ညးဒေသကျောက်တခါ (၃)တၠ ဒးဒုၚ်ပြိုက်ဂစိုတ်တုဲ ၅၀၀၀ ပြၚ် ဒးဂြိပ်ဒဴဒၟံၚ်

ကျောက်တခါ၊ ဂျူလာၚ်(၂၃)

ရးဒေသဇၞော်ဗဂေါ ဒပ်ကံၚ်ဇြဳပၞာန် ထ္ပက်လုပ်ကၠုၚ်ကရောၚ်ပၞာန် ပ္ဍဲကွာန်မၞုံပွိုၚ်ဍုၚ်ကျောက်တခါဂှ် ပြိုက်ဂစိုတ်လဝ် ညးဒေသ ကောန်ညးဍုၚ်ကွာန် (၃) တၠတုဲ ညးဍုၚ်ကွာန် ၅၀၀၀ ပြၚ် ဒးဂြိပ်ဒဴပါဲဓလေတ်ဒၟံၚ်ရဂှ် ဒပ်စဵုဒၞာညးဍုၚ်ကွာန် ပွိုၚ်ဍုၚ်ကျောက်တခါ လလောၚ်တြးလဝ်ပရိုၚ် ပ္ဍဲဂိတုဂျူလာၚ် စၟတ်တ္ၚဲ (၂၂)ရ။

ပ္ဍဲဂိတုဂျူလာၚ် စၟတ်တ္ၚဲ (၁၈) အခိၚ်ဗ္တံဂှ် နူကဵုဒပ်ပံၚ်ကောံ ဂကောံဇြဟတ်ပၠန်ဂတးတအ် လုပ်စိုပ်ဗတိုက်လဝ် KTV ဒၞာဲကံၚ်ဇြဳပၞာန် ဖျေံလဝ်ဗဒိုပ် ဗ္ဒာဲမိုၚ်တိုၚ် (၁၀၁) ဂၠံၚ်လဂုၚ်-အၚ်ဝ တြေံ၊ ပွိုၚ်ဍုၚ်ကျောက်တခါဂှ် လ္ပာ်ဒပ်ကံၚ်ဇြဳပၞာန် ဒးချိုတ်လဝ် (၄)တၠတုဲ ဒးလဝ်ဘဲဝပ် (၂)တၠကီု ပ္ဍဲပေါဲဗတိုက် ဂိတုဂျူလာၚ်စၟတ် တ္ၚဲ (၁၉) ဂှ်လေဝ် လ္ပာ်ကံၚ်ဇြဳပၞာန် ဒးချိုတ်လဝ် (၈) တၠရဂှ် ဓမံက်လဝ် ပ္ဍဲတၚ်လလောၚ်တြးဂှ်ရ။

ဂိတုဂျူလာၚ် စၟတ်တ္ၚဲ (၂၀) အခိၚ်နူဂယးဂှ်လေဝ် အကြာကရောၚ်ပၞာန် ကံၚ်ဇြဳပၞာန် ထ္ပက်လုပ်ကၠုၚ် ကရောၚ်ပၞာန် ပ္ဍဲကွာန်နာန်ဇြ လ္ပာ်ဗၟံက်ဍုၚ်ကျောက်တခါဂှ်ကဵု ဒပ်ပံၚ်ကောံ ဂကောံဇြဟတ်ပၠန်ဂတးတအ် ဒှ်လဝ်ပေါဲဗတိုက်ဆေၚ်မုက်တုဲ လ္ပာ်ကံၚ်ဇြဳပၞာန် ဒးချိုတ်လဝ် ဟွံအောန်နူ (၁၀) တၠတုဲ ဒးလဝ်ဘဲဝပ်ဗွဲမဂၠိုၚ်ရဂှ် ဂွံတီကေတ် အတိုၚ်တၚ်လလောၚ်တြးရ။

