ကောံဓရီုပရေၚ်ၜိုဟ်လလမ် ကံၚ်ဇြဳပၞာန်ဂှ် ဂကောံ EAO သ္ကုတ်သၟဝ်ကျာပိဂကောံ တိုန်စိုပ်အာဟွံသေၚ်

နေဗျဳဒဝ်၊ ဂျူလာၚ် (၂၃)

ကောံဓရီုပရေၚ်ၜိုဟ်လလမ် ကံၚ်ဇြဳပၞာန်သီအဝဵု မပ္တိတ်ဒၟံၚ်ဇြဟတ် သွက်ဂွံကၠောန်ဗဒှ်ဂှ် ဂကောံရပ်လွဟ်ကောန်ဍုၚ်အရၚ်သ္ကုတ်သၟဝ်ကျာ EAO ပိဂကောံတံ တိုန်စိုပ်အာ ဟွံသေၚ်ပုဟ်ဂှ် ဗော်တောတက်ရးသေံ (SSPP) ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

တုဲကၠုၚ် ပ္ဍဲဂိတုဂျူလာၚ် (၂၀) ကဵု (၂၁) တေံ ညးစၞးနူကဵုဂကောံသဳကၠဳပရေၚ်ၜိုဟ်လလမ် ကံၚ်ဇြဳပၞာန် (NSPNC) ကေုာံ ညးစၞးနူကဵုဂကောံရပ်လွဟ်ကောန်ဍုၚ်အရၚ် သ္ကုတ်သၟဝ်ကျာ ဟွံဂွံထ္ပက်လဝ်စၟတ်တဲဂမၠိုၚ် ဂကောံ “ဝ” UWSP, ဂကောံမိုၚ်လာ NDAA ကေုာံ ဗော်တောတက်ရးသေံ SSPP တံ သဳကၠဳလဝ် ပ္ဍဲကဵုနေဗျဳဒဝ်ရ။

ပ္ဍဲကဵုပေါဲသဳကၠဳ တ္ၚဲပထမဂှ် သဳကၠဳပ္ညဳပ္ညပ်လဝ် ပရူပရာ မတုပ်လဝ်စိုတ် ပ္ဍဲပေါဲသဳကၠဳတုဲကၠုၚ်တေံ သွက်ဂွံထ္မံက်ရုပ်ရဴမာန်ဂှ်ကီု၊ သွက်ဂွံကၠောန်ဗဒှ်ကောံဓရီုပရေၚ်ၜိုဟ်လလမ်၊ အကာဲအရာရေၚ်တၠုၚ် ပရေၚ်ဖောအ်ဗြေဝ်ဒေသတံကဵု တၚ်နၚ်နူကဵု လ္ပာ် EAO တံ မသဳကၠဳလဝ်တံရောၚ်ဂှ် လ္ပာ်ကံၚ်ဇြဳပၞာန် လလောၚ်ပ္တိတ်လဝ်ရ။

ပ္ဍဲကဵုတ္ၚဲဒုတိယဂှ် လ္ဂောံကဵုတၚ်နၚ် မသဳကၠဳပ္ညဳပ္ညပ်လဝ် ပွိုၚ်ၜါတ္ၚဲဂှ်တုဲ ထပ်သဳကၠဳလဝ် လစွံစိုတ်သီုၜါလ္ပာ်တုဲ တၚ်တုပ်စိုတ် ဂွံလဝ်တုဲတုဲတံဂှ် သ္ပဒတန်ထ္ပက်လဝ်စၟတ်တဲတုဲ လှာဲလဝ်ညးသ္ကအ်ရောၚ်ဂှ် ကံၚ်ဇြဳပၞာန် သ္ဂးရ။

