ပံၚ် – ဂျူလာၚ် (၂၅)
တွဵုရးဍုၚ်မန်၊ ပွိုၚ်ဍုၚ်ပံၚ် ပ္ဍဲဆေၚ်စသုၚ် သ္ကဲဂၠံၚ်ကွဳစက် လဂုၚ်-မတ်မလီု ပ္ဍဲကွာန်ဥတ္တံတာဂှ် သီုဗၠာဲသၟိၚ်ထိၚ်ရးကွာန်ဥတ္တံတာ ဒးဒုၚ်ပန်ဂစိုတ်လဝ် (၂)တၠရဂှ် ညးဒေသတအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ပရေၚ်ဒဒှ်ဂှ် ဂိတုဂျူလာၚ် စၟတ်တ္ၚဲ (၂၂) အခိၚ်ဇိုၚ်သဝ်တ္ၚဲ ပါဲနူဖျိုဝ်ယျေဝ်ဇြဝ်အောၚ် ညးမဒှ်ဗၠာဲသၟိၚ်ထိၚ်ရး ကွာန်ဥတ္တံတာ သ္ကုတ်တိဍာ်ဗၠာဲသၟိၚ်ဇိုၚ်ကျာ် ကိုဝ်ဇြဳဒူတအ်ညးၜါတၠ ဃောဂ္ဇအ်ဒၟံၚ် ပ္ဍဲဆေၚ်စသုၚ်ဂှ် သၟာလွဟ်တအ် လုပ်စိုပ်ပန်ပှော်လဝ်ရ။
“မွဲဂှ် ထိၚ်ရး။ မွဲဂှ် ကောန်အရာပ်။ ကၠောန်ဒၟံၚ်ဝံက်ယှပ်ကွဳစက် မိၚ်လဝ်ရ။ သၟာလွဟ်ဂှ် မၚ်ရံၚ်ဒၟံၚ် ထိၚ်ရးဂှ်ဟာ။ ဂွံပရိုၚ်တုဲ ကၠုၚ်ပန်လဝ်ဟာဂှ် ဟွံတီပုဟ်။ သီုညးၜါ ဒးချိတ်လဝ်ဒၞာဲဂှ်ရ” ညးဒေသမွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ဟိုတ်နူဒးဒုၚ်ပန်ပှော်လဝ်တုဲ ဘဲဝပ်ဒးလဝ်လွဟ် ပ္ဍဲတံတက်ဗၠာဲသၟိၚ်ထိၚ်ရး ဖျိုဝ်ယျေဝ်ဇြဝ်အောၚ် ကေုာံ ပ္ဍဲညးနွံယၟုဇြဳဒူဂှ် နကဵုဘဲဝပ်မကမ် ဒးလဝ်ပ္ဍဲသြိုဟ် ဒးချိုတ်လဝ်ရ။
ကြဴနူဂှ် သၟာလွဟ်တအ် ကလေၚ်တိတ်အာကဵုကွဳလိုန်ဓာတ်တုဲ ကောန်ဒပ်ကံၚ်ဇြဳပၞာန်တအ် ကၠုၚ်စိုပ်စၟဳစၟတ်လဝ်တုဲ ဇွတအ်ဂှ် ပလံၚ်ဗစိုပ်ဏာ ပ္ဍဲရုၚ်ဂဥုဲညးဍုၚ်ကွာန် ပွိုၚ်ဍုၚ်ပံၚ်ရဂှ် ဂွံတီကေတ်ရ။
စပ်ကဵုပရေၚ်ပန်ပှော်ဏံတုဲ နူဂကောံလဵု ကၠောန်လဝ်ရောဂှ် စဵုကဵုအခိၚ်လၟုဟ် ဟွံဂွံလလောၚ်တြးပ္တိတ်လဝ်ဏီရ။
ပ္ဍဲဂိတုဒဳဇြေမ်ဗာ သၞာံတုဲကၠုၚ်တေံ သ္ကုတ်ကၠာဂှ်လေဝ် မျိုဝ်ကိုဝ်ကိုဝ် ညးမဒှ်ဗၠာဲသၟိၚ်ထိၚ်ရးကွာန်ဥတ္တံတာ ကေုာံကောန်ဒပ်ဗၠာဲသၟိၚ်မွဲတၠ ဒးဒုၚ်ပန်ဂစိုတ်လဝ် ပ္ဍဲဂၠံၚ်ကွာန်ဖလာတ်ဏီရ။
ပရိုၚ်-သြၚ်လောန်တိုၚ်(မ်)
ဗီုရုပ် – CJ
sanlontai