မတ်မလီု၊ ဂျူလာၚ်(၂၇)
ကြဴနူကံၚ်ဇြဳပၞာန်လလောၚ်တြး တက်တြးပ္တိတ် သြန်စက္ခူတၟိ တၞး ၂၀၀၀၀ဂှ်တုဲ ပ္ဍဲတ္ၚဲတံဏံ သ္ၚုမပါလုပ် ၚုဟ်ဗၞိက်စၞစသုၚ်သ္ဇိုၚ်တံ သၠုၚ်တိုန်ကၠုၚ်ဂၠိုၚ်ကဵုဆရဂှ် သၟာဗၞိက်တံကဵု ညးဗြဴတၠသ္ၚိတအ် ဟီုကဵုဌာန်ပရိုၚ်သြၚ်လောန်တိုၚ်မ်ရ။
ကံၚ်ဇြဳပၞာန်သီအဝဵုဂှ် နဒဒှ်စၟတ်သမ္တီ ကျာ်ပဋိမာရုပ်မာရဝိဇယ အာစိုပ်ဒတုဲကေုာံ စိၚ်ဗ္တာၚ်ရဋ္ဌနန္ဒက မဆဵုလဝ် ပ္ဍဲဂိတုဂျူလာၚ် စၟတ်တ္ၚဲ ၂၃ သၞာံတုဲကၠုၚ်တေံ ပေၚ်မွဲသၞာံတုဲ တက်တြးပ္တိတ်အာ သြန်စက္ခူတၟိ တၞး ၂၀၀၀၀ ရဂှ် ပ္ဍဲဂိတုဂျူလာၚ် စၟတ်တ္ၚဲ ၂၃ဂှ် လလောၚ်ပ္တိတ်ကၠုၚ်ရ။
ကြဴနူပ္တိတ်တၚ်လလောၚ်တြးဏံတုဲဂှ် ပ္ဍဲဗွဝ်ဖျာသ္ၚုပ္ဍဲဍုၚ်ဂှ် သ္ၚုမောဝ်(ပေါ်ဆန်မွှေး)မွဲရိုက်ဂှ် စဵုကဵုဗ္ဒါဲမွဲကိုဋ်ဒ္ကေဝ် ၚုဟ်သၠုၚ်တိုန်ကၠုၚ်တုဲ သ္ၚုလုပ်ဂကောံသ္ၚုကြံၚ် (ဧည့်မထ)ဂှ်လေဝ် မွဲရိုက်စဵုကဵုပွဳူ ၇၀၀၀၀ဒ္ကေဝ် ၚုဟ်သၠုၚ်တိုန်ကၠုၚ်လဝ်မဒှ်ရ။
ဟိုတ်နူပွကလိုက်ကၟဵု သြန်တၞး ၂၀၀၀၀ဂှ်တုဲ ကြဴနူၚုဟ်သြောံသၠုၚ်တိုန်ကၠုၚ်တုဲဂှ် ၚုဟ်သ္ၚုတံလေဝ် ဗက်သၠုၚ်တိုန်ကၠုၚ်တုဲ စက်သ္ၚုလ္ၚဵုတံ ပရေၚ်ဒေါံဇူကၠုၚ်ကမၠောန်တံ နွံကၠုၚ်ရဂှ် တၠကမၠောန်စက်သ္ၚုမွဲတၠဂှ် ဟီုရ။
“ၚုဟ်သ္ၚုဂှ် မွဲၜါတ္ၚဲဏံရ တိုန်တုဲတိုန်မံၚ်ပၠန်ရ။ ဟိုတ်နူကိစ္စ သြန်တၞး ၂၀၀၀၀ ရဂှ် မိၚ်မံၚ်ရ။ ၚုဟ်သြောံလေဝ်တိုန်တှ်ေ ၚုဟ်သ္ၚုလေဝ် ကလေၚ်တိုန်အာပၠန်ရ။ သ္ၚုကြံၚ်မွဲရိုက်ဂှ် ဍေံလေဝ် (၆၀၀၀၀)ပြၚ်မံၚ်တှ်ေ အခက်အခုဲနွံရ။ ကလေၚ်ရာန်သြောံပၠန်လေဝ် ၚုဟ်သၠုၚ်မံၚ်ကွေံကွေံတှ်ေ နကဵုၚုဟ်ဇကုရာန်ဂှ် ဇကုဒးကလေၚ်ပလံၚ် ဒးပလံၚ်ရုၚ်သွံရာန်ဂှ်တှ်ေ ဟွံကိတ်ပုဟ်။ အတိုၚ်ကျတုပ်ပ်ရတှ်ေ ဟွံဗုတ်ရပုဟ်၊ မံၚ်ထောံအတိုၚ်ဏံ၊ ဇူထောံရ။ တ္ၚဲ သြန်တၞး ၂၀၀၀၀ ဏံတိတ်တုဲတှ်ေ သာတုဲပရေံနူဏံဟာဟွံတီရဂှ်” သ္ဂးရ။