ညးမၞုံအခေါၚ်ဟီုဂး ဗော်တောတက်ရးသေံ (SSPP) ဒုသ္ကိုပ်ဗိုလ်ဇၞော် သာၚ်သုဂှ် စပ်ကဵုကောံဓရီုပရေၚ်ၜိုဟ်လလမ်တုဲ ပြဟ်ဟ်ဏံ ပ္တိုန်ထ္ၜးအပ္ဍဲဂကောံ ဟွံကၠောံဍဏီဂှ်ရ ယဝ်ရကၠောန်ဗဒှ်ကၠုၚ်မ္ဂး တိုန်စိုပ်ဟွံမာန်ဏီပုဟ်ဂှ် ထ္ပက်လဝ်စၟတ်တဲရောၚ် ဟီုရ။

“စပ်ကဵုကိစ္စမိက်ဂွံကၠောန်ကောံဓရီုပရေၚ်ၜိုဟ်လလမ်ဂှ်တုဲ သာ်လဵုညာတ်ရောဟီုဂှ် ဍေံတံ (NSPNC) သဳကၠဳလဝ်ရ၊ မုဍေံတံ မိက်ဂွံကၠောန် ထံက်ဂလာန်ဟာ ဟွံထံက်ဂလာန်ဟာ သာ်ဏံရ။ ပိုယ်တံလေဝ် ကၠိုဟ်ဒၟံၚ်ရ။ စပ်ကဵုကိစ္စ ထံက်ဂလာန်၊ ဟွံထံက်ဂလာန်ပုဟ်ဟီုဂှ် ၜိုတ်ညးစၞးပိုယ်တံသၟးရတှ်ေ လစွံစိုတ် ဂကောံဗော်သွးဂှ် ပ္တိုန်ထ္ၜးဍိုက်က်ပေၚ်ၚ်ဟွံမာန်ဏီတုဲ စပ်ကဵုကိစ္စဏံတုဲ ပိုယ်တံ ကဵုတၚ်စၟတ်ဟွံမာန်ဏီပုဟ်။ ထ္ပက်လဝ်စၟတ်တဲ သာ်ဏံတုဲ ပြဟ်ဟ်ဏံ ပိုယ်တံ တိုန်စိုပ်ဟွံမာန်ဏီပုဟ်၊ ယဝ်ရကၠောန်ကောံဓရီုပရေၚ်ၜိုဟ်လလမ်မ္ဂး ပိုယ်တံ တိုန်စိုပ်ဟွံမာန်ဏီပုဟ်၊ သွက်ဂွံပါလုပ်တိုန်စိုပ်မာန်ဂှ် ပိုယ်တံ ပိဂကောံ ဟွံဒှ်ဒဂူဏီပုဟ်” သာ်ဝွံ ညးသ္ဂးရ။

ဆဵုဂဗသဳကၠဳအလန်ဏံဂှ်ဝွံ ကလေၚ်ပကောံပကေဝ် ကိစ္စပရူပရာ မသဳကၠဳလဝ် လ္တုန်တုဲတုဲတေံဂှ်တုဲ ဆၜိုတ်ထ္ပက်လဝ်စၟတ်တဲရနွံဂှ် ဒုတိယသ္ကိုပ်ဗိုလ်ဇၞော် သာၚ်သု သောၚ်ထ္ၜးလဝ်ရ။

တုဲကၠုၚ် ပ္ဍဲဂိတုမာတ်ချ် ၂၂ ကဵု ၂၃ တေံဂှ်လေဝ် ဂကောံသဳကၠဳပရေၚ်ၜိုဟ်လလမ် ကံၚ်ဇြဳပၞာန်ဂှ် စပ်ကဵုကိစ္စ သွက်ဂွံကၠောန်ဗဒှ်ကောံဓရီုပရေၚ်ၜိုဟ်လလမ် ကေုာံ ပေါဲရုဲမာဲတံဂှ်တုဲ သဳကၠဳလဝ် ကုဂကောံ EAO ဟွံဂွံထ္ပက်လဝ်စၟတ်တဲ ပိဂကောံတံဂှ်ရ။

