ကမၠောန် SME ၃၀၀ ပြၚ်ကံၚ်ဇြဳပၞာန်သီပလီုလဝ် အခေါၚ်စၟတ်သမ္တီ

နေပျဳဒဝ်၊ ဂျူလာၚ်(၂၇)

နူဂိတုဨဗြဴ သၞာံဘဏ္ဍာဏံ စဵုကဵုဂိတုဂျောန် ပ္ဍဲပွိုၚ်ပိဂိတုဂှ် ကမၠောန်ကွတ်တဲကွတ်စက် အဇာဍောတ် ဆက်ဗ္ဂေတ်အာကမၠောန်ဟွံမာန် (၃၃၈) ဂှ် သီပလီုလဝ် အခေါၚ်စၟတ်သမ္တီရဂှ် ဓမံက်ထ္ၜးလဝ် ပ္ဍဲလိက်ပရိုၚ်တြးဝါဒ ကံၚ်ဇြဳပၞာန်ရ။

ကမၠောန်ကွတ်တဲ ကွတ်စက် အဇာဍောတ်တအ်ဂှ် ဒၟာနူဟိုတ်နာနာသာ် ဟိုတ်နူဆက်ကၠောန်ရေၚ်တၠုၚ်ကမၠောန်ဟၟဲဂှ်ရ ဒးသီပလီုလဝ် အခေါၚ်စၟတ်သမ္တီရဂှ် ဌာနက္ဍိုက်က္ဍိုပ်ကမၠောန်ကွတ်စက် အဇာဍောတ် ကံၚ်ဇြဳပၞာန် ဟီုသ္ဂးလဝ်ရ။

အတိုၚ်တၚ်လလောၚ်တြးကံၚ်ဇြဳပၞာန် လလောၚ်တြးလဝ်မ္ဂး ကမၠောန်ကွတ်တဲ ကွတ်စက် အဇာဍောတ် (၄၆၃)ဂကူ ပ္တိတ်ကဵုလဝ် အခေါၚ်စၟတ်သမ္တီတုဲ ကမၠောန် ဗ္ဂေတ်ကမၠောန်ဟွံမာန်တအ်ဂှ် ပသီလီုလဝ် အခေါၚ်စၟတ်သမ္တီရဂှ် ဓမံက်ထ္ၜလဝ်ရ။

တၠကမၠောန် SME မွဲတၠဂှ်မ္ဂး ကမၠောန်ဗွဲမဂၠိုၚ် ပ္ဍဲလက်ထက်ကံၚ်ဇြဳပၞာန် ဟိုတ်နူပၟတ်ဓာတ်လလဳအခိၚ်ဟွံဍာံတုဲ သွက်ဂွံဆက်ဒတူလာၚ်အာ ဟိုတ်နူခက်ခုဲကၠုၚ်ဂှ်ရ ဒးဒေါံဇူလဝ်ကမၠောန်ရဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။

မွဲလ္ပာ်ပၠန်ဂှ် တၠကမၠောန် SME တအ် ဟိုတ်နူၚုဟ်မးဗၞိက်အပြောံ မးယိုက်ပလံၚ်က္ဍၚ်တိုန်ကၠုၚ် လောန်ၜက်နူသၞောတ်ဗ္ၜတ်ကီု သီုကဵုသၟာကမၠောန်တအ် အောန်ကြဳကၠုၚ်တုဲ သွက်ဂွံဆက်ဗ္ဂေတ်ကၠောန်အာကမၠောန် ဒးဆဵုဂဗဒၟံၚ်ကဵု တၚ်အခက်ခုဲရ။

အတိုၚ်လိက်ဒုၚ်စဳရေၚ်တိုက်သြန်ဂၠးကဝ်မ္ဂး ဟိုတ်နူပဋိပက္ခက္တဵုဒှ်ဒၟံၚ် ပ္ဍဲကၟိန်ဍုၚ်ဗၟာ၊ ပၟတ်ဓာတ်လလဳ ပိုတ်သ္ကုတ် ကေုာံ ဟိုတ်နူပရေၚ်ပြံၚ်သၠာဲ မူဝါဒလေဝ် ဇီုကပိုက်ဒး လ္တူပရေၚ်ပိုန်ဒြပ်ကၟိန်ဍုၚ်ဗၟာ ပရေံပရေံဆက်နွံဒၟံၚ်ရဂှ် လလောၚ်တြးလဝ် ပ္ဍဲဂိတုဂျာန္နဝါရဳ တုဲကၠုၚ်ဏံရ။

အလုံမွဲကၟိန်ဍုၚ်ဂှ် အပံၚ်လၟိဟ်ကမၠောန် SME ဂၠိုၚ်ကဵုကိုတ် နွံဒၟံၚ်တုဲ ကမၠောန် SME တအ်ဂှ် ဟိုတ်နူဒပ်ပၞာန်သီအဝဵုတုဲ သွက်ကမၠောန် ဂွံဆက်ဂေတ်အာမာန် ဒးရုန်ဂစာန်ဒၟံၚ် အိုတ်အစောန်တုဲ ကမၠောန်လ္ၚဵု ဟိုတ်နူဒးကျဟောံတုဲ ဒးကၟာတ်ကၠုၚ်ဇူကၠုၚ်ရ။

ပရိုၚ် -သြၚ်လောန်တိုၚ်(မ်)

ဗီုရုပ် -CJ