ဗၞိက်မဒှ်စၞစသ္ဇိုၚ်ဂမၠိုၚ် ကၠေၚ်စ ၁၀ ပိဿာ မွဲဂလာန်ဂှ် နူ ၆၀၀၀၀ ဒ္ကေဝ် ၚုဟ်သၠုၚ်တိုန်ကၠုၚ် စဵုကဵု ၇၃၀၀၀ ဒ္ကေဝ်တုဲ ခၞံကြုက်ကှ်ကှ်မွဲကံၚ်ဂှ် နူ ၁၄၀၀၀ ဒ္ကေဝ် ၚုဟ်သၠာ်တိုန်ကၠုၚ် စဵုကဵု ၁၇၀၀၀ ဒ္ကေဝ်ရ။
ၚုဟ်ကသိုန်ဗ္ကေတ်ဂှ်လေဝ် မွဲရိုက် ၁၀ ပိဿာမွဲရိုက်ဂှ် နူပွဳူ ၂၀၀၀၀ဒ္ကေဝ် စဵုကဵု ဗ္ဒါဲ ၂၅၀၀၀ဒ္ကေဝ် ၚုဟ်သၠုၚ်ကၠုၚ်တုဲ ဗၞိက်စၞစသုၚ်သ္ဇိုၚ်တံဂှ် တန်တဴကဵုဂကူအဇာကပေါတ်တုဲ နူ ၂၀၀၀ဒ္ကေဝ် ၚုဟ်သၠုၚ်တိုန်ကၠုၚ် စဵုကဵု ၁၀၀၀၀ဒ္ကေဝ်ပြၚ်ရ။ သၟာဗၞိက်မွဲတၠဂှ်လေဝ် ဟိုတ်နူပွကလိုက်ကၟဵု သြန်တၞး ၂၀၀၀၀ဂှ်တုဲ ၚုဟ်ဖျာဟွံညိၚ်ဝတ်ဂှ်ရ သၟာဗၞိက်လ္ၚဵုတံ ဟွံကၠောန်ပရေၚ်သွံရာန်ရတုဲ သၟာဗၞိက်ကပေါတ်နွံတံဂှ်လေဝ် ဟိုတ်နူပ္တိုန်ၚုဟ်တုဲ သွံတြးဂှ်ရ ၚုဟ်ကပေါတ်တံ က္ဍၚ်တိုန်ကၠုၚ်ရဂှ် ဟီုရ။
“လှုဲတၟိတိတ်ဏောၚ် မုဏောၚ် ဒှ်မံၚ်ကလိုက်ကၟဵုတှ်ေ ၚုဟ်ၜါတ်တံလေဝ်စှ်ေရ။ ညးဂှ်မွဲလေဝ် ညးကပေါတ်နွံတံဂှ်လေဝ် ဟွံသွံပုဟ်။ ရာန်လေဝ်ဟွံထပ်ရာန်ပုဟ်။ ဟိုတ်နူပွသြန်ဖောဝ်က္တဵုဒှ်မံၚ်လၟုဟ်ဏံဂှ်တုဲ ညးကပေါတ်နွံတံရ ကော်ပ္တိုန်ၚုဟ်တုဲ သွံမံၚ်ရ။ မၞိဟ်နွံတံဂှ်လေဝ်ဟွံသွံကပေါတ်ပုဟ်။ ကညာၚ်မံၚ်ၚုဟ်ရ။ မၞိဟ်မိက်သ္ဂောံဂွံတံဂှ် ရာန်အိုတ်ရ။ ၚုဟ်ကော်ရ၊ မၞိဟ်မိက်သ္ဂောံသွံတံဂှ်လေဝ် ၚုဟ်မိက်ဂွံသွံဂှ် ကော်ရ။ မၞိဟ်ဟွံမိက်သွံတံဂှ်လေဝ် ဟွံသွံရ၊ ဟွံမွဲပုဟ် ဂှ်ဟီုရ။ ဟိုတ်ဂှ်ရ ၚုဟ်ဗက်တိုန်ကၠုၚ်ရဂှ်” ဟီုရ။
တိုက်သြန်ဗဟဵုကံၚ်ဇြဳပၞာန်ဂှ်တှ်ေ လ္တူတက်တြးပ္တိတ် သြန်စက္ခူ တၞး ၂၀၀၀၀ဂှ် ထ္ၜးဟိုတ်နာနာသာ်တုဲ ညးဆဝ်မ္ၚုဟ် ညံၚ်သ္ဂောံဓဇက်ပ္တိုန် ၚုဟ်ကပေါတ်ဗၞိက်တံ၊ ညးဂစာန်မံၚ် ညံၚ်ၚုဟ်နှေန်သၠာဲလှုဲဍုၚ်သ္အာၚ် သ္ဂောံသၠုၚ်တိုန်တံဂှ် ထ္မံက်ပ္တိတ်တုဲ ညံၚ်ဂွံကေတ်အရေဝ်မာန် ပံၚ်တောဲရေၚ်တၠုၚ်မံၚ် ကုဂကောံအုပ်လဒံသၞောဝ်ဥပဒေတံရဂှ် လလောၚ်ပ္တိတ်လဝ်ရ။
