ၜဳကလေၚ်၊ ဂျူလာၚ်(၂၃)
တွဵုရးဍုၚ်မန် ၊ ပ္ဍဲပွိုၚ်ဍုၚ်ၜဳကလေၚ်ဂှ် သီုပေါဲဗတိုက်ဟၟဲမွဲသာ် နူကဵုတံဒပ်ကံၚ်ဇြဳပၞာန် ဟိုတ်နူပန်ဖျေံဒၟံၚ်လွဟ်ဇၞော် သီုဗ္တံသီုတ္ၚဲတုဲ ညးဒေသ နူကွာန် (၃) ကွာန် ဗ္ဒာဲ ၃၀၀၀ ဒးဂြိပ်ဒဴပါဲဓလေတ်ဒၟံၚ်ရဂှ် ညးတာလျိုၚ် KNU ခရိုၚ်သဓီု ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
တံဒပ်အမၠံက်ကံၚ်ဇြဳပၞာန် ဖျေံသ္ဇိုၚ်ၜဳကလေၚ် ကေုာံ သဓီု စၟတ်(၂၀၆)၊ တံဒပ်ပၞာန်တိုက် ခမရ (၉)၊ ဒပ်အမၠံက် စၟတ် (၃၁၄)တအ်ဂှ် သ္ပတံနူ ဂိတုဂျူလာၚ် စၟတ်တ္ၚဲ (၂၁)တုဲ ပန်ဖျေံဒၟံၚ်လွဟ်ဇၞော် ပ္ဍဲကွာန်သီုဗ္တံသီုတ္ၚဲ အဆက်ဟွံပိုတ်သ္ကုတ်ရ။
ဟိုတ်နူဒပ်ကံၚ်ဇြဳပၞာန် ပန်ဖျေံဒၟံၚ်လွဟ်ဇၞော်တုဲ နူကွာန်ယှိုဲယောၚ်ပျ၊ ဇြဳဝန်၊ အဝေန်ဂျဳတအ် လၟိဟ်သ္ၚိကၟိန် ၅၀၀ ပြၚ်၊ လၟိဟ်မၞိဟ် ၃၀၀၀ ပြၚ် ဒးဂြိပ်ဒဴပါဲဓလေတ်ဒၟံၚ် ပ္ဍဲဒၞာဲဗၠးဘဲရ။
ပ္ဍဲပရေၚ်ပရောဒပ်ကံၚ်ဇြဳပၞာန် ပန်ဖျေံလဝ်လွဟ်ဇၞော်ဂှ် ဒဝ်မဝေန် အာယုက် ၃၅ သၞာံ ဒၟံၚ်ကွာန်ကဇိုၚ် ပွိုၚ်ဍုၚ်ၜဳကလေၚ် ဒးလဝ်ဘဲဝပ်မကမ်လွဟ်ဇၞော် ပ္ဍဲဂဒအ်ဗြာတ်ပါဲရဂှ် ညးတာလျိုၚ် KNU ခရိုၚ်သဓီုမွဲတၠ ဟီုသ္ဂးလဝ်ရ။
သ္အာၚ်နူဂှ်ပၠန် ညးဒေသ နူကွာန်မိချောၚ်အိုၚ်၊ မယာန်ကုမ်၊ ဒေါၚ်ယွာ၊ ပါန်အောၚ်ကုမ်တအ်လေဝ် ဟိုတ်နူဒပ်ကံၚ်ဇြဳပၞာန် ပန်ဖျေံလွဟ်ဇၞော်တုဲ အခိၚ်နူဂယးဂှ် ဒးဂြိပ်ဒဴပါဲဓလေတ်လဝ် မွဲချိုန်ခနတုဲ အခိၚ်ဇိုၚ်သဝ်တ္ၚဲဂှ် ကလေၚ်စဴကၠုၚ် ဌာန်ဒၟံၚ်ရဂှ် ဂွံတီကေတ်ရ။
ပ္ဍဲဂိတုဂျူလာၚ် စၟတ်တ္ၚဲ (၁၄)တုဲကၠုၚ်တေံလေဝ် ဟိုတ်နူဒပ်ကံၚ်ဇြဳပၞာန် ထ္ပက်လုပ်ကၠုၚ်ကရောၚ်ပၞာန် ပ္ဍဲပွိုၚ်ဍုၚ်ကျာ်ထဝ်တုဲ ညးဒေသ နူကွာန်(၇)ကွာန် ပါလုပ်သီုကွာန်ဇြဳကုမ် ဗ္ဒာဲ ၃၀၀၀ ဒးဂြိပ်ဒဴပါဲဓလေတ်ဒၟံၚ်ရဂှ် ဂွံတီကေတ် အတိုၚ်တၚ်လလောၚ်တြး KNU ခရိုၚ်သဓီုရ။
ပရိုၚ်-သြၚ်လောန်တိုၚ်(မ်)
ဗီုရုပ်-KNU
sanlontai