သဝ်၊ ဂျူလာၚ် (၂၃)
ခန္ဓဇကု ကောန်သ္ဂံၚ် PDF မပြဟ်လလုဲအာလဝ် ပ္ဍဲပေါဲဗ္တိုက် မက္တဵုဒှ်လဝ် ဗ္ဒါဲဍုၚ်သဝ်၊ ရးမဂွဵုတံဂှ် ကောန်ဒပ်ကံၚ်ဇြဳပၞာန်တံ ဗာ်ဏာလဝ် ဂၠိုၚ်ကဵုသ္ကုတ်ရောၚ်ဂှ် ကောန်ဒပ်ဂကောံစဵုဒၞါတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဇွရုပ်ကောန်သ္ဂံၚ် PDF (၂) တၠကဵု ကောန်သ္ဂံၚ် ပ.က.ဖ (၃) တၠ မပြဟ်လလုဲအာလဝ် ပ္ဍဲပေါဲဗ္တိုက်ကွာန်ယျေန်ကေဝ် ပ္ဍဲဂိတုဂျူလာၚ် (၁၅) တုဲကၠုၚ်တေံဂှ် ဒးဒုၚ်ကၠောန်လဝ်သာ်ဏံရ။
“ကၠဵုတှ်ေ ဍေံဒ္ဂေတ်ဗီုကၠဵုရဏောၚ်။ နူစပေါဲဗ္တိုက်ဒှ်တေံဂှ် ကၠုၚ်ကပှ်ဇွဏောၚ် ထေၚ်ကေတ်တုဲမှ ဟွံကၠုၚ်ကပှ်ညးသ္ကအ်တုဲ ကၠောန်ဏာလဝ်သာ်ဏံရ။ ၝတံဏံဂှ် ဖံက်ပ္ကဝ်အခေါၚ်အရာမၞိဟ်တံ ၜက်အာဗၞတ်ဗ္ၜတ်ဟဂှ်ရ။ လ္တူဇွ ဟွံမွဲကဵုလမျီုတံရဂှ် စေဝ်ပၞောန်ဟွံမွဲပုဟ်” သာ်ဝွံ ကောန်ဂကောံဒပ်စဵုဒၞါမွဲတၠ ဟီုရ။
အပ္ဍဲလၟေၚ်ဒဒှ်ပေါဲဗ္တိုက်ဂှ် လ္ပာ်ကံၚ်ဇြဳပၞာန် ဟွံအောန်နူကဵု (၂၀) တၠ ချိုတ်အာလဝ်တုဲ မ္ၚးနူကဵုစံၚ်ပလီုပလာ် ကွာန်ယျေန်ကေဝ်ဂှ် သီုကဵုပန်ပှော်လဝ်လွဟ်ဇၞော်တံဂှ်ရ ကောန်ၚာ်သၟတ် အာယုက် (၁၂) သၞာံမွဲတၠလေဝ် ဒးချိုတ်အာလဝ်ရ။
ညးဍုၚ်ကွာန် (၂၀၀၀) ပြၚ် နူကဵုကွာန်နာတ်ကံၚ်ကျေန်၊ ကွာန်သဲလဲကျေန် ကေုာံ ကွာန်ယျေန်ကေဝ် ဗ္ဒါဲပွဳပွူ အကြာဒပ်ကံၚ်ဇြဳပၞာန်ကဵု ဒပ်စဵုဒၞါညးဍုၚ်ကွာန်တံ မက္တဵုဒှ်လဝ် ပရေၚ်ဒိဓဗတ်ဆေၚ်မုက်ဂှ်ဝွံ ဒးဂြိပ်ဒဴပါဲဒလေတ်ဒၟံၚ်တုဲ နွံပၟိက်ဒၟံၚ်ကဵု အရီုဗၚ်ပရေၚ်ဗ္စာရဏာမၞိဟ်တံရောၚ်ဂှ် ဂွံတီကေတ်ရ။
ပ္ဍဲဂိတုဂျူလာၚ် (၁၃) တေံရ နူကဵု က.ပ.စ လံၚ်ယှေ ဇြဟတ်ၜိုတ် (၁၂၀) ပြၚ် မထ္ပက်ကၠုၚ်ကရောၚ်ပၞာန် ပ္ဍဲပွိုၚ်ဍုၚ်သဝ်ဂှ် လ္ပာ်ဂကောံဒပ်စဵုဒၞါညးဍုၚ်ကွာန်တံ အဟိန်တဝ်စၞေဟ်စဵုဒၞါဒၟံၚ်ဂှ် (၇) တၠ ပြဟ်လလုဲအာလဝ်ရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−CJ
sanlontai