ညးသွံဖျာသၞောတ်အောန်လာၚ်တံ ယဝ်ရဟွံပ္တိုန်စရၚ်မ္ဂး ကေတ်အရေဝ်ရောၚ်ဂှ် ကံၚ်ဇြဳပၞာန်ဟီု 

နေဗျဳဒဝ်၊ ဂျူလာၚ်(၂၃) 

နကဵုညးသွံဖျာသၞောတ်အောန်လာၚ်တံ ယဝ်ရဟွံပ္တိုန်စရၚ်မ္ဂး မ္ၚးနူဒဏ်ထံၚ်သၠုၚ်အိုတ် ၃ သၞာံဂှ် ဒဏ်သြန် ၅ ကိုဋ်တံလေဝ် ဒးဒုၚ်ဖျေံစၟတ်ရောၚ်ဂှ် ဌာနဝန်ဇၞော်ပရေၚ်ပိုန်ဒြပ်ကေုာံ ပရေၚ်ကူသာန်သွံရာန်ကံၚ်ဇြဳပၞာန်တံ လလောၚ်တြးလဝ် ပ္ဍဲဂိတုဂျူလာၚ် စၟတ်တ္ၚဲ ၂၁ ဂှ်ရ။ 

ကံၚ်ဇြဳပၞာန်ဂှ် ကုကမၠောန်သွံမံၚ်ဖျာနကဵုသၞောတ်အောန်လာၚ်တံဂှ် လ္ဂောံကဵုဥပဒေ ကပေါတ်ဗၞိက်ကေုာံပရေၚ်ရေၚ်တၠုၚ်ပၟိက်ဇၞော် ၝောံပိုဒ် (၄) ၝောံပိုဒ်ပါ် (၈)ဂှ် စၟတ်သ္မီထောံ နဒဒှ် ကမၠောန်ပရေၚ်ရေၚ်တၠုၚ်ပၟိက်ဇၞော်တံတုဲ ညးဂှ်မွဲဟွံဟီု သွံဖျာနကဵုသၞောတ်အောန်လာၚ်မ္ဂး စၟတ်တဲပ္တိုန်စရၚ်နွံမှဟေၚ် ကၠောန်ဂွံရောၚ်ဂှ် ပါလုပ်ပ္ဍဲတၚ်လလောၚ်တြးရ။ 

ညးသွံဖျာသၞောတ်အောန်လာၚ်တံဂှ် သ္ပတံနူပ္တိတ်တၚ်လလောၚ်တြးတုဲပေၚ် ၆ ဂိတုမ္ဂး စၟတ်တဲပ္တိုန်စရၚ်ဟွံမွဲမွဲသာ် ကၠောန်မံၚ်ကမၠောန်ရောၚ် စၟဳတ်ဆဵုဒးမ္ဂး လ္ဂောံကဵုဥပဒေ ကပေါတ်ဗၞိက်ကေုာံပရေၚ်ရေၚ်တၠုၚ်ပၟိက်ဇၞော် ၝောံပိုဒ် (၅) ဖျေံစၟတ်အာ သီုဒဏ်ထံၚ်သီုဒဏ်သြန်ရောၚ်ဂှ် ကံၚ်ဇြဳပၞာန်တံ ဓရေပ်ဓရတ်ကၠုၚ်မဒှ်ရ။ 

လ္ဂောံကဵုဥပဒေကပေါတ်ဗၞိက်ကေုာံ ပရေၚ်ရေၚ်တၠုၚ်ပိၟက်ဇၞော် ၝောံပိုဒ် (၅)ဂှ် ရုၚ်သၞောဝ်ဓရ်တံ သွက်ဂွံပလီုပလာ်ကပေါတ်ဗၞိက်ဆက်စပ်ကဵုဒုဟ်ဒဏ်တံ ဟွံသေၚ်မ္ဂး သွက်သီဂိုၚ်နဒဒှ် ဘဏ္ဍာကၟိန်ဍုၚ်တံ၊ ဖျေံအမိၚ်စဳရေၚ်နကဵုနဲတၞဟ်သ္အာၚ်မာန်မံၚ်ဂှ် ထ္မံက်ထ္ၜးလဝ်ရ။ 

