ကောန်ဍုၚ်အမေရိကာန်တံ ညံၚ်ဂွိုအ်အာတရဴ ဍုၚ်ဗၟာဂှ် အလဵုအသဳအမေရိကာန် ကဵုသတိ

လ္ဂုၚ်၊ ဂျူလာၚ် (၂၇)

ကောန်ဍုၚ်အမေရိကာန်တံ ညံၚ်ဂွိုအ်အာတရဴ ဍုၚ်ဗၟာ မဒးဒုၚ်စၟတ်လဝ် ပရေၚ်အာကၠုၚ်တရဴ ကဆံၚ်ပရေံအိုတ်ဂှ် နူကဵုဌာနဝန်ဇၞော်ကာဍုၚ်သ္အာၚ်အမေရိကာန် လလောၚ်ပ္တိတ်လဝ် လိက်ကဵုသတိမွဲတၞးရ။

ပ္ဍဲကဵုစရၚ်စၞောန်ထ္ၜးဂၠံၚ်အာတရဴအမေရိကာန် နူကဵုဌာနကာဍုၚ်သ္အာၚ်အမေရိကာန်တံ မလလောၚ်ပ္တိတ်လဝ် နကဵုစၟတ်တ္ၚဲ ဂျူလာၚ် ၂၄ ဂှ် ပ္ဍဲကဵုဍုၚ်အာကၠုၚ်တရဴဟွံထေက်ဂှ် စၟတ်လဝ်ဍုၚ်ဗၟာ ကဆံၚ် (၄) ရ။

ပ္ဍဲကဵုတၚ်ကဵုသတိဏံဂှ် ညံၚ်ရဴဍုၚ်ဗၟာကီု ဍုၚ်ကိုဝ်ရဳယျာသၟဝ်ကျာ၊ အာဖဂါန်နေဿတာန်၊ အဳရာန် ကောံ ရုယှာတံဂှ်လေဝ် ညံၚ်ဂွိုအ်ကၠောန်သ္ပအာကၠုၚ်တရဴအိုတ်ဂှ် ဖ္တိုက်ဖ္အောဝ်လဝ်ရ။

နကဵုကောန်ဍုၚ်အမေရိကာန် မအာကၠုၚ်မံၚ်စံၚ်ဒၟံၚ် ပ္ဍဲဍုၚ်ဗၟာဂှ် ပွမဒစဵုဒစးဟီုဂးဒး ကုကံၚ်ဇြဳပၞာန်ကီု၊ ပွမချူပ္တိုန်လ္တူဇာဇၞိက်ပရေၚ်မၞိဟ်တံကီု၊ ပွမချူဒးလိက်ပရေၚ်ပါ်ပါဲတံဏံဂှ် ဒးဒုၚ်ရပ်ဒက်ကေတ်ဒုဟ် နကဵုအမှုရာဇဝတ်မာန်ဂှ်လေဝ် ကဵုလဝ်သတိရ။

ရုၚ်ကလုတ်အမေရိကာန် မၞုံဍုၚ်လ္ဂုၚ်ဂှ် ပ္ဍဲကဵုတ္ၚဲဂကောံတၠအဝဵုပၞာန်တံ ဖျေံလဝ်ဒဏ်ဂစိုတ် ကုကိုဝ်ဂျေန်မဳ၊ ကိုဝ်ဖျဵုဇြေယျာဒဝ်၊ ကိုဝ်လှမျဵုအံၚ် ကေုာံ ကိုဝ်တူရဇြဝ်တံ ပေၚ်မွဲသၞာံ ပ္ဍဲဂိတုဂျူလာၚ် (၂၄) ဂှ် ဒးဒှ်ရဒှ်လၞီလၞာ်သောက ကရောံညးဍုၚ်ကွာန်ဍုၚ်ဗၟာတံ သွက်လၟိဟ်မၞိဟ် မဒးပြဟ်လလုဲအာလဝ်(၃၈၀၀) ပြၚ် အပ္ဍဲကာလသီအဝဵုဂှ် လလောၚ်ပ္တိတ်လဝ်ရ။

ပ္ဍဲကဵုတၚ်လလောၚ်တြးဏံဂှ် သွက်ဂွံဒ္ဂေတ်ဗက် အခေါၚ်အရာသ္ဇိုၚ်တံကဵု အခေါၚ်ဗၠးၜးတံဂှ်တုဲ ဆက်ထံက်အာဂလာန် ကုညးဍုၚ်ကွာန်ဍုၚ်ဗၟာတံရောၚ်ဂှ် လလောၚ်တြးလဝ်ရ။

ပရိုၚ်−သြၚ်လောန်တိုၚ်(မ်)

ဗီု−US Department Of State