ္ဍဲဂိတုဂျူလာၚ် ၁၈ ကဵု ၁၉ တေံ ပ္ဍဲကဵုပွိုၚ်ဍုၚ်တွဵုရးဍုၚ်မန်ဂမၠိုၚ် ပွိုၚ်ဍုၚ်မတ်မလီု၊ ၜါသွာၚ်၊ မုဟ်ဍုၚ်၊ ဇြပ်ဗု၊ ကျာ်မြဟ်၊ ရေဝ် ကေုာံ ပွိုၚ်ဍုၚ်ပံၚ်တံဂှ် ဟိုတ်နူဗြဲဂူလဝ် ဟွံပိုတ်သ္ကုတ်ဂှ်ရ ဍာ်ဇၞော်ဍာ်ကလိုပ်က္တဵုဒှ်လဝ်တုဲ သီုကဵုဂၠံၚ်ကာဗၠိုက် ကေုာံ တိဒဵုလာ်တံလေဝ် က္တဵုဒှ်လဝ်ကီုရ။
ပ္ဍဲကဵုလၟေၚ်ဒဒှ်ဘဲသဘာဝဏံဂှ် ညးဍုၚ်ကွာန်တံဝွံ နကဵုအစဳဇန်ဇကုဇကုဂှ် ဒးဆုဲပြံၚ်လဝ် ကာမံက်တိုန်တံဂှ်ကီု၊ ဒးဒတူလိုၚ်လဝ် နကဵုအရီုဗၚ် ဂကောံကဵုအရီုဗၚ်ပရေၚ်မၞိဟ်တံဂှ်တုဲ ကံၚ်ဇြဳပၞာန် ရီုဗၚ်ရေၚ်တၠုၚ်ကဵုလဝ် ဟွံမွဲပုဟ်ဂှ် ဂွံတီကေတ် အတိုၚ်တၚ်လလောၚ်တြး ညးဒေသတံရ။
ညးဒေသမွဲတၠဂှ်လေဝ် ပ္ဍဲကဵုလၟေၚ်ဒဒှ်ဘဲသဘာဝတံဂှ် ဂကောံဟံၚ်ပြာ်မှာဇန်တံဟေၚ် ဒးရီုဗၚ်ရေၚ်တၠုၚ် အာလဝ်ဂတတုဲ ဂကောံဟံၚ်ပြာ်သၟဝ်ကံၚ်ဇြဳပၞာန်တံဂှ် ကၠာဘဲသဘာဝဂွိုအ်က္တဵုဒှ် ၜိုတ်ဆကၠောန်ထ္ၜးလဝ်ရုပ်ရ နွံတုဲ နတဲဏံ ရီုဗၚ်ကဵုလဝ် ဟွံမွဲပုဟ်ဂှ် ဟီုရ။
“ ဂကောံပရဟိတတံဂှ် မတံဏံဒှ်ကၠုၚ်ဗက် ပ္ဍဲကဵုညးတံဂှ် မဒါန်သြန်တံ နွံဒၟံၚ်တုဲတုဲဏောၚ်လေဝ်။ ဒှ်ကၠုၚ်မွဲမွဲဗက် ပရဟိတတံဂှ် ဂတအိုတ်ရ။ အလဵုအသဳဂှ်တှ်ေ ဒးယှုက်ဒၟံၚ် ကဵုဗာတ်ဂျက်တံ မုတံတုဲ ညးတံဂှ် သှ်ေဒၟံၚ်လက္ကရဴတွဵုဏောၚ်။ သၟာပရဟိတတံရ အာဒၟံၚ်ဂတ။ နူကဵုဌာနဟံၚ်ပြာ် ကံၚ်ဇြဳပၞာန်တံဂှ်လေဝ် ဍေံတံ ကၠောန်လဝ် ထ္ၜးလဝ်ရုပ်တံ မုတံ နွံရ။ ဆ္ဂး လီုလာ်လဝ်တံ ဟွံမွဲမ္ဂး ညးတံ ထံက်ပၚ်ကဵုဂှ် ဟွံမွဲစအှ်ေပုဟ်။ သွက်ဂွံစသုၚ် ခက်ခုဲမ္ဂးလေဝ် ညအ်ဂှ် သၟာပရဟိတတံရ ရေၚ်တၠုၚ်ကဵုလဝ်ဂၠိုၚ်။ သြၚ်လာ်တံ၊ သ္ၚိလီုတံမုတံမ္ဂး ညးတံ စိုပ်ကၠုၚ်ဟဂှ်ရ။ ညးတံ ကၠုၚ်ကဵုဒါန် ဗီုဏံရ။ လၟုဟ်ဂှ်လေဝ် ဒှ်ဒၟံၚ်အခိၚ်ကာအကြာမွဲတုဲ နကဵုညးတံ ဟွံပါလုပ်လေဝ် ဒှ်ဂွံဏောၚ်” သာ်ဝွံ ညးဒေသမွဲတၠ ဟီုရ။
