သွက်ဂွံကလေၚ်သီ ဗ္ဒိုပ်ဒဵုလက်ခက် ပၟိက်ဇၞော်သွက်ပရေၚ်ပၞာန်ဂှ် ကံၚ်ဇြဳပၞာန် ထ္ပက်မံၚ်ပၞာန် ဗွဲမသ္ကာတ်မြဟ်

ဗြဝတဳ၊ ဂျူလာၚ်(၂၆)

သွက်သ္ဂောံကလေၚ်ဂွံ ဗ္ဒိုပ်တိုၚ်တာဝါ ဒဵုလက်ခက် မၞုံပ္ဒါဲဍုၚ်ဗြဝတဳ၊ တွဵုရးကရေၚ်ဂှ်တုဲ လ္ပာ်ကံၚ်ဇြဳပၞာန်တံ ပြုပြေၚ်ကၠုၚ်ပၞာန်ထ္ပက် နကဵုဇြဟတ်ဒပ် ၁၀၀ ပြၚ်ဂှ်ရ ပေါဲဗ္တိုက်တံသ္ဇက်ဂွံ သ္ကာတ်မြဟ်ကၠုၚ်နွံဂှ် သ္ကိုပ်ပြုပြေၚ်ပရေၚ်ပၞာန်ကဝ်ပရာ KNLA ဟီုလဝ်ဂှ် ဌာနလလောၚ်ပရိုၚ် ခရိုၚ်ဒူပလာယာဂှ် လလောၚ်ပ္တိတ်လဝ်ရ။

အကြာဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန် သွက်သ္ဂောံကလေၚ်ဂွံ ကုန်ဗ္ဒိုပ်ဒဵုလက်ခက် မၞုံအကြာကွာန်မေတ္တာလေန်မျာၚ်ကဵု ဒဵုလက်ခက် ခရိုၚ်ဒူပလာယာ KNU ဂှ်ကဵု ဂကောံဒပ်ပံၚ်ကောံ KNLAတံဂှ် ပ္ဍဲဂိတုဂျူလာၚ် စၟတ်တ္ၚဲ၂၄ အခိၚ်နူဂယး ၅ နာဍဳဂှ် ပရေၚ်ပန်ပှော်မွဲလ္ပာ်ကုမွဲလ္ပာ် က္တဵုဒှ်လဝ် လလအ်ပွိုၚ် ၄၀ မိနေတ်ရ။

အပ္ဍဲပေါဲဗ္တိုက်ဂှ် လ္ပာ်ဒပ်ကံၚ်ဇြဳပၞာန်တံ ပရေၚ်ဇီုကပိုက်ချိုတ်တံ နွံမံၚ်တုဲ ဟိုတ်နူပရေၚ်ပန်ပှော်မွဲ လ္ပာ်ကုမွဲလ္ပာ်တုဲ ညးဍုၚ်ကွာန်ကောန်အရာပ် ညးဗြဴမွဲတၠ ချိုတ်တုဲ မၞိဟ်တြုံမွဲတၠ ဇီုကပိုက် က္လိဂွံလဝ်ဝပ်ရဂှ် သ္ဂးရ။

သ္အာၚ်နူဂှ်ပၠန် ပ္ဍဲဂိတုဂျူလာၚ် စၟတ်တ္ၚဲ ၂၅ဂှ် သ္ပတံနူ အခိၚ်နူဂယး ၅ နာဍဳ စဵုကဵုအခိၚ်နူဂယး ၉ နာဍဳကဝက်ပြၚ်ဂှ် ပရေၚ်ပန်ပှော်ဇီုမုက်တံ က္တဵုဒှ်လဝ်တုဲ အပ္ဍဲပေါဲဗ္တိုက်လလအ်ပွိုၚ်ၜါတ္ၚဲဂှ် လ္ပာ်ကံၚ်ဇြဳပၞာန်တံ ပရေၚ်ဇီုကပိုက်ချိုတ်တံ ဂၠိုၚ်လဝ်တုဲ သောဲသောဲဗြောဲဗြောဲဂှ် ဟွံဂွံတီကေတ်ဏီပုဟ်ဂှ် ထ္မံက်ထ္ၜးလဝ်ပ္ဍဲတၚ်လလောၚ်တြးဂှ်ရ။

