နေပျဳဒဝ်၊ ဂျူလာၚ်(၂၅)
ခမဳသၚ် (၂၆) ဇကု ပါလုပ်သီုကျာ်ဇၞော်သဳတဂူ ကေုာံ နာဲဆေကိန္ဒ မဂွံဒုၚ်ရှ်ေသှ်ေ ကုက္ဍိုပ်သ္ကိုပ်ပၞာန်သီအဝဵု ဂအုပ်သ္ကိုပ်ဗိုလ်ဇၞော်မေန်အံၚ်လှာၚ် သၠဲသၠဲလးလးတအ်ဂှ် က္ဍိုပ်သ္ကိုပ်ပၞာန် အပ်ပြာပ်ဇိုန်ဏှၚ်ကဵု တဆိပ်ကြာရ။
ကျာ်ဇၞော်သဳတဂူ ညးမဒှ်သၟိၚ်သၚ်ဂိုဏ်ယှိုဲကျေန် ဒံက်တာဉာဏိဿရဂှ် နကဵုတဆိပ်ကြာ “တယျေသဳဒူ”၊ ဂအုပ်ပါမောက္ခတက္ကသိုလ်ထေရဝါဒဍုၚ်နာနာ ဓမ္မဒူတဒံက်တာဆေကိန္ဒဂှ် နကဵုတဆိပ်ကြာ “ဇြဳဒူ” ကေုာံ ကျာ်ဇၞော်တိပိဋကလ္ၚဵုတအ်ဂှ် အပ်ပြာပ်ဇိုန်ဏှၚ်ကဵုတဆိပ်ကြာ “တဳရိပျာန်” ရ။
တဆိပ်ကြာဇိုန်ဏှၚ်အပ်ပြာပ်ကဵု တၠဳလပိုန်သၚ်တအ်ဂှ် ဒှ်တဆိပ်ကြာ အပ်ပြာပ်ကဵုဒၟံၚ် သၞာဲဒဴကံၚ်ဇြဳပၞာန်ခါန်ကၞက်တအ်၊ သ္ကိုပ်ဗိုလ်ပၞာန် ကေုာံ ခရှ်တအ်တုဲ အခိၚ်လၟုဟ်ဏံ ခမဳသၚ်ဟွံဒစဵုဒစးကဵုကမၠောန်ဍေံ ပံၚ်ဖက်ဒၟံၚ်ကဵုဍေံတအ်လေဝ် က္ဍိုပ်သ္ကိုပ်ပၞာန် အပ်ပြာပ်ကဵုကၠုၚ်ရ။
သ္အာၚ်နူဂှ်ပၠန် သၞာဲဒဴဗိုလ်ပၞာန် နူဌာနဝန်ဇၞော်ပရေၚ်စဵုဒၞာကံၚ်ဇြဳပၞာန်ခါန်ကၞက်လဝ် ကောန်ဒပ်ဗၠာဲသၟိၚ်တအ် မပ္တံညးတာလျိုၚ် တိုက်သြန်အၚ်ဝ ဒပ်ပၞာန်ပိုၚ်၊ ကုမ္ပဏဳပုဂ္ဂလိက် ကေုာံ ကဝ်ပိုဝ်ရေယှေန်မျာန်မဇြဳပွာယျေ ခရှ် ၂၀၅ တၠတအ်ဂှ်လေဝ် အပ်ပြာကဵုလဝ် တဆိပ်ဂုဏ်တၟေၚ်ဇဳရ။
ညးမက္လိဂွံတဆိပ်ကြာ ကံၚ်ဇြဳပၞာန်ဇိုန်ဏှၚ်အပ်ပြာပ်ကဵုတအ်ဂှ် ဟိုတ်နူရေၚ်တၠုၚ်ကဵုလဝ် သွက်ပရေၚ်ပ္တန်ကျာ်မာရဝိဇယ ကေုာံ ပရေၚ်ဂီုကၠီုကၟိန်ဍုၚ် ပရေၚ်အုပ်ဓုပ်သၞောဝ်ဓဝ် သွက်ပရေၚ်ဖောအ်ဗြေဝ်တဴတက်ရဂှ် ကံၚ်ဇြဳပၞာန် လလောၚ်တြးလဝ် ပ္ဍဲဂိတုဂျူလာၚ် စၟတ်တ္ၚဲ (၂၃)ဂှ်ရ။
ကြဴနူဒပ်ပၞာန်သီအဝဵုတုဲ လကြဴဏံ ပ္ဍဲတ္ၚဲတၟေၚ် တ္ၚဲပြဲတအ်ဂှ် သၞာဲဒဴကံၚ်ဇြဳပၞာန်ခါန်ကၞက်၊ ဗိုလ်ပၞာန်တအ် သၟာအနုသုခုမတအ်ကေုာံ ပူဂဵုခရှ်တအ် ပါလုပ်သီုက္ဍိုပ်သ္ကိုပ်ကောန်ဍုၚ်အရၚ်တအ်ဂှ် က္ဍိုပ်သ္ကိုပ်ပၞာန် အပ်ပြာပ်ကဵုဒၟံၚ်တဆိပ်ကြာ နာနာသာ်ရ။
သၞာံတုဲကၠုၚ်တေံ နဒဒှ်စၟတ်သမ္တီ တ္ၚဲအံၚ်ဇၞးကောန်ဂကူ က္ဍိုပ်သ္ကိုပ်ပၞာန် အပ်ပြာပ်ကဵုလဝ် ကျာ်ဇၞော်တိုက်မသိုဝ်ယုၚ် ဥူဝိရဒူ ညးချဳဒရာၚ်ကတိုက်ကၟဟ်ပရေၚ်ကောန်ဂကူ တဆိပ်ကြာ “တဳရိပျာန်” ဏီရ။
ပရိုၚ် -သြၚ်လောန်တိုၚ်(မ်)
ဗီုရုပ် -Social Media
sanlontai