ပရေၚ်ပိုဝ်လာန် ဂၠာဲဒၟံၚ်သၞ လ္တူဍုၚ်ဗဳလာရုစ်ဂှ် ဒှ်ဗတိုက်ဒၟံၚ်ရုယှာရောၚ် ပူတေန်ဟီု

မဝ်သဂိုဝ် – ဂျူလာၚ်(၂၃)

ကၟိန်ဍုၚ်ပိုဝ်လာန် လုပ်လဝ်ဂကောံမဟာမိတ်နေတိုဝ်ဂှ် တၚ်ရန်တၟံ ပရေၚ်ပိုၚ်ပြဳတိဍာ် နွံဒၟံၚ်ရဂှ် ပူတေန် ဟီုစောတ်စောဲလဝ်တုဲ ပရေၚ်ဂၠာဲသၞကဵုဗဳလာရုစ် မဒှ်မဟာတ်မိတ်ရုယှာစုက်လုက် အလုံသီုဖအိုတ်ဂှ် ဒှ်ဗတိုက်ဒၟံၚ်ရုယှာရောၚ် ဒုၚ်ဂိုၚ်ကေတ်လဝ်ရဂှ်လေဝ် ဟီုသ္ဂးလဝ်ရ။

နကဵုရုယှာ လ္တူပွဂၠာဲဒၟံၚ်သၞ ပ္ဍဲလ္တူဍုၚ်ဗဳလာရုစ် အလုံသီုဖအိုတ်ဂှ် ၜိုတ်သၟဟ်အစောံ နနဲကဲဂၠံၚ်တရဴစုၚ် က္လေၚ်ပၠန်အာတဲရောၚ်ဂှ် ပူတေန်ဟီုလဝ် ပ္ဍဲဂလာၚ်လၟိၚ်ရုပ်ဂမျိုၚ် ကောံဓရီုကံၚ်ဇြဳပရေၚ်ဂီုကၠီုရ။

အခိၚ်လၟုဟ်ဏံ ကြဴနူဒပ်ဝဂ်နာတအ် စိုပ်ကၠုၚ်ဍုၚ်ဗဳလာရုစ်တုဲဂှ် သွက်ဂွံပြံၚ်ပဆုဲယူနေတ်ပၞာန် ပ္ဍဲလ္ပာ်သ္ကုတ်ဗၟံက်ပိုဝ်လာန် ကဝ်မတဳဂီုကၠီုပိုဝ်လာန် ဖျေံလဝ်သ္ဂုတ်သွာတ် ပ္ဍဲတ္ၚဲဗုဒ္ဓဝါရဂှ် အေဂျေန်ဇြဳပရိုၚ်ကၟိန်ဍုၚ်ပိုၚ် PAP နိဿဲကဵုဝန်အပ္ဍဲတုဲ ဟီုသ္ဂးလဝ်ရ။

ပရေၚ်စောတ်စောဲလဝ် ဆေၚ်စပ်ကဵု ပရေၚ်အုပ်ဓလီုတိဍာ်ဗဳလာန်ရုစ်ဂှ် ပိုဝ်လာန် ဟီုတးပါဲလဝ်ရဂှ် ဂွံတီကေတ်ရ။

သ္အာၚ်နူဂှ်ပၠန် သ္ကုတ်ပလိုတ်ဍုၚ်ပိုဝ်လာန်ဂှ် ဒှ်တၟာဲပဏ္ဍာ သွက်ကၟိန်ဍုၚ် နူဇရေၚ်သတာလေန်ရောၚ် ပူတေန် ဟီုလဝ်တုဲ ရုယှာ ကဵုအာသတိ ကုပိုဝ်လာန်ဏောၚ်ဂှ် ဟီုသ္ဂးလဝ်ရ။

“သတာလေန်ဂှ် ဒှ်က္ဍိုပ်ဒုဟ်ရာဇဝတ်ပၞာန်၊ သွက်ပရေၚ်ကောန်ဂကူပိုဝ်လာန် ဂၠိုၚ်ကဵုလ္ၚီဒးချိုတ်လဝ် ဒုဟ်ဒဏ်နွံဒၟံၚ်ရ”ဂှ် သ္ကိုပ်ဝန်ဇၞော်ပိုဝ်လာန် ချူပ္တိုန်လဝ် ပ္ဍဲမုက်လိက်တွေတ်တာညးကီု အမာတ်ကလုတ်ရုယှာဂှ်လေဝ် ကော်ကေတ်အာ ပ္ဍဲဌာနဝန်ဇၞော်ပရေၚ်ဍုၚ်သ္အာၚ်ဏောၚ်ဂှ် ညးဟီုသ္ဂးလဝ်ရ။

လောန်ကၠုၚ်မွဲၜါတ္ၚဲတေံလေဝ် ကောန်ပၞာန်စလိၚ်ဝဂ်နာ နွံဒၟံၚ် ပ္ဍဲဗဳလာရုစ်ဂှ် ပ္ကတ်ပကေၚ်ကဵုဒၟံၚ် ဒပ်တၟေၚ် ဗဳလာရုစ်ဇြဳယာမ် ဗ္ဒာဲပယျဵုပိုဝ်လာန်ရဂှ် လလောၚ်တြးလဝ်ရ။

ရုယှာဂှ် ပ္ဍဲကဵုသတ္တာတုဲကၠုၚ်ဟွံလအ်ဏီ စတြးစွံလဝ် လွဟ်လက်နက်နျူ စှ်ေကိုန်ဗျူဟာ ပ္ဍဲဗဳလာရုစ်အလန်ပထမတုဲ ပ္ဍဲဂိတုဂျူလာၚ် စၟတ်တ္ၚဲ(၂၃)ဂှ်မ္ဂး သွက်သမ္မတဗဳလာရုစ်ကဵု ပူတေန် ဂွံဆဵုဂဗအာရေၚ်သ္ကအ် ပ္ဍဲသ္ၚိနန်ကရေန်မလေန် နွံဒၟံၚ်ရဂှ် ဂွံတီကေတ်ရ။

ဝန်ဇၞော်ပရေၚ်စဵုဒၞာဂျာမာန် ဗဝ်ရေစ်ပဳသတိုဝ်ရဳယာမ်သ်ဂှ် နကဵုဂျာမနဳ ကေုာံ နေတိုဝ်တအ် သွက်ဂွံစဵုဒၞာကဵု သ္ကုတ်ဗၟံက်မဟာမိတ်ပရေၚ်ပၞာန်ဂှ် သွက်ဂွံရီုဗၚ်ထံက်ပၚ်အာပိုဝ်လာန် နွံဒၟံၚ်ဒတုဲရဂှ် ဟီုသ္ဂးလဝ်ရ။

Ref,Reuters