လ္ဂုၚ်၊ ဂျူလာၚ် (၂၆)
ကြဴနူကံၚ်ဇြဳပၞာန် လလောၚ်တြး တက်ပ္တိတ်အာ သြန်စက္ခူတၟိ တၞး ၂၀၀၀၀ ဒ္ကေဝ်ဏောၚ်တုဲဂှ် ၚုဟ်မးသြန်ဗၟာ စှ်ေကၠုၚ်ဒၟံၚ်အဆက်က်တုဲ က္တဵုဒှ်ကၠုၚ်လဝ် စဵုကဵုအကာဲအရာ ဗွဝ်ဖျာထဝ်ကဵု ဒဝ်ဠာတံ လီုရဂှ် တၠကမၠောန်ပရေၚ်ပိုန်ဒြပ်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကံၚ်ဇြဳပၞာန် သီအဝဵုဂှ် နဒဒှ်စၟတ်သမ္တီ ကျာ်ပဋိမာရုပ် မာရဝိဇယ အာစိုပ်ဒတုဲ ကေုာံ စိၚ်ဗ္တာၚ်ရတ် ရဌနန္ဒက ပေၚ်မွဲသၞာံတုဲ တက်တြးပ္တိတ်အာ သြန်စက္ခူတၟိ တၞး ၂၀၀၀၀ ဒ္ကေဝ်ဂှ်ရောၚ်ဂှ် တုဲကၠုၚ်ပ္ဍဲဂိတုဂျူလာၚ် (၂၃) တေံ လလောၚ်ပ္တိတ်ကၠုၚ်ရ။
ကြဴနူလလောၚ်တြး တက်ပ္တိတ်အာ သြန်စက္ခူတၟိဏောၚ်တုဲဂှ် ပ္ဍဲကဵုဗွဝ်ဖျာဒဝ်ဠာအပ္ဍဲဍုၚ်ဂှ် မွဲဒဝ်ဠာ နူကဵုၚုဟ်မၞုံ ၃၁၀၀ ဒ္ကေဝ်ဂှ် ၚုဟ်သၠာ်တိုန်ကၠုၚ် စဵုကဵု ၃၆၀၀ ဒ္ကေဝ်တုဲ ၚုဟ်သြန်ၝာတ်ဂှ်လေဝ် မွဲၝာတ် နူကဵုမၞုံကၠုၚ် ပွဳပွူ ၈၀ ဒ္ကေဝ်ဂှ် သၠုၚ်တိုန်ကၠုၚ်လဝ် စဵုကဵု ၉၀ ဒ္ကေဝ်ပြၚ်ရ။
ၚုဟ်ထဝ်ဒကောၚ်(မဳဠေန်) အပ္ဍဲဍုၚ်ဂှ်လေဝ် မွဲဒ္ကေဝ် နူကဵုၚုဟ်မၞုံ (၃၂) ကိုဋ်ဒ္ကေဝ်ဂှ် ၚုဟ်သၠုၚ်တိုန်ကၠုၚ်လဝ် (၃၆) ကိုဋ်ဒ္ကေဝ် စဵုကဵုပွဳပွူ (၃၈) ကိုဋ်ဒ္ကေဝ်တုဲ ပံက်ဗွဝ်ဖျာဟွံမာန်ရတုဲ က္တဵုဒှ်ကၠုၚ် စဵုကဵုအကာဲအရာ ၚုဟ်ဒးစိုတ်သွံ ၚုဟ်ဒးစိုတ်ရာန်တံရ။
