ပ္ဍဲတ္ကအ်ဂရိ ဟိုတ်နူပၟတ်ဂြိုပ်တူဇၞော်ဇၞော် က္တဵုဒှ်တုဲ ညးအာတရဴဂေတ်ဂၠးတိ ဂၠိုၚ်ကဵုလ္ၚီ ဒးဂြိပ်တိတ်လဝ်

အေဒေန်၊ ဂျူလာၚ် (၂၅)

ပ္ဍဲဂိတုဂျူလာၚ် (၂၃) တုဲကၠုၚ်တေံ ပ္ဍဲကဵုတ္ကအ်ဍုၚ်ဂရိ ဟိုတ်နူပၟတ်ဂြိုပ်တူတုဲ ကၟုဲအာတရဴဂမၠိုၚ် လကိုတ်လကိုတ်တ္ၚဵုတ္ၚဵု ဒးဂြိပ်လဝ်တုဲ ညးဒေသ ဂၠိုၚ်ကဵုလ္ၚီတံလေဝ် ဒးဂြိပ်ဒဴပါဲဒလေတ်ဒၟံၚ်အိုတ်ရ။

ပ္ဍဲကဵုတ္ၚဲအဒိုတ် လက္ကရဴဏံဂှ်လေဝ် ပ္ဍဲကဵုတ္ကအ်ဂရိဒယှ် ကဝ်ဖူ မကၠောန်သ္ပဆုဲပြံၚ်ဒၟံၚ် ဒၞါဲဗၠးဘဲတံ နူကဵုတရဴဍာ်ဂှ်လေဝ် ဒဒှ်ရပၟတ်ဂြိုပ်တူ က္တဵုဒှ်လဝ်ဂှ် ပရိုၚ်ဂမၠိုၚ် မံက်တိတ်ဒၟံၚ်ရ။

ပရေၚ်ဒဒှ်ပၟတ်ဂြိုပ်တူ မက္တဵုဒှ်လဝ် ပ္ဍဲကဵုရာသဳအာတရဴ တ္ကအ်ရသ်ဒ်ဂှ် သၟာသိုဟ်ပၠိုတ်ပၟတ်တံ ရပ်စပ်သောၚ်ကလးလဝ်တုဲ နူကဵုဘဲပၟတ်ဂြိုပ်ဇၞော်အိုတ် ပ္ဍဲကဵုကၟိန်ဍုၚ်ဂှ် ဆုဲပြံၚ်ကဵုလဝ် ညးအာတရဴတံ ပ္ဍဲဒၞါဲဗၠးဘဲတံရ။ လၟေၚ်တရဴက္ၜၚ်ကျာတံကဵု တ္ၚဲဇူတံဂှ်လေဝ် ရုပ်သီလဝ်ရ။

ကၟုဲအာတရဴ တ္ၚဲဇူ ဂၠိုၚ်ကဵုကၠံတံဝွံ ၜေတ်ဓရေတ်ဒၟံၚ်ညးသ္ကအ် ပ္ဍဲကဵုသၞေဟ်က္ၜၚ်ကျာဍုၚ်သ္အာၚ်အိုတ်တုဲ လ္ၚဵုတံဂှ် အခိၚ်မၚ်ဒၟံၚ်က္ၜၚ်ကျာ လ္တူတ္ကအ်ဂှ် သွက်သ္ဂောံတိက် လ္တူပြၚ်ဗ္တဳဂှ် ပလေဝ်ပလေတ်ဒၟံၚ်အိုတ်ရ။

ညးအုပ်ဓုပ်ကောပ်ကာဲ ပရေၚ်ပလံၚ်ဗစိုပ် တ္ၚဲဇူ နူကဵု UK ဂဴရဳဂှ် ဂွံဆဵုလဝ်ပၟတ် နူကဵုသ္ကဲကၟာဍာ်ဂှ်တုဲ ဒဒှ်ရဂြိပ်တိတ်အာလဝ် ဒၞါဲဗၠးဘဲတံဂှ် ဟီုဂးလဝ်ကဵု AFP ရ။

