ပ္ဍဲညးဍုၚ်ကွာန်ပါဲဒဴဘဲပၞာန်ကရေၚ်ဍာဲတံဂှ် ပရေၚ်က္တဵုဒှ်ယဲဇွဟ်တံ ဒှ်ကၠုၚ်သ္ဇက်ဒးဂွိၚ်

လွိုၚ်ကဝ်၊ ဂျူလာၚ်(၂၅)

ဟိုတ်နူပေါဲဗ္တိုက်ၜါလ္ပာ် မၞုံပ္ဍဲတွဵုရးကရေၚ်ဍာဲတံဂှ်တုဲ ပ္ဍဲညးဍုၚ်ကွာန်ဒးဂြိပ်ဒဴပါဲဓလေတ်မံၚ်ဘဲပၞာန် ပ္ဍဲဒဵုဂြပ်တံဂှ် ပရေၚ်က္တဵုဒှ်ယဲဇွဟ်တံ သၠုၚ်တိုန်ကၠုၚ်သ္ဇက်ဒးဂွိၚ်ရဂှ် ညးရီုဗၚ်မံၚ်ပရေၚ်ပါဲဒဴဘဲပၞာန်တံ ဟီုကဵုဌာန်ပရိုၚ်သြၚ်လောန်တိုၚ်မ်ရ။

သ္ပတံနူဂိတုဂျောန်လ္ပာ်မံက်တုဲကၠုၚ်တေံဂှ်တုဲ ပ္ဍဲတွဵုရးကရေၚ်ဍာဲဂှ် အကြာဒပ်ကံၚ်ဇြဳပၞာန်တံကဵု ဂကောံဇြဟတ်ပၠန်ဂတးတံဂှ် ဟိုတ်နူပေါဲဗ္တိုက်ကလေၚ်မွဲဝါပၠန်တံ သ္ကာတ်မြဟ်ကၠုၚ်ဂှ်ရ လၟိဟ်ညးပါဲဒဴဘဲပၞာန် ထောံလသာဌာန်ဒၟံၚ်တံ ထပ်ဂၠိုၚ်တိုန်ကၠုၚ် မဒှ်ရ။

ညးဍုၚ်ကွာန်ပါဲဒဴဘဲပၞာန် ဒးဂြိပ်ဒဴပါဲဓလေတ်မံၚ်တံ ဟိုတ်နူဒးမံၚ်ကၠုၚ်လဝ် ပ္ဍဲဒဵုဂြပ်တံ မွဲသတ္တဟပြၚ်ဂှ်ရ က္တဵုဒှ်မံၚ်ယဲဇွဟ် နကဵုဂအုံဗွဝ်ရ။

ယဲဇွဟ်ဂှ် ပ္ဍဲညးဍုၚ်ကွာန်ပါဲဒဴဘဲပၞာန် ဒးဂြိပ်ဒဴပါဲဓလေတ်ကၠုၚ်ဟိုတ်နူပေါဲဗ္တိုက်တၟိတံဂှ် ဂွံဆဵုဂၠိုၚ်ကၠုၚ်တုဲ ပ္ဍဲမၞိဟ် (၁၀)တၠဂှ် က္တဵုဒှ်မံၚ်ယဲ စဵုကဵု (၅)တၠရဂှ် ညးရီုဗၚ်ကဵုမံၚ်ပရေၚ်ပါဲဒဴဘဲပၞာန်မွဲတၠဂှ် ဟီုရ။

