ဝါယှေန်တာန်၊ ဂျူလာၚ် (၂၇)
ဟိုတ်နူယူကရုၚ် ကလေၚ်ထ္ပက်ဒၟံၚ်ပၞာန် ကုရုယှာဂှ်ရ ဌာနကာစဵုဒၞါအမေရိကာန် ကဵုအာ အရီုဗၚ်ပရေၚ်ဂီုကၠီု သွက်ယူကရုၚ် ဒဝ်ဠာအမေရိကာန် (၄၀၀) ပြကောဋိကိုဋ်ပၠန်တုဲ ပ္ဍဲကဵုဏံပါလုပ်သီုကဵုကမ်လှောဝ် စဵုဒၞါသၞတရဴကျာဂမၠိုၚ်၊ ယာန်စၚ်ခြပ်ပသဲ ကေုာံ ဒရုၚ်ဍောတ်တ်တံဏောၚ်ဂှ် ပ္ဍဲဂိတုဂျူလာၚ် (၂၆) တေံ လလောၚ်တြးလဝ်ရ။
ပ္ဍဲကဵု package ပရေၚ်ထံက်ပၚ်ရီုဗၚ် အမေရိကာန်ဂှ် ဒရုၚ်ထံၚ်ပရိုၚ် Black Hornet အမေရိကာန် မကၠောန်ဗဒှ်လဝ် နူကဵု Teledyne FLIR Defence , Teledyne (TDY.N) ဂှ် နဒဒှ်အလန်ပထမကၠာအိုတ် ပါလုပ်ကၠုၚ်ဏောၚ်ဂှ် ဌာန်ပရိုၚ်ရိုက်တာ ထ္မံက်ထ္ၜးလဝ်ရ။
ပ္ဍဲကဵုအရီုဗၚ်လွဟ်လက်နက်တံဂှ် သွက်သၞောတ်စဵုဒၞါသၞတရဴကျာပါတ်ထရေက်ဂှ် သၞောတ်ကမ်လှောဝ် ကၠအ်ၝဲအကး (NASMS) ကေုာံ လွဟ်လက်နက်ဂမၠိုၚ်၊ သၞောတ်ပန်က္ၜၚ်ကျာသတေန်ဂျာ၊ သၞောတ် (HIMARS) ၊ ကွဳစၚ်ခြပ်ပသဲ ကေုာံ ကမ်လှောဝ်တၞဟ်ဟ်တံသၟးဟွံက သီုကဵု rocketနာနာလေဝ် ပါလုပ်ဂှ် ဂွံတီကေတ်ရ။
အခေါၚ်နူကဵုကၠတ်ထဝ်ဟွံပါမွဲသာ် သွက် US ဂွံလှဲပြံၚ်ကဵု ဗွဲမပြဟ် အပ္ဍဲအကာဲအရာကာတၟေၚ် မကော်ဂး PDA နူကဵုအခေါၚ်သမ္မတဂှ် ရပ်စပ်အာတုဲ ကဵုအရီုဗၚ် ကုအစဳဇန်ဏံဂှ်တုဲ ကပေါတ်ဂမၠိုၚ်ဝွံ ကၠုၚ်နူကဵုစရၚ် မပဵုဒၟံၚ်ဂမၠိုၚ်ရောၚ် မဒှ်ရ။
ပ္ဍဲအရာကဵုတၚ်စၟတ် လ္တူတၚ်လလောၚ်တြး မကဵုအရီုဗၚ်ဂှ် ဝန်ဇၞော်ကာဍုၚ်သ္အာၚ် အာန်တိုဝ်နဳယိုဝ် ဘလေန်ကေန်ဂှ် လ္တူရုယှာ မဗ္တိုက်ဒၟံၚ် သၞေဟ်ယူကရုၚ်တံကဵု စမြိုၚ်သ္ဇိုၚ်ယူကရုၚ်တံဂှ် ကြဴနူရုယှာ နုက်တိတ် နူကဵု Black Sea Grain Initiative ပ္ဍဲသတ္တာဟတုဲကၠုၚ်တေံတုဲဂှ် ကဵုလဝ်တၚ်စၟတ်သာ်ဏံရ။
