ၜဳကလေၚ်၊ ဂျူလာၚ်(၂၅)
ဂကောံကၠုၚ်ပလေဝ်ဒဒန်ကြုၚ်အုပ် ၜဳကလေၚ် ပ္ဍဲဂၠံၚ်ကွဳစက် လဂုၚ်-မတ်မလီု ဒးဒုၚ်ဖံက်ခတိုဟ်လဝ်မာၚ်ဂှ် ပ္ဍဲဂိတုဂျူလာၚ် စၟတ်တ္ၚဲ (၂၃) အခိၚ်ဗ္တံဂှ် ဒးဒုၚ်ထပ်ဗတိုက်လဝ်ကဵုဒရုမ်ရဂှ် ညးဒေသတအ် ဟီုကဵုဌာန်ပရိုၚ်သြန်လောန်တိုၚ်(မ်)ရ။
တွဵုရးဍုၚ်မန် အကြာပွိုၚ်ဍုၚ်သဓီုကဵု ပွိုၚ်ဍုၚ်ၜဳကလေၚ် ဗ္ဒာဲကွာန်ယှိုဲယောၚ်ပျ ပ္ဍဲဂၠံၚ်ကွဳစက် လဂုၚ်-မတ်မလီု ဂကောံကၠုၚ်ပလေဝ်ဒဒန်ကြုၚ်အုက်ဂှ် ဒပ်ပံၚ်ကောံ ဂကောံဇြဟတ်ပၠန်ဂတးတအ် ဗတိုက်ထောံဖျေံလဝ်ဗုမ် ကဵုဒရုမ် ပ္ဍဲဂိတုဂျူလာၚ် စၟတ်တ္ၚဲ (၂၃) အခိၚ်ဗ္တံရ။
ဟိုတ်နူဒးဒုၚ်ထောံဖျေံလဝ်ဗုမ်ကဵုဒရုမ်တုဲ ၜိုန်ရမၞိဟ်ဇီုကပိုက်ဒလဝ်ဘဲဝပ်ဟၟဲကီုလေဝ် ပရေၚ်ပလေဝ်ပလေဝ်ဒဒန်ဘေလဳယာယဳဂှ် ဒးဒေါံဇူလဝ် မွဲလွာဲဓဝ်ရဂှ် ဂွံတီကေတ် နူညးဒေသတအ်ရ။
ဒဒန်ကြုၚ်အုက် ဒးဒုၚ်ဖံက်ခတိုဟ်လဝ်မာၚ်ဂှ် သွက်ဂွံထ္ပက်ဒဒန်ဘေလဳယာယဳ ဒပ်ကံၚ်ဇြဳပၞာန်၊ ဌာနက္ဍိုက်က္ဍိုပ်ဂၠံၚ် ကေုာံ ညးယိုက်ဝန် ကုမ္ပဏဳယှိုဲတာန်လွေန်တအ် ကၠုၚ်စိုပ်သိုၚ်ခၞံဒၟံၚ်တုဲ ဂကောံကၠုၚ်ပလေဝ်ဂၠံၚ်တအ်ဂှ် သီုအလန်ဏံမွဲအလန်မ္ဂး ဒးဒုၚ်ဗတိုက်လဝ်ကဵုဒရုမ် ဒှ်ကၠုၚ် မရနုက်ကဵု (၇) ဝါရ။
ၜိုန်ရဂကောံပလေဝ်ဒဒန် ဒးဒုၚ်ဗတိုက်ကဵုဒရုမ်ကီုလေဝ် လ္ပာ်ကံၚ်ဇြဳပၞာန်ဂှ် ညံၚ်ဒဒန်ဘေလဳယာယဳ ဂွံစိုပ်ဒတုဲဗွဲမပြဟ် သွက်ဂွံရေၚ်တၠုၚ်ကဵုဂှ် ဟိုတ်နူကဵုဒၟံၚ်ဇြဟတ်ဒရိုဟ်တုဲ ဒးဒှ်ဒၟံၚ်ဓဝိၚ်ကဵု အန္တရာယ်လမျီုရဂှ် ညးယိုက်ဝန် ပါလုပ်ဒၟံၚ် ပ္ဍဲကမၠောန်ဂှ်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ပ္ဍဲဂိတုဂျောန် စၟတ်တ္ၚဲ(၂၉) ဂှ် ဒးဒန်ကြုၚ်အုက် ဒးဒုၚ်ဖံက်ခတိုဟ်လဝ်မာၚ်တုဲ ဂကောံပံၚ်တောဲကံၚ်ဇြဳပၞာန် ကၠုၚ်စၟဳစၟတ်ဒဒန်ဂှ် ဒးထပ်ဒုၚ်ဗတိုက်လဝ်ပၠန်ဂှ်ရ ပါလုပ်သီုညးယိုက်ဝန်ဌာနမဆေၚ်စပ် (၂) တၠ ဒးချိုတ်လဝ် (၃) တၠတုဲ ဒးလဝ်ဝပ် (၂၆)တၠဏီရ။
ပရေၚ်ဖံက်ခတိုဟ်ပလီုပလာ်ဒဒန်ကြုၚ်အုက်ဏံဂှ် လဂွံကဵုပရေၚ်ပၞာန် ကုတ်ဗပိုတ်ထောံဂၠံၚ်ထံက်ပလံၚ်ကံၚ်ဇြဳပၞာန်ရဂှ် ဥက္ကဋ္ဌကောပ်ကာဲကေၚ်ကာမိတ် KNU ခရိုၚ်သဓီု ဟီုသ္ဂးလဝ်ရ။
ပရိုၚ် – သြၚ်လောန်တိုၚ်(မ်)
ဗီုရုပ် – CJ
sanlontai