မတ်မလီု – ဂျူလာၚ်(၂၈)
သြန်စက္ခူၜါလက်ဒ္ကေဝ် တိုက်သြန်ဗဟဵုသၟဝ်တဲကံၚ်ဇြဳပၞာန် တက်တြးပ္တိတ်ဂှ် တိုက်သြန်ဗဟဵုကာလအကြာ၊ အလဵုအသဳပရေၚ်ညဳသၟဟ်ကောန်ဂကူ လလောၚ်တြးလဝ် နဒဒှ် သြန်ဟွံလုပ်သၞောဝ် နကဵုစၟတ်တ္ၚဲ ဂိတုဂျူလာၚ် (၂၇)ရ။
သြန်စက္ခူၜါလက်ဒ္ကေဝ်ဂှ် အလဵုအသဳကောန်ဂကူ ကေုာံ အလဵုအသဳဆက်ကေတ်တာလျိုၚ်ဂတဏံ သ္ပစၟတ်သမ္တီဟွံသေၚ်တုဲ သ္အာၚ်နူဂှ် စၟတ်သမ္တီလလောၚ်တြးဏာ နဒဒှ်သြန်စက္ခူ ဟွံလုပ်သၞောဝ်ရဂှ် လလောၚ်တြးလဝ် နကဵုအသံပၟိၚ် ဥက္ကဋ္ဌတိုက်သြန်ကာလအကြာ ဥူတေန်ထောန်နိုၚ်ရ။
ဟိုတ်နူတက်တြးပ္တိတ်သြန်စက္ခူဟွံလုပ်သၞောဝ်တုဲ ပရေၚ်က္တဵုဗဒှ်ကဵုပွသြန်ဖောဝ်ဂှ် ကၠတ်ဂၠံက်ကေတ်ဒၟံၚ် သြန်ညးဍုၚ်ကွာန်တအ် ပကောံပကေဝ်လဝ် နဇြဟတ်ဍာ်ဓတ်ကာယ မွဲနဲမွဲဗီုရဂှ် ဟီုသ္ဂးလဝ်ရ။
ဟိုတ်နူပြဝကံၚ်ဇြဳပၞာန်ကၠောန်သ္ပဒၟံၚ် ကမၠောန်ဟွံစၚ်ခြၚ်ဗ္စာရဏာတုဲ အခိၚ်ဒးဆဵုဂဗဒၟံၚ်ကဵု အန္တရာယ်ပဋိပက္ခ ဟွံကေၚ်ဆဵုဂဗလဝ်ကၠာတေံမွဲလှ်ေ၊ ပရေၚ်ကြေပ်ဂြတ်ဝါတ်ခါဲ ကေုာံ ယဲဘဲကပ်တအ်ဂှ် တက်တြးပ္တိတ်သြန်စက္ခူတၟိ မသ္ပကဵုဂကောံသ္ၚိကၟိန်၊ တၠကမၠောန်ပရေၚ်ပိုန်ဒြပ်တအ်၊ ညးဓလိုက်တံရိုဟ် ကေုာံ ညးဍုၚ်ကွာန်တအ် ဂွံစိုပ်ကရေပ်ဂှ် ဒှ်အရာဂွံဒုၚ်တဲမာန် ဟၟဲရဂှ် ဓမံက်ထ္ၜးလဝ်ရ။
သ္အာၚ်နူဂှ်ပၠန် ကံၚ်ဇြဳပၞာန်ဒးဆေၚ်ဒၟံၚ်မုက်ကဵု အကြေပ်ဂြတ်သွာၚ်နာနာ ညံၚ်အာယုက်ဂွံဂၠိၚ်သ္ၚောဲကီု သြန်ဘဏ္ဍာနွံဒၟံၚ်ပၟိက် သွက်ဂွံကလိလောန် ပွပ္ကီုပရာပ်ဓဇန်သ္ကာလ္တူညးဍုၚ်ကွာန်တအ်ဂှ် စတက်တြးပ္တိတ် သြန်စက္ခူတၟိတုဲ ဒှ်ပရေၚ်ပ္တိတ်ဇြဟတ် သွက်ဂွံဖ္ဍိုက်ဗပေၚ် နဒဒှ်ကာတၟေၚ်ရဂှ် NUG ဟီုသ္ဂးလဝ်ရ။
တိုက်သြန်ဗဟဵု သၟဝ်တဲကံၚ်ဇြဳပၞာန်သီအဝဵုဂှ် ဂိတုဂျူလာၚ် စၟတ်တ္ၚဲ(၃၁) သၞာံ ၂၀၂၃ ကၠုၚ်စိုပ်ဂတဏံ တက်တြးပ္တိတ်သြန်စက္ခူ ၂၀၀၀၀ ဒ္ကေဝ်ရောၚ်ဂှ် လလောၚ်တြးလဝ်ရ။
ဟိုတ်နူကံၚ်ဇြဳပၞာန် တက်တြးပ္တိတ်သြန်စက္ခူတုဲ ဗ္ၜတ်သြန်ဖောဝ် ကေုာံ ညးကမၠောန်ကၟိတ်ဟၟဲ ဂၠိုၚ်တိုန်ကၠုၚ်မာန်တုဲ ဘဲဒဏ်ၚုဟ်မးဗွဝ်ဖျာ က္ဍၚ်တိုန်ဒၟံၚ်ဂှ် ညးဍုၚ်ကွာန်တအ် ထပ်ဒးဒုၚ်မာန်ဒၟံၚ်ရဂှ် တၠပညာပရေၚ်ပိုန်ဒြပ်တအ် ဟီုကဵုလဝ်သတိရ။
ပရိုၚ် – သြၚ်လောန်တိုၚ်(မ်)
ဗီုရုပ် – NUG
sanlontai