“ကြဴနူယူကရုၚ် ရုပ်သီဂကောံဒပ်ဍေံတုဲဂှ် နကဵုရုယှာ ပွမဒေါအ်ဒေၚ်ကဵု ပရေၚ်ဗ္တိုက် မဓဇန်ကြမ်ကြ လ္တူညးဍုၚ်ကွာန်ယူကရုၚ်တံကဵု ဍုၚ်ဇၞော်ယူကရုၚ်တံဂှ်တုဲ ဖအိုတ်ကၠေံပေါဲပၞာန်ဏံ အခိၚ်ဟွံရုဲမာန်ရောၚ်၊ လုကဴဟွံဒှ်သာ်ဏံမ္ဂး အမေရိကာန် ကေုာံ မဟာမိတ်ပိုယ်တံ၊ အဖဝ်မိတ်ပိုယ်တံဂှ် ဒတူလိုၚ်အာဒၟံၚ် လ္ပာ်ဍုၚ်ယူကရုၚ် ဗွဲမကောံကလောံရောၚ်” သာ်ဝွံ ဗလေန်ကေန် ဟီုဂးလဝ် ပ္ဍဲကဵုတၚ်လလောၚ်တြးဂှ်ရ။
ယူကရုၚ် ကေုာံ ရုယှာတံဝွံ ပ္ဍဲအရာပလံၚ်ပ္တိုန်သြောံတံဂှ် ဒှ်ရဲက္ဍိုက်ပ်တုဲ အခိၚ်ပၞာန်သၠိုၚ်လုပ်ၜက်ၜေတ်ယူကရုၚ် ပရေံကၠုၚ်ဒၟံၚ်ဂှ် သွက်ဂွံဆေၚ်မုက် ကုအကြေပ်အဂြတ် ဇွောံမစၞစဂၠးတိဂှ်တုဲ ပ္ဍဲသၞာံတုဲကၠုၚ်တေံ ကုလသမဂ္ဂ ကေုာံ တူရကဳ လုပ်လဝ်အကြာ ပ္ဍဲတၚ်တုပ်စိုတ်သြောံသ္ၚု ၜဳဗ္စံက်ဂှ်ရ။
ဟိုတ်နူသၠိုၚ်လုပ်ၜက်ၜေတ်လဝ် ယူကရုၚ်တုဲ ရုယှာ မသ္ကဵုမၞိဟ်ဂၠိုၚ်ကဵုလ္ၚီ ဒးချိုတ်အာလဝ်တုဲ ကောန်အရာပ် ဂၠိုၚ်ကဵုပြကောဋိကိုဋ် ဒှ်အာလဝ်အရီုဗၚ်ဟွံမွဲဂှ် ဟီုဖျေံလဝ်ကဝု ကုအရီုဗၚ်အမေရိကာန်ဂှ်ရ။
“ပြဝဝါယှေန်တာန်တံဏံဂှ်ဝွံ လောန်ၜက်အာဒၟံၚ် နူကဵုဒ္ဂေတ်ပဋိပတ် ကေုာံ ဓဝ်သမ္တီတံရောၚ်” သာ်ဝွံ ပ္ဍဲကဵုပသ်ထ် ထလဳဂရာမ် ရုၚ်ကလုတ်ရုယှာ စပ်ကဵုဍုၚ်အမေရိကာန် ဟီုဂးလဝ်ရ။
သမဂ္ဂယူရောပ်ဂှ်ဝွံ ယဝ်ရဍုၚ်ယူကရုၚ် ပလံၚ်ပ္တိုန် ဗၞိက်တိတ်နူဝါဗ္ၚတံ နူကဵုဂၠံၚ်ကွဳပၟတ် ကေုာံ နူကဵုဂၠံၚ်တၞဟ်သ္အာၚ်တံမ္ဂး ရီုဗၚ်ကဵုအာဏောၚ် ကဵုလဝ်ကတိကီုလေဝ် တၚ်နၚ်ထ္မံက်ထ္ၜးဒၟံၚ် ဒဒှ်ရဒပ်ပၞာန်ရုယှာ ပန်ပှော်ဒၟံၚ် က္ၜၚ်ကောန်အရာပ်တံ ပ္ဍဲကဵုၜဳဗ္စံက်ဂှ်လေဝ် နွံဒၟံၚ်ဂှ် ပ္ဍဲတ္ၚဲအၚာတေံ ဗျိတိၚ် ဟီုဂးလဝ်ရ။
Ref: Reuters
sanlontai