လဂုၚ်-ဂျူလာၚ်(၂၆)
ရးဒေသလဂုၚ်၊ ပ္ဍဲထံၚ်အၚ်စိၚ်ဂှ် ဟိုတ်နူထံက်ပၚ်ကဵုလဝ်သြန်ကု PDF တအ်ဂးတုဲ သ္ကိုပ်စၞောန်ပ္ညုၚ် ထံၚ်အၚ်စိၚ် ဥူဇြဝ်မေန် ဒးဒုၚ်ဖျေံလဝ်နူကဆံၚ်ဌာနန္တရ ဒးဒုၚ်ကေတ်လဝ်အရေဝ်ရဂှ် ညးစုက်လုက်တအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ပ္ဍဲဂိတုဂျူလာၚ် ဒုတိယသတ္တာဟတုဲကၠုၚ်တေံ ပကောံကေတ်သြန် နူညးယိုက်ဝန်ထံၚ်တအ်တုဲ ဟိုတ်နူထံက်ပၚ်ကဵုလဝ် သ္ဂံၚ် PDF တအ် သြန် (၁၁)ကိုတ်ဂှ်ရ ဒးဒုၚ်ကေတ်လဝ်အရေဝ်ရဂှ် ဂွံတီကေတ်တုဲ ညးယိုက်ဝန်ထံၚ် ထံက်ပၚ်ကဵုလဝ်တအ်ဂှ်လေဝ် ကံၚ်ဇြဳပၞာန် ရပ်လဝ်ရဂှ် ဂွံတီကေတ်ရ။
“ဒှ်ဂှ် ဒှ်လဝ်ကွေံရ။ ပရိုၚ်ဟွံပြးတိတ်လ္ပာ်မ္ၚး၊ ဒှ်လဝ် ကၠာဟွံစိုပ် စၟတ်တ္ၚဲ (၁၃)ဂှ်ရ။ ရပ်ဂွံလဝ်သြန် ထံက်ပၚ်တုဲ အခိၚ်ထပ်စၟဳစၟတ်ဂှ် ရပ်ဂွံသီုဖုၚ်ရ ကိစ္စဏံ ဂအုပ်စၞောန်ပ္ညုၚ် ဒးဒုၚ်ကေတ်အရေဝ် ပ္ဍဲပွိုၚ်(၂၄)နာဍဳဂှ် ဒးဒုၚ်ဖျေံလဝ်ကဆံၚ် မွဲဝါဓဝ်ရ”ဂှ် ညးစုက်လုက်ကဵု ထံၚ်အၚ်စိၚ်မွဲတၠ ဟီုကဵုဌာန်ပရိုၚ်သြၚ်လောန်တိုၚ်(မ်)ရ။
သ္အာၚ်နူဂှ်ပၠန် ကြဴနူကိစ္စဏံက္တဵုဒှ်တုဲ ပရေၚ်ဖံက်ပ္ကဝ်အခေါန်အရာမၞိဟ် လ္တူကောန်ထံၚ် ပ္ဍဲထံၚ်ဂှ် သာတုဲကၠောန်သ္ပကၠုၚ်ဒၟံၚ်တုဲ ဂကောံပလိုတ်ပၟတ်တအ်၊ စ.ဖ.ရ တအ်ပံၚ်တောဲတုဲ ကၠောန်သ္ပဒၟံၚ် ပရေၚ်ဗက်ဂၠိုက်ဂၠာဲစၟဳစၟတ် ပ္ဍဲဗ္ဒမ်တအ် သီုပတေၚ်ဂြတ်လဝ် ပရေၚ်ဂီုကၠီုရဂှ် ညးဟီုသ္ဂးလဝ်ဏီရ။
လၟုဟ်ဏံ နဒဒှ်သ္ကိုပ်စၞောန်ပ္ညုၚ်ထံၚ်အၚ်စိၚ် ညးနွံယၟုဉူမျိုဝ်ဇြဝ် မၞုံကဆံၚ်သ္ကိုပ်ဗိုလ် နူဒပ်ပၞာန်ဂှ် ကံၚ်ဇြဳပၞာန် ခါန်ကၞက်အပ်ကဵုလဝ်တာလျိုၚ် ရဂှ်ဂွံတီကေတ်ရ။
“ပ္ဍဲတေံ သာတုဲ ဒးဒုၚ်ဍဵုဍိုက် ဒးဒုၚ်ပတေၚ်ဂြတ်ဒၟံၚ်ရ နာဲဗ္စာကီု ကောန်ဒုဟ်တအ်ဂှ် သာတုဲ ဒးဒုၚ်ပတေၚ်ဂြတ်ဒၟံၚ်ရ။ ၜံက်ဇဗၠုလေဝ် သွက်ဂွံဖျုၚ်ကောန်ဒုဟ်တအ် ဟွံကဵုကေတ်နၚ်ရပုဟ်”ဂှ် နာဲဗ္စာဗက်ဒၟံၚ်ဂဗုတ်ကောန်ထံၚ်ပရေၚ်ဍုၚ်ကွာန်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ဂိတုဂျူလာၚ် စၟတ်တ္ၚဲ (၂၁)တုဲကၠုၚ်တေံလေဝ် သ္ကိုပ်ဗၠာဲသၟိၚ်ရးလဂုၚ်ကေုာံ သ္ကိုပ်ဗျူဟာရးတအ် ကၠုၚ်စိုပ်စၟဳစၟတ်လဝ် နွံရဂှ် ဂွံတီကေတ်ရ။
ကြဴနူဒပ်ပၞာန်သီအဝဵုကၟိန်ဍုၚ်ဗၟာတုဲ ကောန်အရာပ် (၂)ဠက်ပြၚ်ဒးဒုၚ်ရပ်လဝ်တုဲ ပ္ဍဲကဵုဂှ်ဗွဲမဂၠိုၚ် ဒးဒုၚ်ဖျေံလဝ်ထံၚ် ပ္ဍဲစာတ်ထံၚ်အၚ်စိၚ်ရ။
ပရိုၚ် – သြၚ်လောန်တိုၚ်(မ်)
ဗီုရုပ် – CJ(ဗီုတြေံ)
sanlontai