ညးသွံမံၚ်ကပေါတ်ဗၞိက် နကဵုသၞောတ်အောန်လာၚ်မွဲတၠဂှ်တှ်ေ ပွကမၠောန်ကံၚ်ဇြဳပၞာန်ဂှ် သွက်သ္ဂောံဂွံအကံက်အခေါန်ဂှ် တ္ၚေတ်မံၚ်သြန် စဵုကဵုကဆံၚ်မၞိဟ်သ္ဇိုၚ်တံရဂှ် ပါ်ပါဲလဝ်ရ။ 

” အောန်လာၚ်ယှပ်ပေန်ဂှ် မၞိဟ်လှုဲနွံတံ ကၠောန်ဟွံသေၚ်ပုဟ်။ ကောန်ၚာ်တံ အဟိန်တိုန်မံၚ်ဘာဂှ် ကၠောန်စအဇာဍောတ်တံ၊ ညးဗြဴတၠသ္ၚိကမၠောန်ကၟိတ်ဟွံမွဲတံ ညးသွံစမ်ရံၚ်ညိညိတံဂှ်လေဝ်။ ကမၠောန်ဂှ်လေဝ်ဟွံမွဲပုဟ်။ အခိၚ်ဂၠါဲဝါတ်မံၚ်ဂှ် ဒှ်အဓိပ္ပါယ်ကၠောန်ဣဏံရ။ ပ္တိုန်စရၚ်ကမၠောန်ဏံမ္ဂးတှ်ေ ဒးကဵုပရေၚ်ဓလိုက်တမ်ရိုဟ်ရ။ တုဲပၠန် အကံက်ခေါန်ဂှ်လေဝ် ကၠုၚ်ဇၟာပ်သၞာံရလေဝ်။ သွက်တံဏံဂှ် စရိတ်အိုတ်တှ်ေ အလဵုဂွံပြေပြံၚ်ရော။ လ္တူကမၠောန်အဇာဍောတ်ကၠောန်အာစအာဗီုဏံဂှ်တှ်ေ ဣဏံဂှ် ဒှ်ဗီုပြၚ်မိက်ဂွံဗက်အကံက်အခေါန်ရဏး။ ဗက်အကံက်အခေါန်ဏောၚ်။ ကဵုပ္တိုန်စရၚ်ကမၠောန်ဏောၚ်၊ ပွတ္ၚေတ်လှုဲဍေံတံဗီုဏံဂှ် ပါလုပ်ကၠုၚ်သီုညးကၠောန်အာစအာတံယျ။ ပွတ္ၚေတ်သြန်လတေံဂှ် လ္တူညးကဆံၚ်လ္တူတံရ။ လၟုဟ်ဂှ်တှ်ေ ဒှ်မံၚ်ဗီုပြၚ် သီုကဵုတ္ၚေတ်မံၚ်သြန် စဵုကဵုညးဍုၚ်ကွာန်ကဆံၚ်သ္ဇိုၚ်တံရ” သာ်ဝွံ သ္ဂးရ။ 

ကံၚ်ဇြဳပၞာန်ဂှ် နကဵုညးသွံဖျာလ္တူအောန်လာၚ်တံဂှ် ကာလပ္တိုန်စရၚ်မ္ဂး ဒဒှ်ရကမၠောန်နွံဒၟံၚ်ဍာံဍာံဂှ် လိက်ထံက်ဂလာန်ဌာနဆေၚ်စပ် ဟွံသေၚ်မ္ဂး သ္ကိုပ်အုပ်ဓုပ်အရာပ်တံ သ္ဒးပါတုဲ စရၚ်ကေုာံတၚ်နၚ် ကပေါတ်ဗၞိက် ဟွံသေၚ်မ္ဂး ဂကူပရေၚ်ရေၚ်တၠုၚ် တၚ်ဒုၚ်လျိုၚ်တံဂှ်လေဝ် ဒးပ္တိုန်ထ္ၜးရောၚ်ဂှ် သ္ဂးရ။ 