ဆ္ဂး ပ္ဍဲဗွဝ်ဖျာဂှ် ညးဍုၚ်ကွာန်တံ ဒးဒုၚ်စသိုၚ်မံၚ် ကုအကာဲအရာ ကပေါတ်ဗၞိက်စၞစသုၚ်သ္ဇိုၚ်တံ ၚုဟ်သၠုၚ်တိုန်နူကဵုကၠာတေံ ၃ဆပြၚ်ရ။
“ၚုဟ်ကပေါတ်ဗၞိက်တံဂှ် တိုန်အာ ၜိုတ်(၃)ဆပြၚ်ရ။ ကပေါတ် (၁၀၀)လတေံဂှ် လၟုဟ်တှ်ေ အောန်အိုတ်(၃၀၀) နွံရ။ ကၠာတေံဂှ် ခၟာဲစာၚ်မွဲမဂှ် ၜိုတ် ၁၀၀ ရာန်ဂွံမံၚ်။ လၟုဟ်(၃၀၀)ဂှ် ဂွံခၟာဲစာၚ်ဍောတ်တ်ရ။ ပ္ဍဲအကာဲအရာတၞဟ်ခြဟ်အာ ဂလိုၚ်ဏံဂှ် သြန်လုပ်ဂှ် သၞောတ်တြေံရ။ ကၠာတေံ ကိုပ်ကၠာဒပ်ပၞာန်ဂွိုအ်သီအဝဵုဂှ်လေဝ် သြန်လုပ်ဂှ် ဂလိုၚ်ဏံရ။ လၟုဟ်လေဝ် ပဵုကၠုၚ်ဟာဟီုတှ်ေ ဟွံပဵုပုဟ်။ ၜိုတ်ဏံရ။ ဂှ်တှ်ေ ပ္ဍဲအကာဲအရာဗီုဏံဂှ် ဗီုလဵုသ္ဂောံအေၚ်ဒုၚ်ရော။ သြန်လုပ်ဂှ် ဟွံပဵုကၠုၚ်ပုဟ်၊ သြန်တိတ်ဂှ် စမံၚ်အတိုၚ်ဏံ ဟွံသေၚ်ရပုဟ်။ ပ္ဍဲအကာဲအရာ ဒးခၞေအ်သအေတ်ကၠေတ်တုဲဒးစမံၚ် ဒးမံၚ်မံၚ်တံဂှ် ဒှ်ကၠုၚ်စဵုကဵုအကာဲအရာ စသုၚ်ညံၚ်သ္ဂောံကိတ်ညဳကဵုကဆံၚ်မၞိဟ်တံ ဟွံမာန်ရ”ဂှ် သ္ဂးရ။
ကြဴနူကံၚ်ဇြဳပၞာန် လလောၚ်တြးတက်ပ္တိတ် သြန်စက္ခူတၟိ တၞး ၂၀၀၀၀ ဂှ်တုဲ ပ္ဍဲဗွဝ်ဖျာ ဒဝ်ဠာ၊ ထဝ် ကေုာံ သြန်ၝာတ်ပ္ဍဲဍုၚ်တံဂှ်လေဝ် ဒှ်ကလိုက်ကၟဵုတုဲ က္တဵုဒှ်မံၚ် စဵုကဵုအကာဲအရာ ဗွဝ်ဖျာလီုရ။
ဟိုတ်နူပရေၚ်တက်တြးပ္တိတ် သြန်စက္ခူ တၞး ၂၀၀၀၀ ကံၚ်ဇြဳပၞာန်တံဂှ်တုဲ ပရေၚ်သြန်ဖောဝ်ကေုာံ ပရေၚ်က္တဵုဒှ် ကလောန်ကၟိတ်ဟွံမွဲတံ သၠုၚ်တိုန်ကၠုၚ်မာန်တုဲ ညးဍုၚ်ကွာန်တံ ထပ်တုဲဒးဒုၚ်စသိုၚ် ကုဘဲဒဏ် ၚုဟ်ဖျာက္ဍၚ်တိုန်ကၠုၚ်ဂၠိုၚ်ကဵုဆတံမာန်မံၚ်ဂှ် တၠပညာပရေၚ်ပိုန်ဒြပ်တံ ကဵုလဝ်သတိရ။
ပရိုၚ်-သြၚ်လောန်တိုၚ်မ်
ဗီု-CJ
sanlontai