လ္ဂုၚ်၊ ဂျူလာၚ်(၂၈)
အကြာပ်ဒပ်ဇၞော်ကံၚ်ဇြဳပၞာန်မွဲတၠ မပံၚ်တောဲကၠုၚ်လ္ပာ်ညးဍုၚ်ကွာန်တံ သီုလွဟ်လက်နက် ဇရေၚ်တမ်ဒပ်စၟတ်(၁)၊ခရိုၚ်ဗိက်၊ ဒပ်စဵုဒၞါညးဍုၚ်ကွာန်တံဂှ် ပ္တိုန်ဂုဏ်စရာဲဖျေံလဝ်လာပ် နကဵုသြန်ဒ္ကေဝ် ၄၄ကိုဋ်ရောၚ်ဂှ် ဌာနဝန်ဇၞော်ပရေၚ်စဵုဒၞါ NUG လလောၚ်ပ္တိတ်လဝ်ရ။
တုဲကၠုၚ်ဂိတုဂျူလာၚ် စၟတ်တ္ၚဲ ၂၅ဂှ် ဇရေၚ်တမ်ဒပ်စၟတ်(၁)ခရိုၚ်ဗိက်ဂှ် အကြာပ်ဒပ်ဇၞော် နူတမ်ဒပ် ခလရ(၁၀၃) သၟဝ်တဲဂအုပ်ပၞာန် ရးဒေသရၚ်ၜဳ ကံၚ်ဇြဳပၞာန်မွဲတၠဂှ် နကဵု MA-3 မွဲဇကိုအ်၊ ကဠာမကမ် ၂မ၊ မကမ် 5.56 ၃၁၇ဒကောၚ်တံဂှ် ပံၚ်တောဲကၠုၚ်လ္ပာ်ညးဍုၚ်ကွာန်တံရ။
နကဵုကောန်သ္ဂံၚ် ညးမိက်ဂွံပြံၚ်ဒတူလိုၚ်လ္ပာ်ညးဍုၚ်ကွာန်တံကဵု ညးမိက်ဂွံဒတူလိုၚ်နဒဒှ် ညးကဵုပရိုၚ်အပ္ဍဲဒပ်တံဂှ် ကေတ်အဆက်ကု ဂကောံဒပ်စဵုဒၞါညးဍုၚ်ကွာန် (PDF)မစုက်လုက်တံ၊ တမ်ဒပ်/ကရောၚ်ပၞာန်တံကဵု ဒပ်စဵုဒၞါညးဍုၚ်ကွာန် (ပ.က.ဖ)တံမာန်မံၚ်ဂှ် NUG သ္ဂးလဝ်ရ။
သ္အာၚ်နူဂှ်ပၠန် ကေတ်အဆက်ကု ပရေၚ်စ္ၜုဲစ္ၜော်ဂၠံသြိုဟ်ညးဍုၚ်ကွာန် Telegram Channel @MyanmarPeople တံတုဲလေဝ် ရေၚ်တၠုၚ်မာန်မံၚ်ဂှ် ကဵုလဝ်သမ္တီရ။
နကဵုအလဵုသဳညဳသၟဟ်ဂကူ၊ ဌာနဝန်ဇၞော်ပရေၚ်စဵုဒၞါတံဂှ် ကုညးပံၚ်တောဲဒတူလိုၚ်ကၠုၚ် လ္ပာ်ညးဍုၚ်ကွာန်တံဂှ် မၚ်ဒုၚ်တဲဒုၚ်မံၚ်တၠုၚ်ရဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
ပ္ဍဲဍုၚ်ဗၟာဂှ် ကြဴနူဒပ်ပၞာန်သီအဝဵုတုဲ ကောန်သ္ဂံၚ်ဟွံမိက်ယိုက်ဝန်သၟဝ်တဲကံၚ်ဇြဳပၞာန်တံ ဗ္ဒါဲ ၁၅၀၀၀ စ္ၜုဲစ္ၜော်လဝ် လ္ပာ်ညးဍုၚ်ကွာန်တံရဂှ် ဂွံတီကေတ် အတိုၚ်တၚ်လလောၚ်တြး NUG ရ။
ပရိုၚ်-သြၚ်လောန်တိုၚ်မ်
ဗီု-MOD
sanlontai