“ပ္ဍဲညးဍုၚ်ကွာန်ပါဲဒဴဘဲပၞာန် ပါဲကၠုၚ်နူလ္ပာ်ကွာန်တၟိတံဂှ် ယဲဇွဟ်တံပါကၠုၚ်ရ။ မုဒှ်ရောဟီုတှ်ေ ညးတံဂှ် ဒးတိက်လဝ်ပ္ဍဲဂြပ် ၜိုတ် ပန် မသုန် စှ်တ္ၚဲတှ်ေ။ တိက်လဝ်တုဲမှ စိုပ်ကၠုၚ်လ္ပာ်ဏံတှ်ေ ယဲဇွဟ်တံနွံမံၚ်အိုတ်ရ။ ယဲဇွဟ်ဂှ် ဒှ်ပ္ဍဲမိၞဟ်ဇၞော်ဇၞော်တံကဵု ကောန်သ္ဂံၚ်တံဂၠိုၚ်ရ။ ပြဟ်ဟ်ဏံ ပိုဲတံဒးဟီုတှ်ေ ပ္ဍဲညးပါဲဘဲပၞာန် ပ္ဍဲဂြပ်ပြဟ်ဟ်ဏံ စှ်တၠဂှ် အောန်အိုတ် (၅)တၠဂှ် ဒှ်မံၚ်ယဲဇွဟ်ရ။ ပ္ဍဲမွဲဒမြိပ် ဒဳမဝ်သဵုဂှ်တှ်ေ ပြဟ်ဟ်ဏံ ဟွံဂွံဆဵုကေတ်ဏီရ။ မုဟိုတ်ရောတှ်ေ ညးတံဂှ် နွံမံၚ်ပ္ဍဲဗ္ဒိုပ်တှ်ေ ပရေၚ်ကၠောံထၞာန် ဟွံမွဲဏီရ။ ဆ္ဂး လၟုဟ်ညးပါဲကၠုၚ် နူလ္ပာ်မေဝ်သေအ်၊ ဗဝ်လခေဝ်တံဂှ် ဒးမံၚ်လဝ်ပ္ဍဲဂြပ်ဂှ်ရ ယဲဇွဟ်တံပါကၠုၚ်ဂှ် နွံဗွဲမဂၠိုၚ်ရ” သာ်ဝွံ သ္ဂးရ။

ပ္ဍဲတွဵုရးကရေၚ်ဍာဲဂှ် ဟိုတ်နူပေါဲဗ္တိုက်တုဲ ညးဒေသ ၂ကိုဋ်ပြၚ် ဒးဂြိပ်ဒဴဘဲဓလေတ်မံၚ်တုဲ ဗွဲမဂၠိုၚ်တံဂှ် ဗ္ဒဗ္ဒါဲမံၚ် ပ္ဍဲဗ္ဒိုပ်ပါဲဒဴဘဲပၞာန် မၞုံပွိုၚ်ဍုၚ်ဒဳမဝ်သဵုသ္ကုတ်ပလိုတ်ဂှ်အိုတ်ရ။

ပ္ဍဲညးဒေသ ဗ္ဒဗ္ဒါဲမံၚ် ပ္ဍဲဗ္ဒိုပ်ပါဲဒဴဘဲပၞာန်တံဂှ်လေဝ် ပရေၚ်က္တဵုဒှ် ယဲပုၚ်ကေုာံ ယဲဇွဟ်တံ ဂၠိုၚ်ကၠုၚ်တုဲ ပရေၚ်ယဲသ္ကာတ်မြဟ်တံနွံမံၚ်ရဂှ် ညးရီုဗၚ်ကဵုမံၚ် ပရေၚ်ပါဲဒဴဘဲပၞာန်တံ သ္ဂးရ။

ဆ္ဂး ပ္ဍဲအရာရာန်ဂဥုဲဇဗလ္တူဍုၚ်လွိုၚ်ကဝ် သွက်ညးဍုၚ်ကွာန်ပါဲဒဴဘဲပၞာန်တံဂှ်လေဝ် ပွသၟာန်သၟုက်ဒပ်ကံၚ်ဇြဳပၞာန်တံ နွံမံၚ်တုဲ ဒးဒုၚ်ရပ်ဒက်မံၚ် ခြာဟွံလအ်ဟွံလအ် မဒှ်ရ။

ပ္ဍဲတွဵုရးကရေၚ်ဍာဲ ဂကောံဇြဟတ်ပၠန်ဂတး ဇြဟတ်ခိုဟ်မံၚ်ဂှ်တှ်ေ ဟိုတ်နူဒပ်ကံၚ်ဇြဳပၞာန်တံ သၞောတ်ဗ္ၜတ်လဝ် အခေါၚ်ယိုက်ဏာနၚ် ဂဥုဲဇဗကေုာံဇွောံမတံဂှ်ရ သွက်ညးပါဲဒဴဘဲပၞာန်တံဂှ် ပရေၚ်ဒးဂွိၚ်ကုပရေၚ်ထတ်ယုက်တံ ဒှ်ကၠုၚ်ရဂှ် ဂွံတီကေတ် အတိုၚ်လဟီု ညးရီုဗၚ်ကဵုမံၚ်ပရေၚ်ပါဲဒဴဘဲပၞာန်တံရ။

ပရိုၚ်-သြၚ်လောန်တိုၚ်မ်

ဗီု-Nway Oo Guru Lay Myar