ထ္ၜးဥပမာကဵုပေါဲရုဲမာဲသေံတုဲ ဟွောန်ဇြာန် ဟီုဍဵုဍိုက် ညးဒစဵုဒစးတအ်

ဖနွောန်ပေန် – ဂျူလာၚ်(၂၆)

သ္ကိုပ်ဝန်ဇၞော်ကမ္ဘောဒဳယာ ဟွောန်ဇြာန်ဂှ် ထ္ၜးဥပမာကဵု အကာဲအရာက္ဍိုပ်သ္ကိုပ်ဗော် Move Forward ဖိတာ ပ္ဍဲပေါဲရုဲမာဲသေံ ကလိလၟိဟ်ဂွံမာဲ သွက်ဌာနန္တရဝန်ဇၞော် ဟွံရုံဂပ်ဂှ်တုဲ ဟီုပ္ဍဵုပ္ဍိုက်လဝ် က္ဍိုပ်သ္ကိုပ်ဒစဵုဒစး ပ္ဍဲဍုၚ်ညးရ။

ဟွောန်ဇြာန် မဒှ်တၠအဝဵု မွဲတၠဂှ် ၜိုန်ရလုပ်စောန်ပြံက် ပရေၚ်ဍုၚ်ကွာန်သေံ ဟွံသေၚ်ကီုလေဝ် နကဵု Move Forward ကေုာံ ဖိတာ ယဝ်ရဒက်ပ္တန်အလဵုအသဳ မွဲတန်မာန်ကီုလေဝ် သွက်ဂွံပံၚ်တောဲကၠောန်ရေၚ်တၠုၚ်အာ ပၟိက်ဆန္ဒ နွံဒၟံၚ်ရဂှ် ဟီုသ္ဂးလဝ်ရ။

ဗော် MFP စွံပ္တန်လဝ်မူဝါဒ သၟာကမၠောန်ဆုဲပြံၚ် ကလေၚ်စဴဍုၚ်မွဲတန်နွံရဂှ် ကြဴနူသ္ကိုပ်ဝန်ဇၞောန်ကမ္ဘောဒဳယာ ဟီုပါ်ပါဲဗၠေတ်မှာတုဲဂှ် တၚ်စၟတ်သမ္တီဏံ မံက်တိတ်ကၠုၚ်ရ။

“ပရေၚ်ကျဆောံ ဖိတာ ဟွံက္လိဂွံမာဲ သွက်ဂွံဒှ်သ္ကိုပ်ဝန်ဇၞော်သေံ ပေၚ်ၚ်ဂှ် ဒှ်ပရေၚ်ဆောံလေၚ် သွက်ညးဒစဵုဒစး ကြံၚ်မ္ၚိုဟ်ဒၟံၚ် (ညံၚ်တိရစ္ဆာန်) မၞုံဒၟံၚ်ပ္ဍဲကမ္ဘောဒဳယာ ဇၞော်ကဵုဇြဟတ်ရ”ဂှ် ချူပ္တိုန်လဝ် ပ္ဍဲအကံက်တွောတ်တာ ဟွောန်ဇြာန်ရ။

သ္အာၚ်နူဂှ်ပၠန် “နကဵုပိုဲဂှ် လုပ်စိုပ်ပြံက်စောန် ပရေၚ်ပ္ဍဲဍုၚ်သေံ ဟွံသေၚ်ပုဟ်။ ဗီုပိုဲထံက်ထ္ၜးလဝ် အတိက်တေံဂှ်ရ ညးဖံက်သစ္စတအ် စၟဳလဝ် ဖိတာဒှ်ကၠုၚ်သ္ကိုပ်ဝန်ဇၞော်ဍုၚ်သေံကီု သွက်ပရေၚ်ဆဝ်ပ္ၚုဟ်ကဆော်ကချဳ ပရေၚ်ဒစဵုဒစးအလဵုအသဳကမ္ဘောဒဳယာဂှ် သုၚ်စောဲအာ ပယျဵုဒၞက်သေံဏောၚ်။ လၟုဟ်ဏံ တၚ်စၟဳညးရိုၚ်ဇိုၚ်တအ်ဏံ ကၠေံအာ ညံၚ်ၜဵုလာဲအာပ္ဍဲဍာ်ရ။ ဂုဏ်နူဂှ်ရ လ္ပပါလုပ် ပ္ဍဲပရေၚ်ဍုၚ်ကွာန် စွံလဝ်တၚ်စၟဳပတှ်ေ သ္ပနိဿဲကဵု ပူဂဵုမွဲတၠညိ”ဂှ် ဟီုသ္ဂးလဝ်ဏီရ။