သ္အာၚ်နူဂှ်ပၠန် ပ္ဍဲကဵုလၟေၚ်ဒဒှ်ဍာ်ဇၞော်ဍာ်ကလိုပ်တံဂှ် နူကဵုဂကောံသၟဝ်တဲ ကံၚ်ဇြဳပၞာန်တံ ဟိုတ်နူရီုဗၚ်ရေၚ်တၠုၚ်ကဵုလဝ် ဟွံမွဲဂှ်ရ မ္ၚးနူကဵုအရီုဗၚ် ဂကောံဟံၚ်ပြာ်မှာဇန်တံဂှ် အလဵုဇကုဇကုတံလေဝ် ဒးဆုဲပြံၚ်ဒၟံၚ် ဒၞါဲကြပ်ပ်တံဂှ်တုဲ သွက်ဂွံစသုၚ်ဂှ် တၠဒါန်ဂမၠိုၚ် ရီုဗၚ်ရေၚ်တၠုၚ်ကဵုလဝ်ရ။
ညးတာလျိုၚ် ဂကောံဟံၚ်ပြာ်မှာဇန်မွဲတၠဂှ် ပ္ဍဲကဵုဘဲသဘာဝ မက္တဵုဒှ်လဝ်လၟုဟ်ဂှ် လ္ပာ်ကံၚ်ဇြဳပၞာန်တံ ၜိုန်ရကၠုၚ်စိုပ်ရံၚ်စံၚ်လဝ်ကီုလေဝ် ရီုဗၚ်ရေၚ်တၠုၚ်ကဵုလဝ် ဗွဲမစိုပ်တရဴ ဟွံမွဲပုဟ်ဂှ် ပါ်ပါဲလဝ်ရ။
“နူဏေံတေံ မၞိဟ်ဇၞော်လ္ပာ်လ္တူတေံ ကၠုၚ်လဝ်ရ။ ညးတံကၠုၚ်လဝ်ဂှ်ရ တီ။ ရီုဗၚ်ကဵုဏာဂှ် ဟွံဂွံမိၚ်ကေတ်ပုဟ်။ ၜိုတ်ကၠုၚ်ရံၚ်ဏာရနွံ။ ရီုဗၚ်ကဵု ဗီုကၠာတေံ ဗွဲမစိုပ်တရဴဂှ် ဟွံဂွံဆဵုကေတ်လဝ်ပုဟ်။ ဂကောံဟံၚ်ပြာ်တံကဵု တၠဒါန်တံရ ကၠုၚ်လဝ်တုဲ ရီုဗၚ်ကဵုလဝ်ဂၠိုၚ်ရ။ နွံပၟိက်ဂှ်တှ်ေ လၟုဟ်မှဟွံသေၚ်ပုဟ်၊ နူကၠာဂွိုအ်ဒှ်ဂှ် ဒစးဒုၚ်တုဲ ဒးပလေဝ်လဝ်ဏောၚ်။ တုဲပၠန် ဂၠံၚ်တံ မြံၚ်တံဟီုမ္ဂးလေဝ် ဟွံကၠောန်ကဵု ချိုတ်တ်ပၠိုတ်တ်ပုဟ်။ နူဏေံတေံ ဒၞါဲဍာ်ဟးဒှ်လဝ်ဂှ်တှ်ေ ဗြဲၜိုတ်ဏံဂှ် ဍာံဍာံဂှ် ဒှ်ဒၞါဲဒှ်ဟွံထေက်ပုဟ်။ ဘဲအန္တရာယ်သဘာဝဂှ်တှ်ေ အာမံၚ်အတိုၚ်ဏံရတှ်ေ လက္ကရဴလေဝ်ဒှ်ဏောၚ်။ ကၠာဂွိုအ်ဒှ်ဂှ်လေဝ် ဟွံစဵုဒၞါကဵုပုဟ်၊ ဒှ်တုဲလေဝ် ဟွံကၠောန်ကဵု ကွေံကွေံကြာန်န်ပုဟ်။ ဒှ်ကၠုၚ်မ္ဂးလေဝ် နူကဵုဂကောံသိုဟ်ပၠိုတ်ပၟတ်တံဒှ်ဒှ်၊ ဂကောံအလဵုအသဳလၟုဟ်မ္ဂး ညးတာလျိုၚ် နူကဵုအလဵုအသဳတံ ကၠုၚ်ကဵုပြဟ်ဟ်မ္ဂး သာခိုဟ်ရ။ ဗီုဍာ်ဇၞော်အာလဝ် နူဏေံတေံဂှ်တှ်ေ အောန်အိုတ် အာကၠုၚ်ဝါတ်ဂါတ်တုဲ မၞိဟ်ကၠောဝ်ပုၚ်တံလေဝ် နွံလဝ်ရ။ တၠဒါန်တံ၊ ဂကောံဟံၚ်ပြာ်တံ နွံတုဲ ပုၚ်ဂှ် ဟွံကၠောဝ်လဝ်ပုဟ်” သာ်ဝွံ သ္ဂးရ။
ပ္ဍဲကဵုပွိုၚ်ဍုၚ် ဘဲသဘာဝက္တဵုဒှ်လဝ်ဂမၠိုၚ် ပွိုၚ်ဍုၚ်မတ်မလီုကဵု ပွိုၚ်ဍုၚ်မုဟ်ဍုၚ် (၂) ဏံဟေၚ် ဂကောံသ္ကိုပ်ဝန်ဇၞော်တွဵုရးဍုၚ်မန် ဥူအံၚ်ကျဳတုၚ် နူကဵုကံၚ်ဇြဳပၞာန် ခါန်ကၞက်လဝ်ဂှ် ကၠုၚ်စိုပ်လဝ်တုဲ ပ္ဍဲကဵုဏံ သွက်ညးဍုၚ်ကွာန်ဒးဘဲဍာ် ၃၀၀ ပြၚ်ဂှ် သ္ၚု၊ ခၟာဲစာၚ်၊ ခၞံကြုက်ကှ်ကှ်တံဂှ်ဟေၚ် ကဵုလဝ် ၜိုတ်ထ္ၜးစဂှ် ဂွံတီကေတ်ရ။
အတိုၚ်တၚ်နၚ် နူကဵုသြၚ်လောန်တိုၚ်(မ်) မကံက်ကပှ်လဝ်ဂှ်မ္ဂး ပ္ဍဲကဵုလၟေၚ်ဒဒှ်ဘဲသဘာတ တွဵုရးဍုၚ်မန်ဂှ် ပါလုပ်သီုကဵုကောန်ၚာ်သၟတ်တံဂှ် (၄) တၠ ဗၠိုက်ဍာ်ချိုတ်အာလဝ်တုဲ (၂) တၠ ကလိဂွံလဝ်ဝပ်တုဲ ညးဍုၚ်ကွာန်ဒးဘဲဍာ် ဂၠိုၚ်ကဵုလ္ၚီ နွံလဝ်ရ။
ပ္ဍဲကဵုဏံ ပ္ဍဲပွိုၚ်ဍုၚ်ၜါသွာၚ် ဟိုတ်နူတိဒဵုလာ်တုဲ သ္ၚိမွဲမ ဇီုကပိုက်လီုလာ်အာလဝ်တုဲ (၇) ဂြောဝ်ဂတာ ဒးဆုဲပြံၚ်လဝ်တုဲ ဟိုတ်နူဍာ်ဇၞော်ဍာ်ဗၠိုက်ဏံတုဲ ဒဒန် နူကဵုသ္ကုတ်ဂၠံၚ်ရေဝ်−ကွာန်ဘာ မွဲတၞုၚ် သရိုဟ်အာလဝ်ရ။
တွဵုရးဍုၚ်မန်ဝွံ လၟေၚ်သၞာံ ဒးဒုၚ်စသိုၚ်ဒၟံၚ် ဍာ်ဇၞော်ဍာ်ကလိုပ်တံကဵု ဘဲသဘာဝ တိဒဵုလာ်တံဂှ်တုဲ ပ္ဍဲကဵုလၟေၚ်ဒဒှ် သၞာံ ၂၀၁၉ တုဲကၠုၚ်တေံဂှ် လၟိဟ်မၞိဟ် ဗ္ဒါဲ ၇၀ တၠ ချိုတ်အာလဝ်ရ။
ပရိုၚ်−သြၚ်လောန်တိုၚ်(မ်)
ဗီု−Social Media
sanlontai