ဂျာကာတာ၊ ဂျူလာၚ် (၂၃)
မၞိဟ်ကူသာန်သွံရာန်လဝ်မၞိဟ် (၁၂၂) တၠ သွက်ဂွံသွံတြးကောန်တၟံ ပ္ဍဲဍုၚ်ကာမ္ဗောဒဳယျာ ပါလုပ်သီုကဵု ဗၠာဲသၟိၚ် ကေုာံ သၞာဲဒဴ နူကဵုရုၚ်လဝကတံ (၁၂) တၠဂှ် သၟိၚ်တၠအဝဵုအေန်ဒိုဝ်နဳယှာတံ ဒဒှ်ရရပ်ဂွံလဝ်ဂှ် ပ္ဍဲဂိတုဂျူလာၚ် (၂၁) တေံ ဟီုဂးလဝ်ရ။
ညးတၠဒုဟ် သံသယနွံဒၟံၚ်တံဏံဂှ် စောဲအာဂဗုတ် နကဵုပွမဖံက်ပ္ကဝ် သၞောဝ်စဵုဒၞါသွံရာန်မၞိဟ် အေန်ဒိုဝ်နဳယှာတုဲ စၟဳတ်အာဏောၚ်မဒှ်တုဲ ဒဒှ်ရကလိလောန်လဝ်ဒုဟ် ပြာကတ်မ္ဂး သ္ဇက်ဂွံဒး ဒဏ်ထံၚ် ၁၅ သၞာံကဵု ဒဏ်သြန် ၆၀၀ ပြကောဋိကိုဋ် ရူပဳယာ နွံဒၟံၚ်ရ။
ရဲကူသာန်သွံရာန်မၞိဟ်ဂမၠိုၚ်ဝွံ ဆဝ်မ္ၚုဟ် ညးဍုၚ်ကွာန် အလုံဍုၚ်အေန်ဒိုဝ်နဳယှာတံ နူကဵုသိုဝ်ယှေဝ်မဳဒဳယျာမွဲကဆံၚ်တုဲ သွက်ဂွံလွဳပါ်ကရေက် ထ္ပက်အဇာကောန်တၟံဂှ် ပလံၚ်ကဵုလဝ် ကာမ္ဗောဒဳယျာရောၚ် ဂကောံဂၠိုက်ဂၠါဲစၟဳတ်ဂဗုတ်တံ ဟီုဂးလဝ်ရ။
မၞိဟ်ဒးဒုၚ်ကူသာန်သွံရာန်မၞိဟ်ဂမၠိုၚ်ဝွံ မွဲတၠမ္ဂး ကလိဂွံ ၁၃၅ ပြကောဋိကိုဋ် ရူပဳယာဏောၚ်ဂှ်လေဝ် ဟီုဂးလဝ်ရ။
“မၞိဟ်ဒးဒုၚ်ကူသာန်သွံရာန်မၞိဟ်ဂမၠိုၚ်ဝွံ ဟိုတ်နူနွံပၟိက်ကုသြန်တုဲ သွက်ဂွံသွံ အဝဲအၚ်္ဂအပ္ဍဲခန္ဓညးတံဂှ် တုပ်လဝ်စိုတ်ရ။ မၞိဟ်ဗွဲမဂၠိုၚ် အပ္ဍဲကဵုတံဏံဂှ် အပ္ဍဲကာလယဲကပ်ဂှ် က္တဵုဒှ်အာလဝ် ကမၠောန်ကၟိတ်ဟွံမွဲအိုတ်ရ” သာ်ဝွံ ဂကောံစၟဳတ်ဂၠိုက်ဂၠါဲဂဗုတ်တံ ဟီုဂးလဝ်ရ။
ပ္ဍဲကဵုဍုၚ်အေန်ဒိုဝ်နဳယှာဂှ် လၟေၚ်ဒဒှ်ကူသာန်သွံရာန်မၞိဟ်တံဂှ် ဒှ်အာဒၟံၚ် ညံၚ်ကဵုစပုၚ်သုၚ်ဍာ်ရတုဲ ကောန်ကမၠောန်ဗွဲမဂၠိုၚ်ဂှ်လေဝ် ဒးဆေၚ်ဒၟံၚ်မုက် ကုပြသၞာခတှ်တံအိုတ်ရ။
ပ္ဍဲသၞာံ ၂၀၁၉ တုဲကၠုၚ်တေံဂှ်လေဝ် သၟိၚ်တၠအဝဵုဂမၠိုၚ်ဝွံ ပ္ဍဲအရာဗ္တိုက်သ္အး ပရေၚ်ကူသာန်သွံရာန်မၞိဟ် ကဏ္ဍဇၞော်အိုတ် ဍုၚ်အေန်ဒိုဝ်နဳယှာဂှ် ရပ်ဂွံလဝ် ရဲတၠဒုဟ် ၈ တၠတုဲ မၞိဟ်ဒးဒုၚ်သွံ နဒဒှ်ကောန်ရဲစကာပ္ဍဲသ္ၚိ ဗၞတ် ၁၂၀၀ ဂှ် ဟံၚ်ပြာ်မာန်လဝ်ရ။
Ref; Reuters
sanlontai