ယဝ်ရဗော် Move Forward ဒက်ပ္တန်အလဵုအသဳမာန်ကၠုၚ်မ္ဂး သွက်ဂွံကဵုဒဏ်ဗက်ဗ္ဒဴနူဍုၚ် ကၟိန်ဍုၚ်သေံ ကၟိန်ဍုၚ်သ္အာၚ် ကုသၟာဒစဵုဒစးပရေၚ်ဍုၚ်ကွာန်တအ်ဂှ် အကာဲအရာဟၟဲပၟိက်နွံဒၟံၚ်ဂှ်ရ တၚ်သမ္တီဟွောန်ဇြာန် မံက်တိတ်ကၠုၚ်ရ။

ပ္ဍဲဂိတုဏံလေဝ် ရပ်ဂွံလဝ် ညးလုပ်ဂကောံဒစဵုဒစး ဗော် Candlelight မွဲတၠ ပ္ဍဲက္ၜၚ်ကံက်တုဲ ပလံၚ်ဗစိုပ်လဝ် ပ္ဍဲအချုက်ထံၚ်လဝကတုဲ စဵုကဵုအခိၚ်လၟုဟ် ဟွံဂွံမိၚ်ပရိုၚ် ပူဂဵုဂှ်ဏီရ။

“နကဵုပိုဲ မိက်ဂွံဒစဵုဒစးကဵု မာဿတာဖိတာ ဟွံသေၚ် ကဵုအလဵုအသဳမာဿတာဖိတာ က္ဍိုက်က္ဍိုပ်ဂှ်လေဝ် သွက်ဂွံပံၚ်တောဲ ကၠောန်ရေၚ်တၠုၚ်အာ နွံဒၟံၚ်ရ။ နကဵုပိုဲ သ္ပရှ်ေသှ်ေဒၟံၚ် တၚ်သ္ဂုတ်သွာန်ကောန်ဍုၚ်သေံကီု လုပ်ပြံက်စောန် ပရေၚ်ဍုၚ်ကွာန်သေံ ဟွံသေၚ်။ နကဵုပိုဲ က္ဍိုပ်သ္ကိုပ်သေံ ညးလဵုဒှ်ဒှ် ဗော်လဵုဒှ်ဒှ် သွက်ဂွံပံၚ်တောဲကၠောန်အာကမၠောန်မွဲစွံ နွံဒၟံၚ်ဒတုဲရ” ဂှ် ဟွောန်ဇြာန် ထပ်ချူပ္တိုန်လဝ် နဒဒှ်အဆက်တောဲကြဴရ။

ပ္ဍဲပေါတ်တွေတ်တာ ချူပ္တိုန်လဝ်အဆက်တောဲကြဴဗီုဏံဂှ် သ္ကိုပ်ဝန်ဇၞော်ကမ္ဘောဒဳယာ ဟွောန်ဇြာန်ဂှ် သၟာဒစဵုဒစးစိုပ်တၞုၚ်တၞး ခမာတအ် သုၚ်စောဲယၟုဖိတာတုဲ ကၠောန်သ္ပဒၟံၚ် ပရေၚ်ဒစဵုဒစးကမ္ဘောဒဳယာကီု တၚ်ကၠောန်သ္ပလဝ်တအ်ဏံဂှ် ထေက်ကဵုဒးဒေါအ်ဇူကီု ညးပလီုပလာ်ကၟိန်ဍုၚ်ဇကုဂှ် ညးလဵုလေဝ် သ္ပဗ္ဒာဲနိဿဲဟွံသေၚ်ရဂှ် ဟီုပါ်ပါဲလဝ်ရ။

ဟွောန်ဇြာန်ဂှ် ပ္ဍဲဂိတုဂျူလာၚ် စၟတ်တ္ၚဲ (၂၃)ဏံ ၜိုန်ရဒးဆဵုဂဗကဵု ပေါဲရုဲမာဲမွဲတန်ကီုလေဝ် ကဝ်မတဳရုဲစှ်အလဵုအသဳဂှ် နူအခိၚ်ပြဟ်ဟ်တေံ ကၟာတ်လဒဵုလဝ်ဗော်ပရေၚ်ဍုၚ်ကွာန်ဒစဵုဒစးတအ်တုဲ ရုၚ်ဇၞော်လေဝ် သ္ပလဝ်ဒ္တန်ကဵု အစဳဇန်ဂှ်ရ။

ရုၚ်ဇၞော်ကမ္ဘောဒဳယာဂှ် ကြဴနူသီရုပ် ဗော် Cambodia National Rescue တုဲဂှ် သ္ပတံနူပေါဲရုဲမာဲ သၞာံ ၂၀၁၈ တုဲ Cambodian People Party (CPP) ဟွောန်ဇြာန် ဂွံဇၞးကၠုၚ်လဝ် ဇၟာပ်ပ်ဒၞာဲရဂှ် ဂွံတီကေတ်ရ။

Ref;Bangkok Post