လံၚ်လုၚ်၊ ဂျူလာၚ်(၂၈)
ရးဒေသဇၞော်တၞၚ်သြဳ၊ ပွိုၚ်ဍုၚ်လံၚ်လုၚ်၊ ပ္ဍဲပေါဲဗတိုက်ၜါလ္ပာ်ဒှ်လဝ် အကြာကွာန်ခမောၚ်တောၚ်ကဵု ကွာန်သခါန်ဂျဳဂှ် သ္ဂံၚ် PDF (၃) တၠ ဒးချိုတ်လဝ်ရဂှ် ဒပ်စဵုဒၞာညးဍုၚ်ကွာန် ပွိုၚ်ဍုၚ်လံၚ်လုၚ် LLPDF လလောၚ်တြးလဝ် ပ္ဍဲဂိတုဂျူလာၚ် စၟတ်တ္ၚဲ(၂၇)ရ။
သ္ပတံနူ ဂိတုဂျူလာၚ် စၟတ်တ္ၚဲ (၂၂) တုဲကၠုၚ်တေံတုဲ နူဒပ်ကံၚ်ဇြဳပၞာန် ဇြဟတ်ဒပ် မၞုံဗ္ဒာဲ ၂၀၀ ဂှ် ဟိုတ်နူထ္ပက်လုပ်ကၠုၚ်ကရောၚ်ပၞာန်တုဲ ပေါဲဗတိုက်ၜါလ္ပာ် သ္ကာတ်မြဟ် က္တဵုဒှ်လဝ်ကဵု အကြာဒပ်ပံၚ်ကောံ ဒပ်စဵုဒၞာညးဍုၚ်ကွာန်တအ်ရ။
ပ္ဍဲကဵုပေါဲဗတိုက်ဂှ် လ္ပာ်ဒပ်စဵုဒၞာညးဍုၚ်ကွာန် ပွိုၚ်ဍုၚ်လံၚ်လုၚ် သ္ဂံၚ်ကိုဝ်အေအ်၊ သ္ဂံၚ် F-One ကေုာံ သ္ဂံၚ်ကိုဝ်ဝတုက်တအ် (၃)တၠ ဒးပြဟ်လလုဲလဝ်ရ။
ပ္ဍဲပေါဲဗတိုက်ဆေၚ်မုက်ဂှ် လ္ပာ်ကံၚ်ဇြဳပၞာန်လေဝ် ၜိုန်ရပရေၚ်ဇီုကပိုက်ဒးချိုတ်လဝ် နွံကီုလေဝ် ဆက်လ္ၚတ်ဂၠိုက်ဂၠာဲဒၟံၚ် လၟိဟ်ချိုတ်တ်ပၠိုတ်တ်ရဂှ် ညးတာလျိုၚ်လလောၚ်ပရိုၚ် LLPDF ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ကရောၚ်ပၞာန်ကံၚ်ဇြဳပၞာန်ဂှ် စဵုကဵုဂိတုဂျူလာၚ် စၟတ်တ္ၚဲ(၂၇)ဏံ ဟိုတ်နူထ္ပက်လုပ်ကၠုၚ်လဝ်ကရောန်ပၞာန် ဗ္ဒာဲကွာန်ခမောၚ်တောၚ်ဂှ်ရ အကာဲအရာပရေၚ်ပၞာန်ၜါလ္ပာ် ကြံၚ်မ္ၚိုဟ်ဒၟံၚ်ရဂှ် ဟီုသ္ဂးလဝ်ရ။
ဟိုတ်နူပေါဲဗတိုက်တုဲ ညးဒေသ နူကွာန် (၄)ကွာန် ပါလုပ် သီုကွာန်ခမောၚ်တောၚ်၊ သခါန်ဂျဳ၊ နာခါန်တဝ်၊ ဖွာဘုက်ပျေန် ဗ္ဒာဲ ၁၀၀၀ တအ် ဒးဂြိပ်ဒဴပါဲဓလေတ်ဒၟံၚ် ဒၞာဲဌာန်ဗၠးဘဲရ။
ဂိတုဂျူလာၚ် စၟတ်တ္ၚဲ (၂၁) တုဲကၠုၚ်တေံလေဝ် ဟိုတ်နူဒပ်ကံၚ်ဇြဳပၞာန် နူနာခါန်တဝ် ပန်ဖျေံလဝ်လွဟ်ဇၞော် ပ္ဍဲလ္ပာ်ခမောၚ်တောၚ်ဂှ်ရ ညးဗြဴကောန်ဒေသ(၁) တၠ ဇီုကပိုက်ဒးလဝ်လွဟ်ဇၞော်တုဲ ဒးချိုတ်လဝ်ရဂှ် ဂွံတီကေတ် အတိုၚ်လဟီု ညးဒေသတအ်ရ။
ပရိုၚ် – သြၚ်လောန်တိုၚ်(မ်)
ဗီုရုပ် – LLPDF
sanlontai