“ဗွဝ်ဖျာထဝ်ကီု၊ ဗွဝ်ဖျာသြန်ကီုဂှ် ဒှ်ဒၟံၚ် ဗီုဒးစိုတ်သွံ ဗီုဒးစိုတ်ရာန်တံအိုတ်ရ။ ၚုဟ်တံဂှ် ဟီုဒၟံၚ်ညးမွဲ မွဲဗီုအိုတ်ရ။ နူဏေံတေံတှ်ေ အကြာ (၃၆) ကိုဋ် (၃၈) ကိုဋ်ရ။ ဆ္ဂး ဆေၚ်ထဝ်ဗွဲမဂၠိုၚ်ဂှ် ကၟာတ်လဝ်ဏောၚ်။ သီုသွံ သီုရာန် ကၟာတ်လဝ်ရ။ ၚုဟ်ဒဝ်ဠာဂှ်လေဝ် ဗီုဏံရ။ လ္ၚဵုတံဂှ်တှ်ေ ဟီုမံၚ် အကြာ (၃၂၅၀) ကဵု (၃၄၀၀) ရ။ လ္ၚဵုဂှ်ပၠန်လေဝ် မၞိဟ်သွံရာန်ဒၟံၚ် ၜိုတ် (၃၆၀၀) (၃၆၅၀) တံဂှ်လေဝ် နွံရ။ လၟုဟ်ဂှ် ဒှ်မံၚ်ဗီုလဵုရောဟီုတှ်ေ အကြာမွဲၜါတ္ၚဲဏံဂှ် ဒှ်မံၚ်ၚုဟ်ဒးစိုတ်သွံ ၚုဟ်ဒးစိုတ်ရာန်တံရ” သာ်ဝွံ သ္ဂးရ။
ဟိုတ်နူအသိၚ်အလိုန် သြန်တၞး ၂၀၀၀၀ ဒ္ကေဝ်ဂှ်တုဲ ၚုဟ်မးသြန်ဗၟာ သဝ်စှ်ေကၠုၚ်ဒၟံၚ်တုဲ ပရေၚ်သွံရာန် ဗွဝ်ဖျာတိသ္ၚိကၠအ်ဂှ် ထ္ပက်တိုန်ကၠုၚ် မွဲအသိၚ်ဓဝ်တုဲ ၚုဟ်ကွဳစက်ကဵု ကွဳလိုန်ဓာတ်တံဂှ်လေဝ် သၠာ်တိုန်ကၠုၚ်ဒၟံၚ် ဂၠိုၚ်ကဵုဆရ။
သ္အာၚ်နူဂှ်ပၠန် အပ္ဍဲဍုၚ်ဂှ် ညးဍုၚ်ကွာန်ဂမၠိုၚ်ဝွံ ဟိုတ်နူပရိုၚ် တက်ပ္တိတ် သြန်စက္ခူတၟိ တၞး ၂၀၀၀၀ ဒ္ကေဝ်ဏောၚ်ဂှ်တုဲ ပ္ဍဲကဵုတိုက်သြန်တံဂှ် ပလံၚ်ပ္တိတ်ဒၟံၚ်လှုဲတံ နွံဒၟံၚ်ဂှ် ဂွံတီကေတ် ဇရေၚ်ညးတာလျိုၚ် တိုက်သြန်ပုဂ္ဂလိကတံရ။
ဟိုတ်နူအသိၚ်အလိုန် သြန်စက္ခူတၟိဏံဂှ်တုဲ ၚုဟ်ဖျာဗၞိက်စၞစသုၚ်သ္ဇိုၚ်တံ ပါလုပ်သီုကဵုသ္ၚုတံဂှ် ထ္ပက်တိုန်ကၠုၚ် လွာဲဂှ်ဂှ် သၟာဗၞိက်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“သှ်ဂှ်ေ လ္ပဟီုဏီ။ မွဲၝာတ်ဂှ် လှုဲဗၟာ ဒှ်အာ (၉၀) ဒ္ကေဝ်ယျဟီုတှ်ေ ၚုဟ်ဖျာတံဂှ် တိုန်ကၠုၚ်ၜိုတ် (၁၀) တၟံကၠံရ။ ပ္ဍဲကဵု (၁၀၀) တှ်ေ တိုန်ကၠုၚ် ၜိုတ် (၁၂) တၟံကၠံရ။ မသှ်ေဒၟံၚ်တၞဟ်ဟ်တံဂှ်လေဝ် တိုန်ဒၟံၚ်အိုတ်ယျ။ ၚုဟ်ကွဳစက်တံဂှ်လေဝ် တိုန်ဒၟံၚ်အိုတ်ယျဏောၚ်။ ၚုဟ်တိ၊ ၚုဟ်ကၠအ်၊ ၚုဟ်ထဝ်တံ တိုန်ဒၟံၚ်ဖအိုတ်ရ။ ဟွံတိုန်ဂှ်တှ်ေ ရိုဟ်ကၞက်မၞိဟ်တံရ ဟွံတိုန်။ အရာလဵုဟွံဟီု ကပေါတ်ဗၞိက်ပၠောပ်ပ္တိုန်နၚ် နူကဵုဍုၚ်သေံတံသီုဖအိုတ်ဂှ် ၚုဟ်တိုန်ဒၟံၚ်ဖအိုတ်ဏောၚ်” သာ်ဝွံ သ္ဂးရ။
တိုန်သြန်ဗဟဵု ကံၚ်ဇြဳပၞာန်ဂှ် လ္တူတက်ပ္တိတ် သြန်စက္ခူ တၞး ၂၀၀၀၀ ဒ္ကေဝ်ဂှ် ထ္ၜးဟိုတ်နာနာသာ်တုဲ မၞိဟ်ဆဝ်မ္ၚုဟ် သွက်ဂွံသၠုၚ်ပ္တိုန်ၚုဟ်ဗၞိက်တံဂှ်ကီု၊ ညံၚ်နှေန်လှာဲလှုဲဍုၚ်သ္အာၚ် ဂွံသၠုၚ်တိုန်ကၠုၚ် မၞိဟ်ဂ္စါန်ဒၟံၚ်တံဂှ် ထ္မံက်ပ္တိတ်တုဲ သွက်ဂွံကေတ်ကဵုဒုဟ်မာန်ဂှ် ပံၚ်တောဲရေၚ်တၠုၚ်ဒၟံၚ်ကဵု ဂကောံပရေၚ်သၞောဝ်ဓဝ်အုပ်လဒံတံရောၚ်ဂှ် လလောၚ်ပ္တိတ်လဝ်ရ။
သြန်စက္ခူ တၞး ၂၀၀၀၀ ဒ္ကေဝ်ဂှ် ပ္ဍဲဂိတုဂျူလာၚ် ၃၁ ဏံ စတက်ပ္တိတ်အာဏောၚ် မဒှ်တုဲ ၜိုန်ရပ္တိတ်အာ နကဵုသၞောတ်ဗ္ၜတ်ဏံကီုလေဝ် စဵုကဵုပမာဏၜိုတ်လဵု ဒဒှ်ရတြးပ္တိတ်အာဏောၚ်ဂှ် သောၚ်ကလးလဴထ္ၜးကဵုလဝ်ဟွံမွဲဂှ်ရ ပ္တဝ်ဒၟံၚ်က္ဍိုပ်ကဵု သြန်ဖောဝ်ရောၚ်ဂှ် သ္ၚဳဂၠိပ်ဒၟံၚ်တံ နွံဒၟံၚ်ရ။
ဟိုတ်နူပရေၚ်တက်ပ္တိတ် သြန်စက္ခူ တၞး ၂၀၀၀၀ ဒ္ကေဝ်ဏံတုဲ ဒမြိပ်ကလောန်ကၟိတ်ဟွံမွဲတံကဵု သြန်ဖောဝ်တံ သၠုၚ်တိုန်ကၠုၚ်မာန်တုဲ ညးဍုၚ်ကွာန်တံ ထပ်ဒးဒုၚ်စသိုၚ် ကုဘဲဒဏ်ၚုဟ်ဖျာက္ဍၚ် ဂၠိုၚ်ကဵုဆတံ မာန်ရောၚ်ဂှ် တၠပညာပရေၚ်ပိုန်ဒြပ်တံ သ္ၚဳဂၠိပ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−CJ
sanlontai