ပ္ဍဲပေါဲဗတိုက်ဝၚ်ရော သ္ဂံၚ်ဒပ်ပံၚ်ကောံ KNLA (၂) တၠ ဒးပြဟ်လလုဲလဝ်

ဝၚ်ရော၊ ဂျူလာၚ်(၂၆)

ပ္ဍဲပေါဲဗတိုက်က္တဵုဒှ်လဝ် ပွိုၚ်ဍုၚ်ဝၚ်ရော၊ ဗော်သွးကောန်ဂကူကရေၚ် KNU ဒပ်မဟာ (၆)ဂှ် သ္ဂံၚ်နူဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA (၂)တၠ ဒးပြဟ်လလုဲလဝ်ရဂှ် ဗဟဵု KNU လလောၚ်တြးလဝ် ပ္ဍဲဂိတုဂျူလာၚ် စၟတ်တ္ၚဲ (၂၅) ရ။

ပ္ဍဲဂိတုဂျူလာၚ် စၟတ်တ္ၚဲ (၂၃)တုဲကၠုၚ်တေံ အခိၚ်နူဂယးဂှ် ဟိုတ်နူဒပ်ကံၚ်ဇြဳပၞာန် ထ္ပက်လုပ်ကၠုၚ်ကရောၚ်ပၞာန် ဗ္ဒာဲကွာန်ဝါဝန် ပွိုၚ်ဍုၚ်ဝၚ်ရောတုဲ ဒှ်လဝ်ပေါဲဗတိုက်ဆေၚ်မုက်ကဵု ဒပ်ပံၚ်ကောံ KNLA တအ်ရ။

ပ္ဍဲပေါဲဗတိုက်ဂှ် သ္ဂံၚ်လ္ပာ်ဒပ်ပံၚ်ကောံ KNLA ဒးပြဟ်လလုဲလဝ်(၂) တၠ ဒးလဝ်ဘဲဝပ် (၁)တၠတုဲ လ္ပာ်ကံၚ်ဇြဳပၞာန် ဒးချိုတ်လဝ် (၄)တၠရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးဂှ်ရ။

တ္ၚဲဂှ်ဟေၚ် ရေၚ်ယာဉ်ကွဳစက်ကံၚ်ဇြဳပၞာန် နူလ္ပာ်ဇြပ်ဗု စှ်ေကၠုၚ်ဍုၚ်ရေဝ်ဂှ် ဟိုတ်နူဒးဒုၚ်တံၚ်ခတိုဟ်လဝ်မာၚ် (၂)ဝါတုဲ ကွဳစက်ပၞာန်မွဲဖ္ဍိုက် ဇီုကပိုက်ဒးခရိုဟ်လီုလဝ်တုဲ ကောန်ဒပ်ကံၚ်ဇြဳပၞာန် (၆) တၠ ဒးချိုတ်လဝ်ရဂှ် သ္ဂးလဝ်ရ။

ကြဴနူပေါဲဗတိုက်က္တဵုဒှ်လဝ်တုဲ စဵုကဵုဂိတုဂျူလာၚ် စၟတ်တ္ၚဲ (၂၅)ဏံ ပရေၚ်ပၞာန်ၜါလ္ပာ် ကြံၚ်မ္ၚိုဟ်ဒၟံၚ်တုဲ ပ္ဍဲမွဲဒမြိပ်ဂၠံၚ်ကွဳစက်ရေဝ်-ဇြပ်ဗုဂှ် ပရေၚ်စၟဳစၟတ်သီုၜါလ္ပာ် နွံဒၟံၚ်ရဂှ် ဂွံတီကေတ် အတိုၚ်လဟီုညးဒေသတအ်ရ။

သ္ပတံနူဂိတုဂျောန် စၟတ်တ္ၚဲ (၁၈)တုဲကၠုၚ်တေံတုဲ ပ္ဍဲမွဲဒမြိပ်ဂၠံၚ်ဇၞော်စၟတ်(၈) မတ်မလီု-ရေဝ်-ထဝါဲဂှ် ကရောၚ်ပၞာန် ဂကောံဇြဟတ်ပၠန်ဂတးတအ် သီုဒပ်ပၞာန်ဗၠးၜးကောန်ဂကူကရေၚ် KNLA စကၠောန်ရေၚ်တၠုၚ်ဒၟံၚ် သွက်ဂွံထိၚ်ဒဝ်တိဍာ်ရ။

လ္တူဂကောံဇြဟတ်ပၠန်ဂတးတအ် ထိၚ်ဒဝ်ဒၟံၚ်တိဍာ်ဂှ် နဒဒှ်ကလေၚ်ပၠန်တဲ ဒပ်ကံၚ်ဇြဳပၞာန် ထ္ပက်လုပ်ကၠုၚ်ကရောၚ်ပၞာန်ကီု သီုကဵုပန်ဖျေံဒၟံၚ်လွဟ်ဇၞော် ကၠောန်သ္ပဒၟံၚ်ဂှ်ရ ပရေၚ်ပၞာန်ၜါလ္ပာ် သာတုဲ သ္ကာတ်မြဟ်ကၠုၚ်ဒၟံၚ်ရ။

ပရိုၚ် – သြၚ်လောန်တိုၚ်(မ်)

ဗီုရုပ် – KNU