ကောန်ပၞာန်မကလိဂွံလဝ်ဝပ် အပ္ဍဲပေါဲဗ္တိုက်တံဂှ် ကံၚ်ဇြဳပၞာန် ပလံၚ်ကဵုတရဴပြေလၟောၚ်

နေဗျဳဒဝ်၊ ဂျူလာၚ် (၂၆)

ကြဴနူဒပ်ပၞာန်သီအဝဵုတုဲ ကလိဂွံဝပ်ဇီုကပိုက် အပ္ဍဲပေါဲဗ္တိုက်ဂမၠိုၚ်တုဲ ကြဴနူတိုန်စိုပ်လွဳလွတ် ပ္ဍဲရုၚ်ဂဥုဲ၊ ဗ္ဒမ်ဂဥုဲတံတုဲ ကောန်ပၞာန်၊ ကောန်သ္ဂံၚ် မကလေၚ်ဗၠးကၠုၚ်တံဂှ် ကံၚ်ဇြဳပၞာန် ပလံၚ်ဗစိုပ်ကဵုလဝ် တရဴပြေလၟောၚ် အလန်ဒုတိယရောၚ်ဂှ် လလောၚ်ပ္တိတ်လဝ်ရ။

နကဵုဝေါဟာ စဵုဒၞါဍုၚ်ကွာန်ဂှ် ကောန်ပၞာန်ကလိဂွံဝပ်ဇီုကပိုက်တံဂှ် ပ္ဍဲဂိတုဂျူလာၚ် ၂၄ တေံ ပလံၚ်ဗစိုပ်ကဵုလဝ် တရဴပြေလၟောၚ် ပြၚ်ၜဳချံၚ်တာ ရးဨရာဝတဳဂှ်ကဵု ပြၚ်ၜဳၚပလဳ တွဵုရးရခေၚ်တံဂှ်ရ။

လၟေၚ်တရဴဂှ်ဂှ် နူကဵုတိဍာ်ကံၚ်ဇြဳနေဗျဳဒဝ်ကဵု ရးလ္ဂုၚ်မွဲကဆံၚ် ပလံၚ်ဗစိုပ်ကဵုလဝ် ယာန်ကွဳစက်၊ က္ၜၚ်ကျာဒပ်ပၞာန်တံဂှ်တုဲ သ္ကိုပ်ရး နူကဵုဌာန်ဂအုပ်ပၞာန်ရး မဆေၚ်စပ်တံကဵု ညးမၞုံတာလျိုၚ်တံ ပလံၚ်ဗစိုပ်ကဵုလဝ် ဗွဲမဍုက်ကေဝ်ဒဒှ်ေဒယှ်ရောၚ်ဂှ် သ္ဂးရ။

ကောန်ပၞာန်ကၠုၚ်စိုပ်ဂေတ်ဝေၚ်ပြၚ်ၜဳတံဂှ် ဒုၚ်တၠုၚ်ဗ္စဖျုၚ် နကဵုစၞစတိတ်နူဒေသတံဂှ်တုဲ ကျာ်ဗ္ဒါဲဗ္ဒါဲတံဂှ်ကဵု ဒၞါဲသ္ဇက်ဂေတ်ဝေၚ်လ္ၚဵုတံဂှ်လေဝ် ပြေလၟောၚ်ဂေတ်အာ ပွိုၚ် (၅) တ္ၚဲရောၚ်ဂှ် ကံၚ်ဇြဳပၞာန် လလောၚ်ပ္တိတ်လဝ်ပရိုၚ်ရ။

နကဵုတၚ်ထ္ၜးဟိုတ် မမာဲဟွံဓဝ်ယာဂှ် ပ္ဍဲသၞာံ ၂၀၂၁ ဂိတုဖေဖဝ်ဝါရဳဂှ် ကြဴနူဒပ်ပၞာန်သီအဝဵုတုဲ ကြပ်အလုံမွဲကၟိန်ဍုၚ် ပၠန်ဂတးရပ်လွဟ်ဒစဵုဒစး သၞောတ်တၠအဝဵုပၞာန် မံက်ဂတဝ်ကၠုၚ်တုဲ ကံၚ်ဇြဳပၞာန်ဂှ် ပံက်လဝ်မုက်ပၞာန် ဗွဲမဂၠိုၚ်တုဲ ဒးဆေၚ်ဒၟံၚ်မုက် ကုဂကောံဇြဟတ်ပၠန်ဂတးတံရ။

အပ္ဍဲပေါဲဗ္တိုက် မက္တဵုဒှ်လဝ် အကြာဒပ်ကံၚ်ဇြဳပၞာန်ကဵု ဂကောံဇြဟတ်ပၠန်ဂတးတံဂှ် ကောန်ဒပ်ကံၚ်ဇြဳပၞာန် ကလိဂွံဝပ်တံဂှ် ပ္ဍဲဂိတုဂျောန် သတ္တာဟဒုတိယတေံ ပလံၚ်ဗစိုပ်ကဵုလဝ် အလန်ပထမတုဲ အခါလၟုဟ်ဂှ် ပလံၚ်ဗစိုပ်ကဵုလဝ် နဒဒှ်အလန်ဒုတိယရ။

မွဲလ္ပာ်ပၠန်ဂှ် ဇြဟတ်ဒပ်တိုက် ဒပ်ကံၚ်ဇြဳပၞာန် မဍိုန်လျစှ်ေကၠုၚ်ဒၟံၚ်ဂှ်ဝွံ အောန်ကြဳကၠုၚ်ကွေံကွေံတုဲ အစောံစရာဲဍာ်ဒကေဝ်လေဝ် စှ်ေဒၟံၚ်ဂှ်ရ ဒးသ္ပပဓာန်ဒၟံၚ်ကဵု ကောန်သ္ဂံၚ် နူကဵုဒပ်ဍာ်ကဵု ဒပ်ကျာတံဂှ်တုဲ သီုကဵုဒးရပ်စပ်စကာဒၟံၚ် ဒပ်တၞဟ်ဟ်တံကီုရောၚ်ဂှ်လေဝ် ဗိုလ်ဇၞော် CDM တံ သ္ၚဳဂၠိပ်လဝ်အိုတ်ရ။

အလဵုအသဳညဳသၟဟ်ဂကူ NUG ဂှ် အပ္ဍဲပွိုၚ်ၜါသၞာံ တုဲကၠုၚ်ဏံ ပသောၚ်ဂွံလဝ် ဇြဟတ်သၞ ၂၉၀၀၀ ပြၚ်တုဲ ၁၁၀၀၀ ပြၚ် သ္ကဵုဇီုကပိုက်ကလိဂွံလဝ်ဝပ်ရောၚ်ဂှ် ထ္မံက်ထ္ၜးလဝ် ပ္ဍဲကဵုလိက်စံၚ် ကဏ္ဍစဵုဒၞါညးဍုၚ်ကွာန် မလလောၚ်ပ္တိတ်လဝ် ပ္ဍဲကၞောတ်ဂိတုမေတေံဂှ်ရ။

ပရိုၚ်−သြၚ်လောန်တိုၚ်(မ်)

ဗီု−MOI