ပ္ဍဲကျံက်တခါ ကြဴနူကရောၚ်ပၞာန်လုပ်ကၠုၚ်တုဲဂှ် ညးဒေသ ဟွံအောန်နူကဵု (၇) တၠ ဒးဒုၚ်ဂစိုတ်လဝ်

ကျံက်တခါ၊ ဂျူလာၚ် (၂၇)

ရးဒေသဇၞော်တၞၚ်သဳ၊ အပ္ဍဲပွိုၚ်ဍုၚ်ကျံက်တခါ ပ္ဍဲကဵုကွာန်ဂမၠိုၚ်ဂှ် ကြဴနူဒပ်ကံၚ်ဇြဳပၞာန် လုပ်စိုပ်ထ္ပက်ကၠုၚ်ကရောၚ်ပၞာန်တုဲဂှ် ညးဍုၚ်ကွာန်ကောန်အရာပ် ဟွံအောန်နူကဵု (၇) တၠ ချိုတ်အာလဝ်ရောၚ် ဂွံတီကေတ် ဇရေၚ်ညးဒေသတံကဵု ဂကောံဇြဟတ်ပၠန်ဂတးတံရ။

စနူဂိတုဂျူလာၚ် (၁၉) တုဲကၠုၚ်တေံတုဲ ကရောၚ်ပၞာန်ဒပ်ကံၚ်ဇြဳပၞာန် ဇြဟတ်ဗ္ဒါဲ (၄၀၀) ဂှ် လုပ်စိုပ်ကၠုၚ် ပ္ဍဲကွာန်(နံဇ) ၊ ပွိုၚ်ဍုၚ်ကျံက်တခါဂှ်ရ က္တဵုဒှ်လဝ်ပေါဲဗ္တိုက် ကုဂကောံဒပ်မဟာမိတ်ပၠန်ဂတး KNAL, PDF တံ ဗွဲမသ္ကာတ်မြဟ်ရ။

ဒပ်ကံၚ်ဇြဳပၞာန် မဒးဂိလဝ် အပ္ဍဲပေါဲဗ္တိုက်ကွာန်(နံဇ) ဂှ်ဝွံ ပ္ဍဲဂိတုဂျူလာၚ် (၂၀) အခိၚ်နူဂယးဂှ် ဂစိုတ်ဂယိုၚ်ဏာလဝ် ညးဍုၚ်ကွာန်ဒေသ ပ္ဍဲကဵုကွာန်ဂှ် (၃) တၠ ပါလုပ်သီုကဵုမၞိဟ်ဇၞော်ဇၞော်တံကဵု မၞိဟ်စိုတ်ဟွံထတ်ယုက်တံတုဲ သီုကဵုစံၚ်ပလီုပလာ်ဏာလဝ် သ္ၚိဒၟံၚ်ညးဍုၚ်ကွာန် (၇) မဂှ်လေဝ် ပကဖ ပွိုၚ်ဍုၚ်ကျံက်တခါ လလောၚ်ပ္တိတ်လဝ်ရ။

သ္အာၚ်နူဂှ်ပၠန် ပ္ဍဲဂိတုဂျူလာၚ် (၂၃) ဂှ်လေဝ် ဟိုတ်နူပရေၚ်ပန်ပှော်လွဟ်ဇၞော် ဒပ်ကံၚ်ဇြဳပၞာန်တုဲ မကမ်လွဟ်ဇၞော်ဂှ် ဒတုံဗ္တိုဟ်ထ္ကးအာလဝ် ပ္ဍဲကွာန်တမေန်အေန်ကုန်၊ ပွိုၚ်ဍုၚ်ကျံက်တခါဂှ်တုဲ မၞိဟ်မွဲသ္ၚိ (၄) တၠ ချိုတ်အာလဝ်ဂှ် ပရိုၚ်တမ်ရိုဟ်အပ္ဍဲဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ပ္ဍဲဂိတုဂျူလာၚ် (၂၆) အခိၚ်နူဂယးဂှ် အခိၚ်ဂကောံဒပ်ပံၚ်ကောံမဟာမိတ်ပၠန်ဂတးတံ လုပ်စိုပ်သ္အးဇ္ၚးတိဍာ် ပ္ဍဲကွာန် (နံဇ) ဂှ် က္တဵုဒှ်လဝ် ပေါဲဗ္တိုက်ဇီုမုက် ကုဒပ်ကံၚ်ဇြဳပၞာန်တုဲ လ္ပာ်ကံၚ်ဇြဳပၞာန် (၇) တၠ ချိုတ်အာလဝ်ရောၚ်ဂှ် ကောန်သ္ဂံၚ်ပၠန်ဂတးပ္ဍဲဗလးတိမွဲတၠ သ္ဂးရ။

ဟိုတ်နူပွဗ္တိုက်စွံပွန် ကေုာံ ပွမဖံက်ပ္ကဝ်အခေါၚ်အရာမၞိဟ် နူကဵုဒပ်ကံၚ်ဇြဳပၞာန် မကလိလောန်လဝ် လ္တူညးဍုၚ်ကွာန်ကောန်အရာပ် အပ္ဍဲပွိုၚ်ဍုၚ်ကျံက်တခါဂှ်တုဲ ညးဍုၚ်ကွာန်ဒေသ မၞုံအပ္ဍဲဂကောံကွာန်ဒံၚ်ခေန် ကေုာံ ဂကောံကွာန်(နံဇ) (၅၀၀၀) ပြၚ်ဂှ်ဝွံ ဒးဂြိပ်ဒဴပါဲဒလေတ်ဒၟံၚ်ဘဲပၞာန်ရောၚ်ဂှ် ဂွံတီကေတ် ဇရေၚ်ဂကောံဇြဟတ်ပၠန်ဂတးတံရ။

ပရိုၚ်−သြၚ်လောန်တိုၚ်(မ်)

ဗီု−KNLA-PDF Kyaukkyi