ပ္ဍဲၜဳကလေၚ် ပေါဲဗတိုက်တ္ၚဲဆက် က္တဵုဒှ်ဒၟံၚ်

ၜဳကလေၚ်၊ ဂျူလာၚ်(၂၇)

တွဵုရးဍုၚ်မန် ပ္ဍဲပွိုၚ်ဍုၚ်ၜဳကလေၚ် ဟိုတ်နူဒပ်ကံၚ်ဇြဳပၞာန်ထ္ပက်လုပ်ကၠုၚ်ကရောၚ်ပၞာန်တုဲ ပေါဲဗတိုက်က္တဵုုဒှ်ဒၟံၚ် တ္ၚဲဆက်က်ရဂှ် ဂွံတီကေတ် နူကဝ်မတဳကောပ်ကာဲကေၚ်ကာမိတ်ခရိုၚ်သဓီု KNUရ။

သ္ပတံနူ ဂိတုဂျူလာၚ် စၟတ်တ္ၚဲ (၂၄)တုဲ ကရောၚ်ပၞာန် ဇြဟတ်နွံ ၜိုတ်(၆၀) နူလ္ပာ်မေဝ်လာန် လုပ်စိုပ်ကၠုၚ် ပ္ဍဲကွာန်ခလောက်အေန်ဂှ်ရ ဒှ်လဝ်ပေါဲဗတိုက်ကဵု ဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA တအ်ရ။

ပ္ဍဲပေါဲဗတိုက်ဂှ် သီဂွံလဝ် ဇွအကြာပ်ဒပ် ကေုာံ လွဟ်မကမ် နူလ္ပာ်ကံၚ်ဇြဳပၞာန်ရဂှ် ဥက္ကဋ္ဌကောပ်ကာဲကေၚ်ကာမိတ်ခရိုၚ်သဓီု KNU ဟီုလဝ်ရ။

ဂိတုဂျူလာၚ် စၟတ်တ္ၚဲ (၂၅) ဂှ် ဒပ်ကံၚ်ဇြဳပၞာန်ကဵု ဒပ်ပံၚ်ကောံ KNLA တအ် ဒှ်လဝ်ပေါဲဗတိုက် ပ္ဍဲကွာန်အလူလေဝ်တုဲ တ္ၚဲဏံ ဂိတုဂျူလာၚ် စၟတ်တ္ၚဲ (၂၆) အခိၚ်နူဂယးဂှ်လေဝ် ထပ်ဒှ်လဝ်ပေါဲဗတိုက် ဗ္ဒာဲကွာန်ယှိုဲယောၚ်ပျရ။

ပ္ဍဲပေါဲဗတိုက်ၜါလ္ပာ် ဒှ်လဝ်ဗ္ဒာဲကွာန်အလူလေဝ်ဂှ် ဒပ်ကံၚ်ဇြဳပၞာန် စံၚ်ပလီုလဝ် ကွဳစက်ညးဍုၚ်ကွာန် (၃) ဖ္ဍိုက်တုဲ ကေတ်ဏာလဝ် ကွဳလိုန်ဓာတ် (၃) ဖ္ဍိုက်ရဂှ် ဟီုသ္ဂးလဝ်ရ။

ပြဟ်ဟ်ဏံ ဟိုတ်နူပေါဲဗတိုက်တုဲ ညးဒေသကွာန်အလူလေဝ်ကီု သီုကွာန်ဗ္ဒာဲဂှ် ၃ ကွာန်တအ် ဒးဂြိပ်ဒဴပါဲဓလေတ်ဒၟံၚ် ပ္ဍဲဒၞာဲဗၠးဘဲရ။

ဂိတုဂျူလာၚ် စၟတ်တ္ၚဲ (၂၁)တုဲကၠုၚ်တေံလေဝ် ပေါဲဗတိုက်ဟၟဲမွဲသာ် ဟိုတ်နူဒပ်ကံၚ်ဇြဳပၞာန် ပန်ဖျေံလဝ်လွဟ်ဇၞော် ပ္ဍဲပွိုၚ်ဍုၚ်ၜဳကလေၚ် အဆက်ဟွံပိုတ်သ္ကုတ်ဂှ်ရ ညးဒေသနူကွာန်ယှိုဲယောၚ်ပျ၊ ဇြဳဝန်၊ အဝေန်ဂျဳ ဗ္ဒာဲ (၃၀၀၀) တၠ ဒးဂြိပ်ဒဴပါဲဓလေတ်ဒၟံၚ်ရဂှ် ဂွံတီကေတ် အတိုၚ်တၚ်လလောၚ်တြး KNU ခရိုၚ်သဓီုရ။

ပရိုၚ် – သြၚ်လောန်တိုၚ်(မ်)

ဗီုရုပ် – KNU