သ္အာၚ်နူဂှ်ပၠန် နကဵုကပေါတ်ဗၞိက်သွံတြးတံဂှ် မ္ၚးနူတၚ်နၚ် ပၠုပ်ပ္တိုန်နူဍုၚ်လဵုရောဂှ် ကၠောန်ပ္တိတ်လဝ်အပ္ဍဲဍုၚ်မ္ဂးလေဝ် တၚ်နၚ်ဒဒှ်ရကၠောန်ပ္တိတ်တံ သ္ဒးပါတုဲ တၚ်နၚ်ဂကောံအလဵုသဳ ဌာနဆေၚ်စပ်တံ ကဵုလဝ်အခေါၚ်တံလေဝ် သ္ဒးပါရောၚ်ဂှ် လလောၚ်ပ္တိတ်လဝ်ရ။ 

ညးကၠောန်မံၚ်ကမၠောန်ပရေၚ်သွံရာန်ကပေါတ်အောန်လာၚ်မွဲတၠဂှ်လေဝ် ဟိုတ်နူပွဓရေပ်ဓရတ်ကံၚ်ဇြဳပၞာန်တံတုဲ ညးကၠောန်ကမၠောန်အဇာဍောတ်တံ သွက်ဂွံဒတူလိုၚ်ဂှ် ခက်ခုဲကၠုၚ်မာန်တုဲ ဗွဲမဂၠိုၚ်ဂှ် သၠးကၠုၚ်ကမၠောန်တံမာန်မံၚ်ရဂှ် ဟီုရ။ 

“စကစဂှ် ကၠောန်တွဵုရလေဝ်၊ ဍေံတံဂှ် မုအကံက်ခေါန်လေဝ်ဟွံဂွံရတှ်ေ။ ဆ္ဂးဂှ် သွက်ညးကၠောန်ကမၠောန်တံဂှ် ဒှ်ဒဒိုက်ရ။ စိုတ်လေဝ်ဒှ်ဒဒိုက်ရ။ ဂှ်တှ်ေ ဍေံဂှ်တှ်ေ အတိုၚ်မိက်ဂွံဗ္ဂေတ်ဂှ်ဗ္ဂေတ် အတိုၚ်မိက်ဂွံကၠောန်ဂှ် ကၠောန်တွဵုရ။ သွက်ညးဒးဒုၚ်မံၚ်တံဂှ် မ္ၚးနူစိုတ်ဟွံခိုဟ်တုဲ မုဂွံသ္ပမာန်ရော။ ညးကၠောန်ကမၠောန်အဇာဍောတ်တံဂှ် ဂွံမံၚ်ဂလိုၚ်လဵုရောၝာဲ။ ညးတံလေဝ် ဂွံစပုၚ်ဂှ် ဒးကၠောန်မံၚ်ဟွံသာရ ဟွံသေၚ်ဟာ။ ၜိုတ်တံဏံမွဲတဲဏး။ ညးကၠောန်ကမၠောန်အဇာဍောတ်တံလေဝ် မံၚ်ဟွံဂွံရ ဒှ်မံၚ်ရ။ ရံၚ်စမ်” သာ်ဝွံ သ္ဂးရ။ 

