ကံၚ်ဇြဳပၞာန် ဆက်ဂြာတ်မံၚ်ဗုမ်ဗ္တိုက်ဒၟံၚ် ဒေသယာဒိုဝ် တွဵုရးကရေၚ် နကဵုက္ၜၚ်ကျာ

(သံတောၚ်ကြဳး) ၊ ဂျူလာၚ် (၂၆)

အပ္ဍဲပွိုၚ်ၜါသတ္တာဟ ဒပ်ကံၚ်ဇြဳပၞာန် ဟိုတ်နူဗ္တိုက်ဂြာတ်လဝ်မခတိုဟ် ဒေသယာဒိုဝ်၊ ပွိုၚ်ဍုၚ်(သံတောၚ်ကြီး) ၊ တွဵုရးကရေၚ် နကဵုက္ၜၚ်ကျာ လၟိဟ်လ္တုန် (၅၀) ဝါပြၚ်ဂှ်ရ သီုကဵုပါလုပ်စမြိုၚ်ဘာသာတံဂှ် သ္ၚိဒၟံၚ် ဟွံအောန်နူကဵု (၂၀) မ ဇီုကပိုက်လီုလာ်အာလဝ်ရောၚ် ပ္ဍဲဂိတုဂျူလာၚ် (၂၅) တေံ ခရိုၚ်တံၚ်ဥူ KNU လလောၚ်ပ္တိတ်လဝ်ရ။

ပ္ဍဲကဵုဒေသယာဒိုဝ်၊ ပွိုၚ်ဍုၚ်(သံတောၚ်ကြီး) တိဍာ်ဒပ်မဟာ (၂) ၊ ခရိုၚ်တံၚ်ဥူ−KNU ဂှ် တုဲကၠုၚ်နူဂိတုဂျူလာၚ် (၁၁) စဵုကဵု ဂိတုဂျူလာၚ် (၂၃) အကြာဒပ်ကံၚ်ဇြဳပၞာန်ကဵု ဒပ်ပၞာန်ဗၠးၜးကောန်ဂကူကရေၚ် KNLA တံ က္တဵုဒှ်လဝ်ပေါဲဗ္တိုက် ဗွဲမသ္ကာတ်မြဟ်ရ။

အပ္ဍဲပေါဲဗ္တိုက် မက္တဵုဒှ်လဝ် လလအ်ပွိုၚ် (၁၃) နာဍဳဂှ် ဒပ်ကံၚ်ဇြဳပၞာန် ဗ္တိုက်ဂြာတ်လဝ်မခတိုဟ် ကွာန်ဝါတဝ်ခိုဝ် ကေုာံ ကွာန်တာတ်ကုန် ဒေသယာဒိုဝ်တံ လၟိဟ်လ္တုန်အပံၚ် ၅၅ ဝါရောၚ်ဂှ် ပါလုပ် ပ္ဍဲတၚ်လလောၚ်တြးဂှ်ရ။

ဟိုတ်နူပရေၚ်ဗ္တိုက်ဂြာတ်မခတိုဟ် ဒပ်ကံၚ်ဇြဳပၞာန်တုဲ စမြိုၚ်ဘာသာခရေတ်ယာန် ၂ မ၊ သ္ၚိဒၟံၚ်ညးဍုၚ်ကွာန် ဟွံအောန်နူကဵု ၂၀ မ၊ စာတ်သြောံ ၁ မ၊ တိဝါဗ္ၚတံကဵု တၞံတဵုလွဳလဝ်ဂမၠိုၚ် လီုလာ်ဆောံလေၚ်အာလဝ်ရောၚ် လလောၚ်ပ္တိတ်လဝ်ရ။

ဟိုတ်နူပရေၚ်ဗ္တိုက်ဂြာတ်ဗုမ် ဒပ်ကံၚ်ဇြဳပၞာန်တုဲ ညးဍုၚ်ကွာန်ဒေသယာဒိုဝ် ၂၀၀၀ ပြၚ်ဝွံ ဒးပါဲဒလေတ်ဒၟံၚ် ဒၞါဲဗၠးဘဲတံတုဲ ဇွောံမစၞစ ကေုာံ ဂဥုဲဇဗတံ၊ စမြိုၚ်သ္ဇက်ဂွံမံၚ်စံၚ်စ္ၜုဲစ္ၜော်တံဂှ် နွံပၟိက်ဒၟံၚ် ကာမံက်တိုန်တံနွံရောၚ် ခရိုၚ်တံၚ်ဥူ KNU ကဵုသမ္တီ လလောၚ်ပ္တိတ်လဝ်ရ။

ပ္ဍဲကဵုမွဲၜါတ္ၚဲတုဲကၠုၚ်ဏံ နူကဵုတံၚ်ဥူ−ဠုက်တိုဝ်ဂှ်မွဲကဆံၚ် ဒပ်ကံၚ်ဇြဳပၞာန် ကၠောန်သ္ပဗပေၚ်ကၠုၚ်ဇြဟတ်ဒပ် ပ္ဍဲဒေသယာဒိုဝ် မၞုံပယျဵုတွဵုရးသေံ ကဵု တွဵုရးကရေၚ် တိဍာ်ဒပ်မဟာ (၂) KNU ဒၞါဲပေါဲဗ္တိုက်မသ္ကာတ်မြဟ်ဒၟံၚ်ဂှ်ရောၚ်ဂှ် ဂွံတီကေတ် ဇရေၚ်ညးဒေသတံရ။

ပရိုၚ်−သြၚ်လောန်တိုၚ်(မ်)

ဗီု−CJ