ပ္ဍဲပေါဲဗတိုက်က္တဵုဒှ်လဝ် ပ္ဍဲကွာန်နာန်ဇြဂှ် ဒပ်ကံၚ်ဇြဳပၞာန် ပြိုက်ဂစိုတ်လဝ် ညးဒေသ ကောန်ဍုၚ်ကွာန် (၃) တၠ ပါလုပ်သီုညးအာယုက်ဇၞော် ညးဒှ်ဒၟံၚ်ယဲစိုတ်တအ်တုဲ စံၚ်ပလီုဏာလဝ် သ္ၚိဒၟံၚ် (၇) မကီု လ္ပာ်ဒပ်ပံၚ်ကောံ ဂကောံဇြဟတ်ပၠန်ဂတးတအ်လေဝ် ဒးပြဟ်လလုဲအာ (၁) တၠရဂှ် လလောၚ်တြးလဝ်ရ။

ဂိတုဂျူလာၚ် စၟတ်တ္ၚဲ (၂၁) ဂှ်လေဝ် ဟိုတ်နူပရေၚ်ဒပ်ပံၚ်ကောံ ဂကောံပၠန်ဂတးတအ် ပန်ပှ်ောလဝ်ကဵုသနိုက်ဗာ ပ္ဍဲကွာန်နာန်ဇြတုဲ ကံၚ်ဇြဳပၞာန် ဒးချိုတ်လဝ် (၃) တၠ ပ္ဍဲကရောၚ်ပၞာန် ကံၚ်ဇြဳပၞာန်ဂှ် သ္ဂံၚ်ဗြဴတအ်ပါလုပ်ကၠုၚ်ဒၟံၚ် ဂွံဆဵုကေတ်လဝ်ကီု လ္ပာ်ကံၚ်ဇြဳပၞာန် ပန်ဖျေံဒၟံၚ်လွဟ်ဇၞော် (၆၀) မမ ပ္ဍဲကဵုကွာန်ဇိုၚ်က္ၜဳသေတ်တောၚ်ကြာန်န်ရဂှ် ဓမံက်ထ္ၜးလဝ်ရ။

သ္အာၚ်နူဂှ်ပၠန် ပ္ဍဲဂိတုဂျူလာၚ် စၟတ်တ္ၚဲ (၂၂) ဂှ်လေဝ် ကရောၚ်ပၞာန်ကံၚ်ဇြဳပၞာန် ဇြဟတ်မၞုံ ဗ္ဒာဲ (၆၀) စိုပ်ကၠုၚ်ကွာန်သူဋ္ဌေကုမ် ကဵုကွဳစက် (၃) ဖ္ဍိုက်တုဲ အာစိုပ် လ္ပာ်ကွာန်တောၚ်ခေန်ဏောၚ် ဂွံလဝ်ပရိုၚ်ရဂှ် ဒပ်စဵုဒၞာညးဍုၚ်ကွာန်ပွိုၚ်ဍုၚ်ကျောက်တခါ ကဵုလဝ်သမ္တီရ။

ပ္ဍဲပွိုၚ်ဍုၚ်ကျောက်တခါဂှ် ဟိုတ်နူဒပ်ကံၚ်ဇြဳပၞာန် ထ္ပက်လုပ်ပၠုပ်ကရောၚ်ပၞာန် ကေုာံ ပရေၚ်ဖံက်ပ္ကဝ်အခေါၚ်အရာမၞိဟ်တုဲ ညးဒေသ ကောန်ညးဍုၚ်ကွာန် နူကွာန် မၞုံဂကောံကွာန်နာန်ဇြကဵု ဂကောံကွာန်တောၚ်ခေန်တအ် လၟိဟ်မၞိဟ် ၅၀၀၀ ပြၚ် ဒးဂြိပ်ဒဴပါဲဓလေတ်ဒၟံၚ် ဒၞာဲဌာန်ဗၠးဘဲရဂှ် ဂွံတီကေတ်အတိုၚ်တၚ်လလောၚ်တြး ဂကောံ (ပကဖ) ပွိုၚ်ဍုၚ်ရ။

ပရိုၚ်-သြၚ်လောန်တိုၚ်(မ်)

ဗီုရုပ် – Social Media