ကံၚ်ဇြဳပၞာန်ဂှ် နကဵုညးပ္တိုန်လဝ်စရၚ် အခေါၚ်သွံတြးလ္တူအောန်လာၚ်တံဂှ် ဒးပၠုပ်စရိတ်ပ္တိုန်စရၚ်ကေုာံ စရိတ်ရေၚ်တၠုၚ်အောန်လာၚ်တံ ပ္ဍဲဌာနစၞောန်ပ္ညုၚ် သၟဝ်တဲကံၚ်ဇြဳပၞာန်ဆေၚ်စပ်တံတုဲ ဂွံစၟတ်တဲပ္တိုန်စရၚ်မ္ဂး နကဵုအာယုက်စၟတ်တဲဂှ် ဂွံ ၂သၞာံရောၚ်ဂှ် သ္ဂးရ။ 

နကဵုညးဂွံစၟတ်တဲ ပ္တိုန်စရၚ်တံဂှ် ဒးကေတ်တာလျိုၚ်ပသောၚ်ကဵု လ္တူကပေါတ်ဗၞိက်တံကဵု ပရေၚ်ရေၚ်တၠုၚ်တံဂှ်တုဲ နူကဵုပရေၚ်သွံတြးလ္တူအောန်လာၚ်ဂှ်မွဲကဆံၚ် မ္ၚးနူ ဆဝ်မ္ၚုဟ် ပရေၚ်ဍုၚ်ကွာန်၊ သ္ဇက်ပရေၚ်ညးဍုၚ်ကွာန်ညိၚ်ဝတ်ၜိုဟ်သြိုဟ်တံကဵု ပရေၚ်ဂီုကၠီုသ္ဂောံလီုလာ်ဂှ် လလောၚ်တြးလဝ် သီုကဵုတၚ်ဒးဒုၚ်လျိုၚ်(၁၅)တၚ်တံရ။

က္ဍိုပ်သ္ကိုပ်ပၞာန်ဂှ် သွက်ကမၠောန် MSMEတံ သ္ဂောံတဴတက်ဂှ် ဟီုမံၚ်မွဲဏှမွဲဏှကီုလေဝ် လ္တူပတေၚ်ဂြတ်ထောံ ညးကၠောန်မံၚ်ပရေၚ်သွံရာန်အောန်လာၚ်တံဂှ် ပ္ဍဲဍာ်ဇမၠိၚ်ဂှ် ပရေၚ်သွံရာန်အောန်လာၚ်ဍောတ်တ်တံ ကၠေံအာရောၚ်မဒှ်တုဲ သၞောတ်ပရေၚ်ပိုန်ဒြပ်အောန်လာၚ်လေဝ် တဴတက်ကၠုၚ် ဟွံသေၚ်ရောၚ်ဂှ် ညးကၠောန်မံၚ် ပရေၚ်သွံရာန်အောန်လာၚ်တံ သ္ဂးအိုတ်ရ။ 

အတိုၚ်လဟီု တိုက်သြန်ဂၠးတိဂှ်မ္ဂး ကြဴနူဒပ်ပၞာန်သီအဝဵုတုဲ အကာဲအရာပရေၚ်ပိုန်ဒြပ်ဍုၚ်ဗၟာမစှ်ေမံၚ်ဂှ် စဵုကဵုအခိၚ်လၟုဟ်ဂှ် ကလေၚ်ယာက္ဍိုပ်ဟွံမာန်မွဲသာ်ဏီ ပရေၚ်စှ်ေမံၚ်ထပ်ကဵုထပ် ဟိုတ်နူမူဝါဒမဗၠေတ်မှာမံၚ်တံဂှ်တုဲ သ္ကဵုဇီုကပိုက်ကၠေံပရေၚ်ပိုန်ဒြပ်ကၟိန်ဍုၚ် ဒဵုလအိတ်အာယုက်ရဂှ် ပ္ဍဲဂိတုဂျောန် စၟတ်တ္ၚဲ ၂၇ဂှ် လလောၚ်ပ္တိတ်လဝ်ရ။ 

ပရိုၚ်-သြၚ်လောန်တိုၚ်မ် 

ဗီု-Social Media