PDF ဒေသတံ လုပ်စိုပ်ဍိုက်ဗ္တိုက် ဗ္ဒိုပ်ကၚ်ကံၚ်ဇြဳပၞာန် နူကဵုလံၚ်လုၚ်

လံၚ်လုၚ်၊ ဂျူလာၚ် (၂၅)

ကြဴနူလုပ်စိုပ်ဍိုက်ဗ္တိုက် ဗ္ဒိုပ်ကၚ်ပံၚ်တောဲ ပျူသဝ်ထဳကဵု ဒပ်ကံၚ်ဇြဳပၞာန် မၞုံပ္ဍဲကွာန်ကျံက်နဳမဝ် ပွိုၚ်ဍုၚ်လံၚ်လုၚ်၊ ရးဒေသဇၞော်တၞၚ်သဳဂှ်တုဲဂှ် စံၚ်ပလီုပလာ်လဝ်ရောၚ် ဂကောံဒပ်စဵုဒၞါညးဍုၚ်ကွာန် ပွိုၚ်ဍုၚ်လံၚ်လုၚ် (LLPDF) တံ လလောၚ်ပ္တိုန်လဝ်ရ။

ပ္ဍဲဂိတုဂျူလာၚ် (၁၉) အခိၚ်နူဂယး ၜိုတ် (၅) နာဍဳဂှ် ဂကောံဒပ်စဵုဒၞါဒေသတံ လုပ်စိုပ်ဍိုက်ဗ္တိုက်လဝ် ဗ္ဒိုပ်ကၚ်ယျေဝ်ချံၚ် နူကဵုဒပ်ကံၚ်ဇြဳပၞာန်ကဵု ဂကောံပျူသဝ်ထဳတံ မကံက်ဒၟံၚ်အခေါန် ဗ္ဒါဲကွာန်ကျံက်နဳမဝ်ဂှ်ရ။

အဃောလုပ်စိုပ်ဍိုက်ဗ္တိုက်ဗ္ဒိုပ်ဂှ် ပသောၚ်ဏာလဝ် သီုကဵုညးမၚ်ကၚ် ဂကောံပျူသဝ်ထဳ ကိုဝ်ထောန်ဝါ ကဵု ကိုဝ်မျံက်တံ (၂) တၠဂှ်တုဲ သ္ၚိဒၟံၚ်ပျူသဝ်ထဳ ကြပ်ဒၟံၚ် ကုဗ္ဒိုပ်ကၚ်ဂှ်လေဝ် စံၚ်ပလီုပလာ်လဝ်ရောၚ်ဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။

လၟေၚ်ဒဒှ်ဏံဝွံ ကေတ်အခေါၚ်ခိုဟ်ကဵု လ္တူဂကောံဒပ်ကံၚ်ဇြဳပၞာန်တံ ကလောန်ယှုက်ဒၟံၚ် လ္တူဂၠုၚ်စက်ဗ္ကပ်အာ ပ္ဍဲအကြာတ္ၚဲဏံဂှ်တုဲ လုပ်စိုပ်ဍိုက်ဗ္တိုက်လဝ်ရောၚ်ဂှ် ညးဒုၚ်တာလျိုၚ် လလောၚ်ပရိုၚ် ဂကောံဒပ်စဵုဒၞါညးဍုၚ်ကွာန် ပွိုၚ်ဍုၚ်လံၚ်လုၚ် (LLPDF) တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ကြဴနူဒးဒုၚ်လုပ်စိုပ်ဍိုက်ဗ္တိုက်တုဲဂှ် အခိၚ်ဂကောံဒပ်စဵုဒၞါညးဍုၚ်ကွာန်တံ ကလေၚ်ဆုတ်စ္ဍးအာဂှ် ပ္ဍဲကဵုဗ္ဒါဲပွဳပွူ ဗ္ဒိုပ်ကၚ်ပံၚ်တောဲ ကံၚ်ဇြဳပၞာန်ကဵု ပျူသဝ်ထဳတံဂှ် ပ္စူလဝ်မာၚ်ထိၚ်ဇမ္ၚောဲ (၅) မရ။

အခိၚ်ဒပ်ကံၚ်ဇြဳပၞာန်ကဵု ကောန်ဂကောံပျူသဝ်ထဳ (၅) တၠ စိုပ်ကၠုၚ်ဗဵု လ္တူလၟေၚ်ဒဒှ်ဗ္ဒိုပ် ကၚ်ဒးဒုၚ်ဗ္တိုက်ဂှ် ဖံက်ဗ္တိုဟ်လဝ် နကဵုမာၚ်ထိၚ်ဇမ္ၚောဲတုဲ (၃) တၠ ထပ်ချိုတ်အာလဝ်ရ။

ဂကောံဒပ်စဵုဒၞါညးဍုၚ်ကွာန် ပွိုၚ်ဍုၚ်လံၚ်လုၚ် (LLPDF) ဂှ်ဝွံ ပ္ဍဲဂိတုဂျူလာၚ် အခိၚ်ဗ္တံဂှ်လေဝ် ပန်ပှော်ဗ္တိုက်လဝ် ဒၞါဲဒတန်သ္ၚိဝန်ဇၞော်ဂမၠိုၚ် မၞုံဍုၚ်ထဝါဲ၊ ရးဒေသဇၞော်တၞၚ်သဳ နကဵုလွဟ်ဇၞော်ဂှ် လလောၚ်ပ္တိတ်လဝ်ရ။

ပရိုၚ်−သြၚ်လောန်တိုၚ်(မ်)

ဗီု−LLPDF