သ္အာၚ်နူဂှ်ပၠန် တုဲကၠုၚ် ပ္ဍဲဂိတုဂျောန် သတ္တာဟလက္ကရဴအိုတ်ဂှ်လေဝ် ဂကောံရပ်လွဟ်ကောန်ဍုၚ်အရၚ်ထ္ပက်လတ်စၟတ်တဲဂမၠိုၚ် မပ္တံကဵု ဌာန်ဂအုပ်ဗၠးၜးကောန်ဂကူပအိုဝ် (PNLO) ၊ ဒပ်ပၞာန်ဒတုဲဖဵုဒဳမဝ်ကရေဇြဳကရေၚ် (DKBA) ၊ ကံၚ်ဇြဳပရေၚ်ၜိုဟ်လလမ်ကရေၚ် (KNU/KNLA-PC) ၊ ဗော်သွးဒဳမဝ်ကရိတ်တေတ်လာဟူ (LDU) ကေုာံ ဗော်ဗၠးၜးရးရခေၚ် (ALP) တံ သဳကၠဳပ္တိုန်ထ္ၜးလဝ်ရ။

ဗွဲကြဴဂှ် ပ္ဍဲဂိတုဂျူလာၚ် သတ္တာဟပထမကဵု သတ္တာဟဒုတိယတေံ ဂကောံသဳကၠဳပရေၚ်ၜိုဟ်လလမ် ကံၚ်ဇြဳပၞာန် ဆဵုဂဗလဝ်ကဵု  ဗော်ဍုၚ်မန်တၟိ (NMSP) ကဵု ကံၚ်ဇြဳကလေၚ်ပ္တန်ရးသေံ (SSPP) တံ မွဲဂကောံတုဲမွဲဂကောံတုဲ ထပ်ပ္တိုန်ထ္ၜးလဝ် ကိစ္စပရေၚ်ကၠောန်ဗဒှ် ကောံဓရီုပရေၚ်ၜိုဟ်လလမ်ရ။

ညးခါတ်အကာဲပရေၚ်ဍုၚ်ကွာန်တံဂှ် ဂကောံရပ်လွဟ်ကောန်ဍုၚ်အရၚ် မသဳကၠဳဒၟံၚ် ကုကံၚ်ဇြဳပၞာန်တံဂှ်ဝွံ ဟိုတ်နူဒှ်ဂကောံပါလုပ်ဒၟံၚ် ပ္ဍဲကဵုပေါဲဗ္တိုက်ထပိုတ်ရိုဟ်ကၞက်သၞောတ်တၠအဝဵုပၞာန်တံ ဟွံသေၚ်ဂှ်ရ သ္ဇက်ဂွံဒှ်ကၠုၚ် ကောံဓရီုပရေၚ်ၜိုဟ်လလမ် ဟွံမွဲပုဟ်ဂှ် သ္ၚဳဂၠိပ်လဝ်ရ။

အခိၚ်လၟုဟ်ဂှ်လေဝ် က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ်ဂှ် ပ္ဍဲကဵုဒေသသက်ကိုၚ်၊ ကရေၚ်ဍာဲ ကေုာံ ချေၚ်တံဂှ် ဟိုတ်နူဒှ်ဒၟံၚ်အကာဲအရာ ပရေံအိုတ်တံဂှ်ရ သွက်ဂွံသာတုဲ ကၠောန်ပရေၚ်ၜိုဟ်လလမ်ဂှ် တုဲကၠုၚ်ပ္ဍဲဂိတုဂျူလာၚ် ၁၃ တေံ လလောၚ်ပ္တိတ်လဝ်ရ။

ကြဴနူဒပ်ပၞာန်သီအဝဵုတုဲ ဒဵုကဵုအခိၚ်လၟုဟ် ဂကောံရပ်လွဟ်ကောန်ဍုၚ်အရၚ်ထ္ပက်လဝ်စၟတ်တဲဒေါအ်ပန်ပှော် (၇) ဂကောံကဵု ဂကောံရပ်လွဟ်ကောန်ဍုၚ်အရၚ် ဟွံဂွံထ္ပက်လဝ်စၟတ်တဲ (၃) ဂကောံတံ  သဳကၠဳလဝ် ကုကံၚ်ဇြဳပၞာန် ဟွံအောန်နူကဵု (၅) ဝါရ။

ပရိုၚ်−သြၚ်လောန်တိုၚ်(မ်)

ဗီု−MOI