ရပ်ဂွံလဝ် ကောန်ဂကောံ ဂကောံဇြဟတ်ပၠန်ဂတးကျာ်ထဝ် KRF (၃) တၠ ကံၚ်ဇြဳပၞာန် တြးဒၟံၚ်ဝါဒ

ကျာ်ထဝ်၊ ဂျူလာၚ်(၂၃)

ရပ်ဂွံလဝ် ကောန်ဂကောံ ဂကောံဇြဟတ်ပၠန်ဂတးကျာ်ထဝ် KRF မဒှ်ဂကောံပၠန်ဂတး ဖျေံသ္ဇိုၚ်ပွိုၚ်ဍုၚ်ကျာ်ထဝ် တွဵုရးဍုၚ်မန် (၃)တၠရဂှ်  နူတေဝ်လဳဂရာမ်တြးဝါဒကံၚ်ဇြဳပၞာန် လလောၚ်တြးလဝ် ပ္ဍဲဂိတုဂျူလာၚ် စၟတ်တ္ၚဲ (၂၂)ရ။ 

ကိုဝ်ပျိသုမ်မောၚ်မောၚ်၊ ကိုဝ်အာဏာပိုၚ်သိုဝ် ကေုာံ ကိုဝ်ဨဗြဴဟုၚ် ဒးဒုၚ်စောတ်စောဲရပ်လဝ် နဒဒှ်ညးလုပ်ဂကောံ KRF တအ် ညး (၃) တၠဂှ် ရပ်ဂွံလဝ် ဗ္ဒာဲသၞေဟ်ကွဳစက်တိုန်ဒဵုကျာ်ဣသိယဵု ပ္ဍဲဂိတုဂျူလာၚ် စၟတ်တ္ၚဲ (၆) အခိၚ်ဇိုၚ်သဝ်တ္ၚဲ ၜိုတ် (၇)နာဍဳရဂှ် ဟီုသ္ဂးလဝ်ရ။ 

သၟတ်ဒးဒုၚ်ရပ်လဝ် (၃) တၠတအ်ဂှ် တိုန်လဝ်ဘာပၞာန် ပ္ဍဲတိဍာ်ဗော်သွးကောန်ဂကူက်ရေၚ် KNU ဒပ်မဟာ (၁) တုဲ ပံၚ်တောဲကဵုဂကောံ KRF ဗၠာဲသၟိၚ်ဂြိပ်တိတ်ဨမေန်ထောန် က္ဍိုက်လဝ်က္ဍိုပ်တုဲ ဒှ်ညးကၠောန်ဒၟံၚ် ကမၠောန်ပ္ကီုပရာပ်ရဂှ် ဟီုစောတ်စောဲလဝ်ရ။ 

သ္အာၚ်နူဂှ်ပၠန် သၟတ် (၃) တၠတအ်ဂှ် ဒှ်ညးပါလုပ် ကၠောန်ရေၚ်တၠုၚ်လဝ် ပ္ဍဲပရေၚ်လုပ်ဗတိုက် ဗဒိုပ်ဗၠာဲသၟိၚ်ဝၚ်က၊ ပရေၚ်ဗတိုက်ဖံက်ခတိုဟ် ပွိုၚ်ဍုၚ်ကျာ်ထဝ် ကေုာံ ပ္ဍဲပရေၚ်ဖံက်ခတိုဟ် ဒဒန်လေဖာတဝ် ပ္ဍဲဂၠံၚ်တိုန်ဒဵုကျာ်ဣသိယဵုရဂှ် ဟီုသ္ဂးလဝ်ရ။ 

ညးတာလျိုၚ် PDF ခရိုၚ်သဓီု ကိုဝ်အေမေန်ထောန်ဂှ်မ္ဂး သၟတ်ကံၚ်ဇြဳပၞာန် ရပ်ကေတ်လဝ်ဂှ် ကောန်ဂကောံ KRF ဟွံသေၚ်တုဲ ရပ်ကေတ်လဝ် သၟတ်နူလဵုရောဟွံတီတုဲ တြးဒၟံၚ်ဝါဒရဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။ 

ပ္ဍဲပွိုၚ်ဍုၚ်ကျာ်ထဝ် ကောန်ဒပ်ကံၚ်ဇြဳပၞာန် စောတ်စောဲညးဒေသတအ် ဆက်စပ်ဒၟံၚ်ကဵု PDF ဂးတုဲ ပရေၚ်ရပ်ဒက်ဒၟံၚ် ခြာဟွံလအ်ဟွံလအ် နွံဒၟံၚ်ကီု တၠကမၠောန်တအ်လေဝ် ရပ်ကေတ်တုဲ အာတ်မိက်သြန်တုဲ ကလေၚ်ဗလးကဵုလဝ် နွံဒၟံၚ်ရဂှ် ဂွံတီကေတ် အတိုၚ်တၚ်လဟီု ညးဒေသတအ်ရ။ 

ပရိုၚ်-သြၚ်လောန်တိုၚ်(မ်)

ဗီုရုပ်-KRF