“ပိုယ်တံ ဒးကွာ်လဝ် ပ္ဍဲတ္ၚဲကာတ်တ်ဂှ် ၜိုတ်တြဴနာဍဳရ” သာ်ဝွံ ညးသ္ဂးရ။ တ္ကအ်ရသ်ထ်ဂှ်ဝွံ ပ္ဍဲကဵုလၟေၚ်တရဴတ္ၚဲဇူဒယှ်အိုတ် ပ္ဍဲဍုၚ်ဂရိဂှ် ဗွဲတၟေၚ် ညးအာတရဴ နူကဵုဗျိတိၚ်၊ ဂျာမာန် ကေုာံ ပြၚ်သေတ်တံ လေပ်ကၠုၚ်စိုပ်ဂၠိုၚ်အိုတ်မွဲရောၚ် မဒှ်ရ။

အေန်ဂျေန်နဳယျာ နူကဵုအေန်ဂလာန်မွဲတၠဂှ် “ ပ္ဍဲကဵုညးဗြဴမွဲဂှ် ဗွိုက်လ္တက်သ္ဇက်ဂွံလ္တက်ဂှ် ဟွံမွဲတုဲ ဒးဓလေံကဵုလဝ် ဂၠိက်ယာတ်သမ္ဘာအဲရ” သာ်ဝွံ ဟီုလဝ်ကဵု AFP ရ။

ညးမၞုံအခေါၚ်ဟီုဂးဗၠာဲသၟိၚ်ဂရိဂှ် “ ဣဏံဂှ် ဒှ်ပရေၚ်ဆုဲပြံၚ်ဘဲပၟတ်ဇၞော်အိုတ် ပ္ဍဲဍုၚ်ဂရိရ၊ ဒးရီုပ္တိတ်လဝ် မၞိဟ်ၜိုတ် ၃ ဠက်ပြၚ် နူကဵုဒၞါဲဂှ်ရ” သာ်ဝွံ ဟီုလဝ်ကဵု AFP ရ။

သၟိၚ်တၠအဝဵုတံဂှ် ပလံၚ်ဗစိုပ်လဝ် လ္ပာ်ကုန်တေံ မၞိဟ်အပံၚ် (၁၆၀၀၀) တုဲ မၞိဟ် (၃၀၀၀) ဂှ် ဒဒှ်ရဆုဲပြံၚ်လဝ် နူကဵုၜဳတေံဂှ် ဂကောံဒပ်ဗၠာဲသၟိၚ်တံ ဟီုဂးလဝ်ရ။ မၞိဟ်လ္ၚဵုလ္ၚဵုတံဂှ်လေဝ် သွက်ဂွံဂြိပ်တိတ် နူကဵုဂၠံၚ်ကုန် ဟွံသေၚ်မ္ဂး သုၚ်စောဲယာန်ပလံၚ်ဗစိုပ်ဇကုတံဂှ်တုဲ သွက်ဂွံတိတ်နူ ဒေသဂှ် ဗွဲမပြဟ်ဂှ် ဒးဒုၚ်ကဵုလဝ်အမိၚ်ရ။

တ္ကအ်ရသ်ထ် လၟိဟ်မၞိဟ် မွဲကိုဋ်ပြၚ် နွံဂှ်ဝွံ သၞာံတုဲတေံ ညးအာတရဴ ဗၞတ် (၂ ဒဿမ ၅) ပြကောဋိကိုဋ် နွံလဝ်တုဲ ဟိုတ်နူပရေၚ်ပၟတ်ဂြိုပ်တူ မကၠောံစိုပ်အာ ရေၚ်ၜဳတံဂှ်တုဲ ဟဝ်တေဝ်ဗွဲမဂၠိုၚ်ဂၠေၚ် လီုလာ်အာလဝ်တုဲ သ္ၚိမၞိဟ်ဒၟံၚ် ကေုာံ ဘာကျာ်တံဂှ်လေဝ် ပါလုပ်အာလဝ် ပ္ဍဲကဵုပၟတ်တူဂှ်ကီုရ။

Ref: CNA