ဗိက်၊ ဂျူလာၚ်(၂၆)
ရးဒေသဇၞော်တၞၚ်သြဳ၊ ဂကောံရီုဗၚ်ဟံၚ်ပြာ်ပရေၚ်မၞိဟ် မၞုံပွိုၚ်ဍုၚ်ဗိက် (၅)ဂကောံဂှ် ပံၚ်တောဲကဵုကံၚ်ဇြဳပၞာန်တုဲ ဟိုတ်နူကၠောန်ရေၚ်တၠုၚ်ကဵုဒၟံၚ်ကမၠောန်ကံၚ်ဇြဳပၞာန်တုဲ ညံၚ်ဟွံဂွံထပ်ပံၚ်တောဲဂှ် ဒပ်စဵုဒၞာညးဍုၚ်ကွာန် (ပကဖ) ပွိုၚ်ဍုၚ်ဗိက် ကဵုလဝ်သတိ လလောၚ်တြးလဝ် ပ္ဍဲဂိတုဂျူလာၚ် စၟတ်တ္ၚဲ (၂၄)ရ။
အတိုၚ်တၚ်လလောၚ်တြး ဂကောံ (ပကဖ)ပွိုၚ်ဍုၚ်ဗိက်ဂှ်မ္ဂး ဂကောံရီုဗၚ်ဟံၚ်ပြာ်ပရေၚ်မၞိဟ် ချာန်မျေအ်(ချမ်မြေ့)၊ ကရုဏာ၊ ချေတ်ကျဳယျေ(ချစ်ကြည်ရေး)၊ ယှိုဲယောၚ်နေအ်တေတ် (ရွှေရောင်နေ့သစ်)၊ ပဳတိကုဒိုလ်(ပီတိကုသိုလ်) တအ်ဂှ် သုၚ်စောဲယာဉ်ရီုဗၚ်ဟံၚ်ပြာ်ညးတအ်တုဲ ဒဒှ်ရပါလုပ်ပံၚ်တောဲဒၟံၚ်ပ္ဍဲလၟေၚ်ကမၠောန်ပ္ကီုပရာပ်ဂှ် ဂွံတီကေတ်လဝ်ရဂှ် ဟီုသ္ဂးလဝ်ရ။
နကဵုဂကောံရီုဗၚ်ဟံၚ်ပြာ် ဒးဒုၚ်ကဵုလဝ်သတိတအ်ဂှ် ညံၚ်ဟွံဂွံကၠောန်သ္ပ ပရေၚ်ရီုဗၚ်ကဵုဇြဟတ် ကုကံၚ်ဇြဳပၞာန်ကီု ယဝ်ရဆက်ကဵုဒၟံၚ်အရီုၚ်ဗၚ်ဏီမ္ဂး ဒးဒုၚ်ကေတ်အာအရေဝ် နကဵုပရေၚ်ပၞာန် သ္ကာတ်တ်မြဟ်ဟ်ဏောၚ်ဂှ် ဂကောံ (ပကဖ) ပွိုၚ်ဍုၚ်ဗိက် ကဵုလဝ်သတိရ။
ဂကောံရီုဗၚ်ဟံၚ်ပြာ်ပရေၚ်မၞိဟ်တအ်ဂှ် ဒဒှ်ရရီုဗၚ်ကဵုဒၟံၚ် ပ္ဍဲအရာပ္ဍိုက်ဏာနၚ် လွဟ်လက်နက်ဇွောံမ သွက်ကံၚ်ဇြဳပၞာန် ဂၠိုက်ဂၠာဲဂွံတီကေတ်လဝ်ရဂှ် ညးတာလျိုၚ် ဂကောံ (ပကဖ)ပွိုၚ်ဍုၚ်ဗိက်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ညးတာလျိုၚ်ဂကောံရီုဗၚ်ဟံၚ်ပြာ်ပရေၚ်မၞိဟ် ဒးဒုၚ်ကဵုလဝ်သတိ မွဲတၠဂှ်မ္ဂး ဒဒှ်ရပရေၚ်ပံၚ်တောဲရေၚ်တၠုၚ်ကၠောန်ဒၟံၚ် မွဲကရောံကဵုကံၚ်ဇြဳပၞာန်ဟၟဲကီု ပရေၚ်ဒဒှ်ဏံဂှ် ဒှ်ကၠုၚ်ဟိုတ်နူတင်ကဵုပရိုၚ်ဗၠေတ်မှာ ဒှ်မာန်တုဲ မိက်ဂွံကဵုစၟဳစၟတ် လ္ၚတ်ဂၠိုက်ဂၠာဲ ချိုတ်တ်ပၠိုတ်တ်ရဂှ် ဟီုသ္ဂးလဝ်ရ။
ပ္ဍဲမွဲကာလဒပ်ပၞာန်သီအဝဵုဏံ ဒပ်ကံၚ်ဇြဳပၞာန် သုၚ်စောဲဒၟံၚ်ကွဳစက် ဂကောံရီုဗၚ်ဟံၚ်ပြာ်ပရေၚ်မၞိဟ်လ္ၚဵုတအ် ပ္ဍဲအရာချဳဒရာၚ်ပၞာန် ကေုာံ ပ္ဍဲအရာပလံၚ်ဗစိုပ်ဇွောံမတအ် နွံကၠုၚ်ဒၟံၚ်ရ။
သ္အာၚ်နူဂှ်ပၠန် ကံၚ်ဇြဳပၞာန်ကဵုလဝ်အမိၚ်အသံ ညံၚ်ဂကောံရီုဗၚ်ဟံၚ်ပြာ်ပရေၚ်မၞိဟ်လ္ၚဵုဂှ် ဂွံပါလုပ် ပ္ဍဲလၟေၚ်ကမၠောန်ဍေံတအ် နွံဒၟံၚ်ရဂှ် ဂွံတီကေတ် အတိုၚ်လဟီု ညးတာလျိုၚ်ဂကောံရီုဗၚ်ဟံၚ်ပြာ်ပရေၚ်မၞိဟ်လ္ၚဵုဂှ်ရ။
ပ္ဍဲကာလဒပ်ပၞာန်သီအဝဵုကၟိန်ဍုၚ်ဗၟာ ပွိုၚ်ၜါသၞာံပြၚ်ဏံ သၟာရီုဗၚ်ဟံၚ်ပြာ်ပရေၚ်မၞိဟ် ဒးဒုၚ်ပြိုက်ဂစိုတ်လဝ် ဟွံအောန်နူ(၄၀)တၠနွံရဂှ် ရုၚ်သၟိၚ်ဇၞော်မဟာ ဆေၚ်ကဵုအခေါၚ်အရာမၞိဟ် ကုလသမဂ္ဂ လလောၚ်တြးလဝ် ပ္ဍဲဂိတုဂျူလာၚ် သ္ကုတ်ကၠာဂှ်ရ။
သၟာရီုဗၚ်ဟံၚ်ပြာ်ပရေၚ်မၞိဟ် ဒးဒုၚ်ပြိုက်ဂစိုတ်လဝ်တအ်ဂှ် ပ္ဍဲပေါဲဗတိုက်က္တဵုဒှ်ဒၟံၚ် အကြာကံၚ်ဇြဳပၞာန်ကဵု ညးပၠန်ဂတးရပ်လွဟ်တအ်ဂှ် သီုတၚ်ရန်တၟံနွံနွံ ပန်ပှော်ပ္တဝ်လဝ်တုဲ ပရေၚ်ဒးဒုၚ်ဗတိုက်ဒၟံၚ်တိုက်ရိုက်လေဝ် ပါလုပ်ဒၟံၚ်ရဂှ် ဟီုသ္ဂးလဝ်ရ။
ပရိုၚ် – သြၚ်လောန်တိုၚ်(မ်)
ဗီုရုပ် – ဂကောံရီုဗၚ်ဟံၚ်ပြာ်ကရုဏာ
sanlontai