“သၞတံဂှ်တှ်ေ သွက်သ္ဂောံကလေၚ်ဂွံ၊ သွက်ဂွံအုပ်လဒံ ဗ္ဒိုပ်ဒဵုလက်ခက်မာန်တုဲ ဂစာန်မံၚ်ဂှ် သီုတ္ၚဲဏံ(ဂျူလာၚ် စၟတ်တ္ၚဲ ၂၅)ဏံမ္ဂး ဒှ်ဂွံၜါတ္ၚဲယျ။ ဆ္ဂး စဵုကဵုစိုပ်ဗ္ဒါဲဇိုၚ်ဒဵုဂှ် ဍေံတံ စိုပ်ဟွံမာန်ပုဟ်။ ဍေံတံဇီုကပိုက်ချိုတ်ဂၠိုၚ်တုဲတှ်ေ ကလေၚ်ဆုတ်အာရ။ ကလေၚ်ဓဇက် မၞိဟ်ဍေံတံဇီုကပိုက်ချိုတ်ဂှ်တုဲ ကလေၚ်ပန်မံၚ်ပိုဲ နကဵုလွဟ်လက်နက်ဇၞော်ဂှ် ဟွံပိုတ်သ္ကုတ်ရ။ အကာဲအရာဂှ်တှ်ေ သ္ဇက်ဂွံသ္ကာတ်မြဟ်ကၠုၚ် နွံမံၚ်ရ”ဂှ် ဗိုလ်ဒါဗဝ် ဟီုရဂှ် ထ္မံက်ထ္ၜးလဝ်ရ။

သွက်ဂွံကလေၚ်ဂွံ ကုန်ဗ္ဒိုပ်တိုၚ်တာဝါ ဒဵုလက်ခက်ဂှ် နူကဵုသ္ကိုပ်ၝောံဒပ် ၝောံဒပ်(၄၄)ကံၚ်ဇြဳပၞာန်ဂှ် စၞောန်ပ္ညုၚ်ကၠုၚ်တိုက်ရိုက်တုဲ နူကဵုတမ်ဒပ် ခမရ(၂) ကေုာံ တမ်ဒပ် ခမရ (၁၁၈)တံဂှ် ထ္ပက်မံၚ်ပၞာန် နကဵုဇြဟတ် အပံၚ် ၁၀၀ ပြၚ်ရဂှ် ဂွံတီကေတ်ရ။

ကုန်ဗ္ဒိုပ်တိုၚ်တာဝါ ဒဵုလက်ခက်ဂှ် သ္ပပ္တံနူ ဂိတုဂျူလာၚ် စၟတ်တ္ၚဲ ၂၀ အခိၚ်နူဂယး ၜိုတ် ၆နာဍဳဂှ်တုဲ ဂကောံဒပ်ပံၚ်ကောံ KNLA တံ ထ္ပက်ပၞာန်ဗ္တိုက်လဝ်တုဲ ဂျူလာၚ် စၟတ်တ္ၚဲ ၂၁ ၜိုတ်အခိၚ်နူဂယး ၅နာဍဳဂှ် လုပ်စိုပ်သီကေတ်မာန် အာစိုပ်ဒတုဲရ။ အပ္ဍဲပေါဲဗ္တိုက်ဂှ် ပရေၚ်ဇီုကပိုက်ချိုတ် လ္ပာ်ကံၚ်ဇြဳပၞာန်တံ နွံလဝ်ဗွဲမဂၠိုၚ်ဂၠေၚ်တုဲ လွဟ်လက်နက်မကမ် ကပေါတ်အရပ်စပ်ပၞာန် ဗွဲမဂၠိုၚ်ဂှ်လေဝ် ဂကောံဇြဟတ်ပံၚ်ကောံ KNLAတံ သီဂိုၚ်ဂွံလဝ်ရ။

ပ္ဍဲပေါဲဗ္တိုက်ဒဵုလက်ခက်ဂှ် တမ်ဒပ် ခမရ(၂) ဇြဟတ်ဒပ် ၆၀ပြၚ်ပါတံကဵု ခမရ (၁၁၈) တမ်ဒပ်ၜါတမ်ဒပ်တံ ပါလုပ်လဝ်တုဲ အပ္ဍဲပေါဲဗ္တိုက်ဂှ် သ္ကိုပ်တမ်ဒပ် ခမရ(၂) အာကာအံၚ်ကေုာံ ဒုသ္ကိုပ်တမ်ဒပ် ကျဝ်တူမံၚ်တံ ညး၂တၠဂှ် ဟွံဂွံအမိၚ်ဆုတ်ကလေၚ်မွဲသာ် ဟိုတ်နူဆုတ်လဝ်ဒပ်ဂှ်ရ နကဵုအမှု ဒစဵုဒစးအဝဵုဂှ် ဒးဒုၚ်ကဵုဒုဟ်ဖျေံလဝ်ထံၚ် ပ္ဍဲထံၚ်စာတ်ဍုၚ်ကျာ်ထဝ် တွဵုရးဍုၚ်မန်ရဂှ် ဂွံတီကေတ် အတိုၚ်တၚ်လလောၚ်တြး KNU ရ။

ပရိုၚ်- သြၚ်လောန်တိုၚ်မ်

ဗီု-Cobra Column