ညးပါဲဒဴဘဲပၞာန်ဒေသယာဒိုဝ် မ္ဒးဂြိပ်ဒဴဒၟံၚ်အလုံကွာန်မွဲတံ နွံပၟိက်ဒၟံၚ်ကဵု အရီုဗၚ်ပရေၚ်ဗ္စာရဏာမၞိဟ်

(သံတောၚ်ကြီး) ၊ ဂျူလာၚ် (၂၅)

သွက်ညးဍုၚ်ကွာန်ပါဲဒဴဘဲပၞာန် နူကဵုကွာန် မၞုံအပ္ဍဲဒေသယာဒိုဝ် သ္ကုတ်သၟဝ်ကျာတွဵုရးကရေၚ် မ္ဒးဂြိပ်ဒဴပါဲဒလေတ်ဒၟံၚ် အလုံကွာန်မွဲ ဒၟါနူပေါဲဗ္တိုက်တံဂှ် နွံပၟိက်ဒၟံၚ်ကဵု အရီုဗၚ်ဇွောံမစၞစ၊ ဂဥုဲဇဗ ကေုာံ ကပေါတ်အရပ်စပ်တံရောၚ်ဂှ် ညးမရီုဗၚ်ရေၚ်တၠုၚ်ကဵုဒၟံၚ် ပရေၚ်ပါဲဒဴဘဲပၞာန်တံ ဟီုရ။

ပပ္တံနူ ဂိတုဂျူလာၚ် (၁၁) တုဲကၠုၚ်တေံတုဲ ပ္ဍဲကဵုကွာန်ယာဒိုဝ်၊ ဍုၚ်ဠုက်ဒိုဝ်၊ ပွိုၚ်ဍုၚ်(သံတောၚ်ကြီး) ပယျဵုတွဵုရးသေံ ကဵု တွဵုရးကရေၚ် မၞုံအပ္ဍဲတိဍာ်ဒပ်မဟာ (၂) ဗော်သွးကောန်ဂကူကရေၚ် KNU ဂှ် အကြာဒပ်ကံၚ်ဇြဳပၞာန်ကဵု ဂကောံဒပ်ပံၚ်ကောံမဟာမိတ် ဂကောံဇြဟတ်ပၠန်ဂတး KNLA တံဂှ် က္တဵုဒှ်လဝ် ပေါဲဗ္တိုက်သ္ကာတ်မြဟ်ရ။

အပ္ဍဲပေါဲဗ္တိုက်ဒေသယာဒိုဝ်ဂှ် လ္ပာ်ကံၚ်ဇြဳပၞာန် ဗ္တိုက်ဏာလဝ် နကဵုတရဴကျာ ဂၠိုၚ်ကဵုလ္တုန်တုဲ ဟိုတ်နူပရေၚ်ဗ္တိုက်ဂှ်တုဲ စမြိုၚ်ဘာသာ ကေုာံ သ္ၚိမၞိဟ်ဒၟံၚ်၊ ဂၠံၚ်ကွဳစက် မၞုံအပ္ဍဲကွာန်ယာဒိုဝ်၊ ဝါဗာန်ခိုဝ်၊ ကလေထ၊ (ပရယ်စို့) ကေုာံ ကွာန်ဝါတဝ်ခိုဝ်တံ ဇီုကပိုက်လီုလာ်အာလဝ်တုဲ လၟိဟ်မၞိဟ်ဂၠိုၚ်ကဵုလ္ၚီ ဒးပါဲဒဴဒၟံၚ်ဘဲပၞာန်ရောၚ်ဂှ် ဂွံတီကေတ် ဇရေၚ်ညးမရီုဗၚ်ရေၚ်တၠုၚ်ကဵုဒၟံၚ် ပရေၚ်ပါဲဒဴဘဲပၞာန်တံရ။

သွက်ညးပါဲဒဴဘဲပၞာန် မဒးဂြိပ်ဒဴပါဲဒလေတ်ဒၟံၚ်တံဂှ် အခက်အခုဲ ဇွောံမစၞစ ကေုာံ ဂဥုဲဇဗတံနွံတုဲ နွံပၟိက်ဒၟံၚ်ကဵု အရီုဗၚ်ပရေၚ်ဗ္စာရဏာမၞိဟ်ဂမၠိုၚ် မပ္တံကဵုဇွောံမစၞစ၊ ဗွိုက်လ္တက်၊ ယာတ်ကၞဴ၊ ဒၞါဲမံၚ်တန်တဴ၊ ဂဥုဲ တံရောၚ်ဂှ် ညးမရီုဗၚ်ရေၚ်တၠုၚ်ကဵုဒၟံၚ်ပရေၚ်ပါဲဒဴဘဲပၞာန်တံ ဟီုရ။

ပေါဲဗ္တိုက် နူအပ္ဍဲဒေသယာဒိုဝ်ဂှ်ဝွံ ပပ္တံနူတ္ၚဲစဒှ်ပေါဲဗ္တိုက်တုဲ စဵုကဵုတ္ၚဲဏံ ပွိုၚ်ၜါသတ္တာဟဂှ် အကြာကံၚ်ဇြဳပၞာန်ကဵု ဂကောံဇြဟတ်ပၠန်ဂတး KNLA တံ ပရေၚ်ပၞာန်ကြံၚ်မ္ၚိုဟ်တံ ဆက်က္တဵုဒှ်ဒၟံၚ်ရောၚ် ဂွံတီကေတ်ရ။

ဟိုတ်နူအကာဲအရာပရေၚ်ပၞာန်တုဲ ညးဍုၚ်ကွာန်ဒေသ မ္ဒးဂြိပ်ဒဴပါဲဒလေတ်ဒၟံၚ်ဂှ်ဝွံ ဒဵုကဵုအခိၚ်လၟုဟ် စဴဌာန်ဒၟံၚ်ဟွံမာန်ဏီပုဟ်ဂှ်လေဝ် ဂွံတီကေတ် ဇရေၚ်ပရိုၚ်တမ်ရိုဟ်ဒေသတံရ။

ပရိုၚ်−သြၚ်လောန်တိုၚ်(မ်)

ဗီု−KNU