ဟိုတ်နူပေါဲဗတိုက်သ္ကာတ်မြဟ်ဒၟံၚ်တုဲ ညံၚ်ဟွံဂွံသုၚ်စောဲအာကၠုၚ် ဂၠံၚ်ကွဳစက် ကျောက်ဂျဳ နာတ်တာန်ကွေန် KNDO တာဒၞာလဝ်

ကျောက်ဂျဳ၊ ဂျူလာၚ်(၂၈)

ပ္ဍဲပေါဲဗတိုက်ၜါလ္ပာ် ဒပ်ကံၚ်ဇြဳပၞာန် ကေတ်လဝ်ပရေၚ်စဵုဒၞာ ကဵုညးဍုၚ်ကွာန်တအ်တုဲ ဟိုတ်နူချဳဒရာၚ်ဒၟံၚ်ပရေၚ်ပၞာန်ဂှ်ရ အကြာဂၠံၚ်ကွဳစက် ဆက်စၠောံလဝ် ဍုၚ်ကျောက်ဂျဳကဵု ဍုၚ်နာတ်တာန်ကွေန်ဂှ် သ္ပတံနူ ဂိတုဂျူလာၚ် စၟတ်တ္ၚဲ (၂၇)တုဲ နကဵုညးဍုၚ်ကွာန်တအ် ညံၚ်ဂွံဟွံသုၚ်စောဲအာကၠုၚ်ဂှ် တံဒပ်လၟိဟ် (၃) ကဵုလဝ်သတိ လလောၚ်တြးလဝ်ရ။

ဒပ်ကံၚ်ဇြဳပၞာန်သီအဝဵု သုၚ်စောဲဒၟံၚ်ညးဍုၚ်ကွာန်တအ် နနဒဒှ်ဒေၚ်ဒုၚ်ဒၞာမၞိဟ်တုဲ ချဳဒရာၚ်ဒၟံၚ်ပရေၚ်ပၞာန် နဲကဲဂၠံၚ်ဍာန်စုၚ် ဒဒှ်ရဂွံညာတ်ကေတ်လဝ်ဂှ် တၚ်ကဵုသမ္တီစၞောန်ပ္ညုၚ် သ္ကိုပ်တံဒပ် KNDO စၟတ် (၃) သဝ်လှယှိုဲဟေဝ် နူကဵု KNU မွဲကဆံၚ် လလောၚ်တြးလဝ် နကဵုစၟတ်တ္ၚဲ ဂျူလာၚ် (၂၇) ရ။

ပ္ဍဲတၚ်စၞောန်ပ္ညုၚ်ကဵုသမ္တီဂှ် နကဵုညးဍုၚ်ကွာန်တအ် သ္ပတံနူဂိတုဂျူလာၚ် စၟတ်တ္ၚဲ(၂၇)တုဲ ညံၚ်ဟွံဂွံကၠောန်သ္ပ ပရေၚ်အာကၠုၚ် ပ္ဍဲဂၠံၚ်ကွဳစက် အကြာဍုၚ်ကျောက်ဂျဳကဵု ဍုၚ်နာတ်တာန်ကွေန်ကီု၊ နကဵုညးဍုၚ်ကွာန် မံၚ်တန်တဴဒၟံၚ် ပ္ဍဲကွာန်မၞုံသ္ကဲဂၠံၚ်တအ်ဂှ် သ္ပတံနူအခိၚ်ဗ္တံ (၆) နာဍဳ စဵုအခိၚ် (၆) နာဍဳနူဂယး ညံၚ်ဟွံဂွံအာကၠုၚ်ဂှ် ကဵုလဝ်သတိရ။

သ္အာၚ်နူဂှ်ပၠန် ညးဍုၚ်ကွာန်တအ် ယဝ်ရအကာဲအရာကာတၟေၚ် သွက်ဂွံအာကၠုၚ် က္တဵုဒှ်ကၠုၚ်မ္ဂး သွက်ဂွံပရဟ်ဒုၚ်ကဵုသမ္တီ ဇရေၚ်ညးတာလျိုၚ်က္ဍိုပ်သ္ကိုပ်ကီု ယဝ်ဟွံဒ္ဂေတ်ဗက် တၚ်စၞောန်ပ္ညုၚ်ဂှ်မ္ဂး ဖိုလ်အဆက်က္တဵုဒှ်လကြဴတအ် ကေတ်အာတာလျိုၚ် ဟွံသေၚ်ရဂှ် ဓမံက်လဝ် ပ္ဍဲတၚ်လလောၚ်တြးရ။

သ္ပတံနူ ဂိတုဂျူလာၚ် စၟတ်တ္ၚဲ (၂၇) တ္ၚဲလိက်စၞောန်စၞောန်ပ္ညုၚ်ကဵုသမ္တီ တံဒပ် KNDO စၟတ်(၃) တိတ်လဝ်ဂှ်တုဲ လုကဴဟွံသီရုပ်ဏီမ္ဂး ဒှ်ဒၟံၚ်ဒ္တန်ရဂှ် ဓမံက်ထ္ၜးလဝ်ရ။

အခိၚ်လၟုဟ်ပြဟ်ဟ်ဏံ ပ္ဍဲပွိုၚ်ဍုၚ်ကျောက်ဂျဳ၊ ယှိုဲကျေန်၊ မုမ် မဒှ်တိဍာ်ဒပ်မဟာ (၃) ခရိုၚ်ညံၚ်လေဝ်ပေန် KNU ဂှ် ဟိုတ်နူဒပ်ကံၚ်ဇြဳပၞာန် ထ္ပက်လုပ်ကၠုၚ်ဒၟံၚ်ကရောၚ်ပၞာန်ဂှ်ရ ပေါဲဗတိုကဆေၚ်မုက် က္တဵုဒှ်ဒၟံၚ်ကဵု ဒပ်ပံၚ်ကောံ KNLA၊ KNDO၊ PDF တအ် သ္ကာတ်တ်မြဟ်ဟ်ရ။

ပရိုၚ်-သြၚ်လောန်တိုၚ်(မ်)

ဗီုရုပ်-KNDO